Soukapwüng 11:5-29

⁵Nge lupwen ekewe chon Amon ra popuetä maun ngeni chon Israel, ekewe souakomwen Kiliat ra feila pwe repwe angei Jefta seni ewe fanü Top.

⁶Iwe, ra üreni Jefta, “Kopwe etto pwe kopwe nöüm souemwen, pwe aipwe tongeni maun ngeni ekewe chon Amon.”

⁷Nge Jefta a üreni ekewe souakomwen Kiliat, “Ifa usun, ämi ousap oputaei o asüeila seni lon imwen semei? Pwota oua feito rei iei, lupwen oua nom lon osupwang?”

⁸Nge ekewe souakomwen Kiliat ra üreni Jefta, “Ina popun äm aia kul ngonuk iei pwe kopwe etikem le maun ngeni ekewe chon Amon, kopwe pwal nemeni chon Kiliat meinisin.”

⁹Iwe, Jefta a üreniir, “Are oupwe aliwinisefälieila lon leniei, pwe üpwe maun ngeni ekewe chon Amon, nge ewe Samol mi Lapalap epwe atolongeer lepei, ngang üpwe nemenikemi.”

¹⁰Mürin, ekewe souakomwen Kiliat ra üreni Jefta, “Ewe Samol mi Lapalap epwe chon pwärätä lefilach. Äm aipwe fokun föri usun ka apasa.”

¹¹Iei mine Jefta a eti ekewe souakomwen Kiliat, nge ekewe aramas ra seikätä pwe i epwe nemeniir o emweniir. Iwe, Jefta a apasasefäli ekei kapas meinisin me fän mesen ewe Samol mi Lapalap me lon Mispa.

¹²Mürin, Jefta a tinala chon künö ren ewe kingen chon Amon pwe repwe üreni, “Met punum ngenikem pwe ka feito o maun ngeni fanüem?”

¹³Iwe, ewe kingen chon Amon a üreni nöün Jefta kewe chon künö, “Lupwen chon Israel ra feito seni Isip, ra angei fanüei seni ewe chanpupu Arnon tori ewe chanpupu Japok, pwal tori ewe chanpupu Jortan. Iei mine oupwe aliwini ewe fanü fän kinamwe.”

¹⁴Nge Jefta a tinsefäliela ekewe chon künö ren ewe kingen chon Amon

¹⁵pwe repwe üreni, “Iei alon Jefta: Chon Israel resap angei fanüen chon Moap me chon Amon.

¹⁶Nge iei usun mine a fis: Lupwen chon Israel ra feito seni Isip, ra pwerelong lon ewe fanüapö tori ewe Setipar, ra pwal tori Kates.

¹⁷Mürin, chon Israel ra tinala chon künö ren ewe kingen Etom pwe repwe üreni, ‘Äm aia tüngor, kopwe mwüt ngenikem pwe aipwe pwerela lon fanüom.’ Nge ewe kingen Etom esap mochen aüseling. Iwe, ra pwal titila ren ewe kingen Moap, nge ätewe esap pwal mochen. Iei mine chon Israel ra chök nom lon Kates.

¹⁸Mürin ra sai lemenen ewe fanüapö o pwelila lükün ewe fanü Etom me ewe fanü Moap. Ra feila peliötiuen ewe fanü Moap o aüetä imwer lepekin ewe chanpupu Arnon me epek, nge resap tolong lon ewe fanü Moap, pun ewe chanpupu Arnon kiännin fanüen chon Moap.

¹⁹Mürin, chon Israel ra tinala chon künö ren Sihon kingen chon Amor mi nom lon Hespon. Iwe, ra üreni, ‘Äm aia tüngor, kopwe mwüt ngenikem pwe aipwe feila lon fanüom, pwe aipwe tori fanüem.’

²⁰Nge Sihon esap lükülük ren chon Israel ar repwe pwerela lon fanüan. Iei mine a amwichafengeni nöün sounfiu meinisin, ra feila o nonom Jahas o maun ngeni chon Israel.

²¹Iwe, ewe Samol mi Lapalap, ewe Koten Israel a atolonga Sihon me nöün sounfiu meinisin fän nemenien chon Israel, pwe ra akufuur. Iei mine chon Israel ra angei o fanüeni unusen ewe fanü ekewe chon Amor ra fanüeni me mwan.

²²Iwe, ra liapeni o fanüeni unusen fanüen ekewe chon Amor seni ewe chanpupu Arnon mi nom ör tori ewe chanpupu Japok mi nom efeng, pwal seni ewe fanüapö mi nom ötiu tori ewe chanpupu Jortan mi nom lotou.

²³Iei usun ewe Samol mi Lapalap, ewe Koten Israel, a asüela ekewe chon Amor me mwen nöün aramasen Israel. Met om pwüüng pwe ka ekiekin fanüeni fanüer iei?

²⁴Ämi oupwe fanüeni ewe fanü Kemos ämi we kot a ngenikemi. Nge äm aipwe fanüeni ekewe fanü meinisin ewe Samol mi Lapalap a ngenikem.

²⁵Ifa usun, en ka mürina seni Palak nöün Sipor we mwän ewe kingen Moap? Ifa usun, Palak a anini ngeni chon Israel ika a maun ngeniir?

²⁶Lon ükükün ülüpükü ier ekewe aramasen Israel ra nonom lon Hespon me Aroer me wisoposopur, pwal lon ekewe telinimw meinisin arun ewe chanpupu Arnon. Pwota kosap angeesefäli ekewe fanü lon ena fansoun?

²⁷Iei mine üsap tipis ngonuk, nge en ka mwäl ren om maun ngeniei. Ewe Samol mi Lapalap, ewe Soukapwüng, epwe eäni kapwüng lefilen ekewe aramasen Israel me ekewe aramasen Amon.”

²⁸Nge ewe kingen chon Amon esap aüselinga än Jefta pworaus a tinala ren.

²⁹Mürin, Ngünün ewe Samol mi Lapalap a feitiu won Jefta. Iwe, Jefta a pwerela lemenen Kiliat me Manasa o liwiniti Mispa lon Kiliat. Seni ikenan a pwerela ren ekewe chon Amon.