Pɑɑsǝnlɑɑ 11:5-29

⁵Yoou kɔmɑ nɑ kʋ́ hɑŋ ɩlɛnɑ Kɑlɑɑtɩ sɔsɑɑ polo Yɛfɛtɛ wɑɑlɩ kɛ́ Tɔpʋ tɛtʋ tɑɑ

⁶sɩ: Kɔɔ nɑ ń tɛɛ-tʋɣʋ nɔɣɔ nɑ tǝ́ polo tǝ yoonɑ Amoni nyǝ́mɑ.

⁷Tǝnɑɣɑlɛ Yɛfɛtɛ sɩ: Mɑtɔŋ mǝ tɑɑ kpɑnɑ-m nɑ ɩ́ tɔɣɔnɩ-m mɑ tɛ? Ɩlɛnɑ lɑŋwɑkǝllɛ mɑɣɑnɑ-mɛ nɑ ɩ́ kɔŋ mɑ wɑɑlɩ suwe?

⁸Ntɛnɑ sɔsɑɑ sɩ: Tǝ kɔmɑɣɑ sɩ ń kɔɔ nɑ ń tɛɛ-tʋɣʋ nɔɣɔ nɑ tǝ́ yoonɑ Amoni nyǝ́mɑ nɑ ń lɑ tɑ́ nɑ Kɑlɑɑtɩ nyǝ́mɑ tɑ́ nyʋɣʋ tʋ.

⁹Kɛlɛnɑ ɩ́ cɔ-wɛ sɩ: Ɩ́ mǝlǝnɑ-m sɩ tǝ́ yoonɑ Amoni nyǝ́mɑ nɑ Tɑcɑɑ ɩ́ tʋ-wɛɣɛ mɑ niŋ tɑɑ, mɑɑ lɑ mǝ nyʋɣʋ tʋ nɑ?

¹⁰Mpʋɣʋlɛ sɔsɑɑ sɩ: Yɛɛ, tɩɩ lɑ mpʋ. Tɑcɑɑ kɛlɛ tɑ́ ɑseetɑ tʋ.

¹¹Ḿpʋ́ɣʋ́ Yɛfɛtɛ tǝŋɑ Kɑlɑɑtɩ sɔsɑɑ nɑ yǝlɑɑ kpɑ-ɩ pɑ nyʋɣʋ tʋ, nɑ pɑ́ tʋ yoolɑɑ tǝnɑɣɑ ɩ niŋ tɑɑ. Ɩlɛnɑ Yɛfɛtɛ lɛlɩ tǝ tǝnɑ nti ɩ nɑ sɔsɑɑ pɑ yɔɣɔtɑɑ nɑ pɑ́ sɩɩ tɔɣɔ Tɑcɑɑ ɩsɛntɑɑ.

¹²Ḿpʋ́ɣʋ́ Yɛfɛtɛ tilɑɑ nɑ ɩ́ pɔɔsɩ Amoni wulɑʋ sɩ: Mɑ nɑ-ŋ suwe nɑ ń kɔɔ nɑ ń yookinɑ mɑ yǝlɑɑ?

¹³Ntɛnɑ ɩ́lɛ́ ɩ́ cɔ sɩ: Ɩsɛɣɛlɩ nyǝ́mɑ lɩɩʋ Icipiti tɔ pɑ lɛɛkɑ mɑ tɛtʋ kɛ pǝ kpɑɣɑʋ Alǝnɔŋ tɔ. Hɑlǝnɑ pǝ́ polo Yɑpɔkɩ nɑ Yɑɑtɑnɩ.

¹⁴Ḿpʋ́ɣʋ́ Yɛfɛtɛ tɑsɑ tiluɣu nɑ pɑ́ heeli Amoni nyǝ́mɑ wulɑʋ sɩ:

¹⁵Pǝ tɑɣɑ Mowɑpʋ nyǝ́mɑ nɑ Amoni nyǝ́mɑ tɛtʋ kɛ Ɩsɛɣɛlɩ nyǝ́mɑ lɛɛkɑɑ.

¹⁶Mpi tɔ, Ɩsɛɣɛlɩ nyǝ́mɑ lɩɩʋ Icipiti tɔ, wʋlɑɣɑ tɛtʋ tɑɑ kɛ́ pɑ tɔmɑ, hɑlǝnɑ pɑ́ tɑlɑ Sǝsǝncɑɑsɩ Teŋku. Pǝ wɑɑlɩ kɛ́ pɑ mǝlǝnɑ Kɑtɛɛsɩ.

¹⁷Tǝnɑɣɑ pɑ tilɑɑ nɑ pɑ́ sǝlǝmɩ Ɩtɔm wulɑʋ sɩ: Hɑ-tʋɣʋ mpɑɑʋ nɑ tǝ fɑɣɑnɑ nyɑ́ tɛtʋ tɑɑ. Amɑ ɩ́lɛ́ ɩ kisɑɑ. Ɩlɛnɑ pɑ́ sǝlǝmɩ Mowɑpʋ nyǝ́mɑ nɑ pɛlɛ pɑ́ kisi mpʋ tɔtɔ. Ɩlɛnɑ pɑ́ sɑɑlɩ Kɑtɛɛsɩ.

¹⁸Pǝlɛ pǝ wɑɑlɩ kɛ́ pɑ kpɑɣɑ wʋlɑɣɑ tɛtʋ mpɑɑʋ nɑ pɑ́ cɔɔlɩ Mowɑpʋ nɑ Ɩtɔm pɑ tɛtʋ nɑ pɑ́ lɩɩ Mowɑpʋ ilim tǝlɩɩlɛ tɔɔ. Ɩlɛnɑ pɑ́ siki Alǝnɔŋ lɔɔʋ nɔɣɔ tǝnɑ, pɑ tɑ sʋʋ Mowɑpʋ tɛtʋ tɑɑ. Mpi tɔ, pɛlɛ pɑ tɛtʋ toŋɑ ntɛ́ pɔɣɔ ŋkɛ.

¹⁹Ɩlɛnɑ Ɩsɛɣɛlɩ nyǝ́mɑ tili nɑ pɑ́ heeli Amolii wulɑʋ Sihoŋ wei ɩ tɔkɑɣɑ kɑwulɑɣɑ kɛ Hɛsǝpɔŋ tɔtɔ tɔ sɩ ɩ́ yele-wɛ nɑ pɑ́ fɑɣɑnɑ ɩ tɛtʋ tɑɑ nɑ pɑ́ tɛɛ timpi pɑ puki tɔ.

²⁰Sihoŋ nɑ́ tɑ́ lɑ́ Ɩsɛɣɛlɩ kɛ nɑɑni sɩ ɩ́ yele-wɛ nɑ pɑ́ fɑɣɑnɑ ɩ tɛ́. Ɩlɛnɑ ɩ́ koti ɩ yoolɑɑ nɑ pɑ́ yoonɑ-wɛ.

²¹Ɩlɛnɑ Ɩsɔ Tɑcɑɑ tʋ-wɛɣɛ Ɩsɛɣɛlɩ nyǝ́mɑ niŋ tɑɑ nɑ pɛlɛ pɑ́ kǝlɩ-wɛ nɑ pɑ́ lɛɛkɩ pɑ tɛtʋ tǝnɑɣɑ hɔɣɔlʋɣʋ ŋkʋ kʋ tɑɑ.

²²Pǝ kpɑɣɑʋ Alǝnɔŋ tɛtɛkǝlɛ nɑ pǝ́ polo Yɑpɔkɩ lɔɔʋ tɔ, nɑ pǝ́ kɛlɩ ilim tǝlɩɩlɛ tɔɔ wʋlɑɣɑ tɛtʋ hɑlǝnɑ pǝ́ polo Yɑɑtɑnɩ.

²³Ɩsɛɣɛlɩ nyǝ́mɑ Ɩsɔ Tɑcɑɑ hɑnɑ ɩ yǝlɑɑ tɑɣɑ nɔɣɔ sɩ tǝ́ lɛɛkɩ Amolii nyǝ́mɑ tɛtʋ. Ɩlɛnɑ nyɑɑ cɑɑkɩ sɩ n tɑɣɑnɩ-tǝɣɩ lɛɛkʋɣʋ nɑ?

²⁴Tɛtʋ nti nyɑ́ tʋɣʋ Kɛmɔsɩ hɑ-ŋ tɔ nyɑ́ kisɑ-tɩ? Mpʋ tɔtɔɣɔ tɑ́ wɛnɑ mpɑɑʋ sɩ tǝ́ tɔɣɔ tɛtʋ nti tɑ Ɩsɔ Tɑcɑɑ hɑ-tʋ tɔ.

²⁵Sipɔɔ pǝyɑlʋ Pɑlɑkɩ wei ɩ kɛ́ Mowɑpʋ nyǝ́mɑ wulɑʋ sɔsɔ tɔ, ɩ́lɛ́ ɩ wɛnnɑ toŋ. Pǝyele ɩ tɑ yoonɑ Ɩsɛɣɛlɩ nyǝ́mɑ. Nɑ ɑweɣe nyɑɣɑ tǝnɑ.

²⁶Pɩɩsɩ ŋmʋnʋɣʋ nɑ nɩɩnʋwɑ (300) kɛlɛ Ɩsɛɣɛlɩ nyǝ́mɑ cɑɣɑ Hɛsǝpɔŋ nɑ Alowɛɛ nɑ pǝcɔlɔ ɑcɑlɛɛ tɑɑ nɑ ɑcɑlɛɛ nnɑ ɑ wɛ Alǝnɔŋ lɔɔʋ nɔɣɔ tɔ ɑ tɑɑ. Ɩlɛ pepe tɔɔ kɛ́ ɩ́ tɑɑ lɛɛkɩ-wɛɣɛ tɛtʋ ntǝɣɩ wɑɑtʋ ɩnɩ ɩ tɑɑ?

²⁷Pǝ tɑɣɑ mɑ́ pǝntǝnɑnɑ-ŋ. Amɑ nyɑ́ wɑkǝlǝnɑ nɑ mɑ́, hɑlǝnɑ ń yookinɑ-m. Tɑcɑɑ wei ɩ hʋʋkǝnɑ yǝlɑɑ kɛ tɔm tɔ, ɩ́ hʋʋ tɑ nɑ-mɛ tɑ tɔm kɛ sɑŋɑ.

²⁸Pɑɑ nɑ mpʋ Amoni wulɑʋ tɑ yɑɑ Yɛfɛtɛ tɔm ntǝɣɩ pʋlʋ.

²⁹Ḿpʋ́ɣʋ́ Tɑcɑɑ Feesuɣu tii Yɛfɛtɛ tɔɔ, nɑ ɩ́ cɔɔ Kɑlɑɑtɩ nɑ Mɑnɑsee tɛtʋ. Pǝ wɑɑlɩ kɛ́ ɩ polɑ Misipɑ kɛ Ɩsɔ kiŋ kɛ Kɑlɑɑtɩ tɛtʋ tɑɑ, nɑ ɩ́ tɛɛ Amoni nyǝ́mɑ kɛ yoonɑʋ.