Mumutara Ŋic 3:10-26

¹⁰Wofuŋte Mârozi neŋgoc ŋecneha Israe ŋic jaŋerao mumutara gie bawec. E ʒika qaocte rahame Wofuŋzi Mesopotamia ŋicwofuŋ Kusaŋ‐Risataim e meticnao râewec. Râeme tâpiri‐ticnezi Kusaŋ‐Risataim siricke‐fârewec.

¹¹Eme mâreŋ ira wama fuarâ foha jara 40 tarawec. Ehame Kenaʒi ŋokâ‐ticne Otinie hâmowec.

¹²Eme Israe ŋic jaŋe Wofuŋte maio wiac hehesicne mocwâc embiŋ. Ehame Wofuŋzi Moabi ŋicwofuŋ Egeloŋ hâbi hecneme hume Israe ŋic jaŋe Wofuŋte maio wiac hehesicne embiŋte râsi fisi‐jarewec.

¹³E Amoŋŋic â Amaleke ŋic rocjopame Israe ŋic râsi fisi‐jarerâ bawahac‐jopambiŋ. Ehuc hâmu gie hae i ro rauc embiŋ.

¹⁴Eme Israe ŋic jaŋe jara 18 Moabi ŋicwofuŋ Egeloŋte kiŋaŋ qahuc jumbiŋ.

¹⁵Eme Israe ŋic jaŋe Wofuŋ kio wâwâsic ecnepie ŋic moc ʒâŋene Ehudu, Gerare ŋokâ, Benjamiŋte ɋâric, meticne qaqana, eki batarac‐jopaocte âkendâŋne‐jarewec. Eme Israe ŋic jaŋe erao sahac taha wiac râepie rame Moabi ŋicwofuŋ Egeloŋtao barawec.

¹⁶Â Ehudu e jahacne sâqe moc bawec, bune râpene mictara â ʒoricne‐ticnere sâc 18 inses. I hâcne fâre‐ticnere ŋaqimaŋko mariewec.

¹⁷Erâ sahac taha i bararâ Moabi ŋicwofuŋ Egeloŋ râcnewec, Egeloŋ e ŋic biuc wokemaŋ sâkohec juwec.

¹⁸Eme Ehudu e sahac taha i râcneme tarame ŋic taha reŋke rambiŋ jaŋe râec‐jopame risiembiŋ.

¹⁹Ehame e jahacne ine Giligali heririŋ qânâ ɋâŋguru ira domarâ mocwâc risierâ muwec: “O ŋicwofuŋ, no biŋedâŋ soŋne moc bajukopac.” Iŋuc mume ŋicwofuŋ e dâŋfânâŋ nac baocte jazawec. Ehuc rereŋfâc‐ticne jaŋe sorec‐jopame fic râpenao hufârembiŋ.

²⁰Eme ŋicwofuŋ e bucticne sawa roro ficticnao ŋehame Ehuduzi maŋfuŋnao rawec. Erâ muwec: “No Anuturaonec dâŋ moc gore biŋe bajukopac.” Eme ŋicwofuŋ e ŋeŋe‐ticnaonec faharewec.

²¹Ehame Ehudu e meqana‐ticnezi fâre‐ticnere gâjoŋkonec sâqe unuckerâ buticnao âeckewec.

²²Âeckeme sâqe tâpâcne mâmâc bumaŋnao raʒiwec. Eme mi unuckewecte wokemaŋzi bârârâŋneme bumaŋ‐ticnao fowec. Fohame hone wefuwec.

²³Eme Ehudu e ŋicwofuŋte ficmotâc basanaŋkerâ motâc pitickoa râpenao hurâ rawec.

²⁴Rame mi ʒoraha ŋicwofuŋte kiŋaŋŋicfâc jaŋe fisimbiŋ. Ehuc ficmaŋ‐ticnere motâc herâ basanaŋkekicne honerâ ʒiŋuc manasumbiŋ: “E ficpiticko raʒiocte motâc sanaŋne hejec.”

²⁵Eme woŋec juipierâ maŋjeŋic gâckewec. Eme ʒuhuckerâ motâc hehe jaha fome honerâ kimotec rorâ motâc batarambiŋ. Ehuc fekicne‐jeŋic e ɋâriŋko hâmocne foha honembiŋ.

²⁶Jaŋe woŋec juhapie jaha Ehudu e wiserâ qânâ ɋâŋguru ocniŋucnao Seira haeo rawec.