Tukpɔɠaaleʋe Nuiti 3:10-26

¹⁰Ɠɔoɠɔ GALAGI ná-Zɛnvui ɠɛni tɔun ba. É ɠɛni ga tukpɔɠaaleʋe nui Izelayɛle unda. É liini ga kɔɔi Kusan-Liseyatayime laalɔɠɔma, Meezɔpɔtami masagi, Ɠɔoɠɔ GALAGI zobogi veeni bɛ, é pilɛ sɔlɔɔ naa ma.

¹¹Ziilɛigi ɠɛni zooi zu ná pɛ, kona ʋuunaanigɔ (40) laawu. Kenaze ná-doun zunui Wɔteniyɛle zaani.

¹²Izelayɛle nuiti ti Ɠɔoɠɔ GALAGI wanama vai ɠɛɛni mɔnɔ. Naa maaʋele ma, Ɠɔoɠɔ GALAGI Moaɓe masagi Egelon iɲɔdɔɔni, é wuzeɠe Izelayɛle laalɔɠɔma.

¹³Egelon Amɔn nuiti kpɔni ɓɔɠɔ ʋa, ta Amalɛke nuiti, ti li ti laalɛ Izelayɛle wu, ti zobogi zɔlɔɔni ma, ti kpɛ ti kula Zeeliko ʋa, Dɔza Taa Wolai, ti so.

¹⁴Izelayɛle nuiti ti lɔɔni duɔlai zu, Moaɓe masagi Egelon yeezu, kona puugɔ maazu lɔsaʋa (18) laawu.

¹⁵Izelayɛle nuiti ti kpeei looni Ɠɔoɠɔ GALAGI woizu, naa unmɔɔ nu leʋeni ti ma ga Eɠude, Ɓɛnzamɛn nui, Geela ná-doun zunui, nii é ɠɛni ga kɔʋɛ nui. Izelayɛle nuiti ti valini ma ga é li ga maazoloo ganii Egelon ʋɔ, Moaɓe masagi.

¹⁶Eɠude boɠa zɔkpɔi ɓɛtɛni ɓɔɠɔ ʋɛ, ga gaavelegi, é ɠɛ ga zeelo felegɔ ta tukpɛ (2,5), é gilini ná-saamaɠiligi ʋa ná-seɠei wu, ga zeezazu ʋele kpalai ma.

¹⁷É liini é maazoloo ganii ve Egelon ya, Moaɓe masagi. Tama Egelon ɠɛni ga zunui, nii gola wɔɔlɔni.

¹⁸Siɛgi zu é ɓeni da ga maazoloo ganii ve zea, é yeeɓeni zunuiti ba, ti li, tɛiti ti ʋaani ga anii naati.

¹⁹Seeliai ma kɔɔɠɔ ganigiti pɔ bɛ, ti ga kɔtui, Gilegale ɠobaʋɛ, é ɠaleni ma ʋolu, é ɠɛ masagi ma: «Ee, masagi, keela woo ɠa zèa, è ʋɛ, é ga dɔɔɠuzu vaa.» Masagi devei veeni ga ti ɓe ba, niiti kpein ti ɠɛni ná, naati pɛ ti ɠulani pɛlɛi wu.

²⁰Názu ɠa Eɠude maaɓuɠani la masagi ʋa, é ɠɛni zeini sangasoi wu maazuʋɛ, nii é makɛni ɓɔɠɔ ʋɛ dooɠo bosuʋɛ maazuʋɛ, fiilɛi ɠa. Eɠude ɠɛni ma: «GALA ná-keela wooi ɠa é zèa, ga é wo è ma.» Masagi wuzeɠeni ná-kpɔkpɔgi zu.

²¹Eɠude ɠɔʋɛi maaleni yeezazu ʋelei, é boɠa zɔkpɔi mɛɛnni, é pu ba kogi zu.

²²Ma ungi ɓalaa lɔɔni, ma mɛɛngi lɔa ʋoluma, mawulɔi ziɛni ma mɛɛngi ma, é naa laaɠulu. Mazɔlɔɔ boɠa zɔkpɔi folokulani ga polu ʋelei, é la ɠɛni mɛɛnni, é ʋa kula.

²³Eɠude ɠulani ga pɛlɛ ʋolu ʋelei, é daaɠulu, é sɔɠɔgi loo.

²⁴Siɛgi zu é ɠulani la, masagi ná-botiɠɛ nuiti ti liini ti naa ʋɛtɛ, ti kaani ga sangasoi ma ʋɛlɛlaʋɛti daaɠuluni, sɔɠɔgi loo. Ti ɠɛni ma: «Tanisu, toɠa ɠɛ latini pɛlɛi ʋolu.»

²⁵Ti ɓɔlɔni ga maaɓɔunga, kɛlɛ tɛi é la ɠɛni sangasoi ma ʋɛlɛlaʋɛti daalaoni maazuʋɛ, ti kpakui zeɠeni, ti daalao, pɛtɛ ti-maliɠii ɠɛni laani zooi ma, saai.

²⁶Tɛi ti wola lɛbini maaɓɔungi ɠa, Eɠude ʋelani. Kɔɔɠɔ ganigiti ti ga kɔtui, é naati pɔ bɛ maazuɓudɛni, é ʋela é li Seyila.