Tukpɔɠaaleʋe Nuiti 11:5-29

⁵Tɛi Amɔn nuiti ti kɔɔi ʋɛɛni Izelayɛle ʋa, Galaade ɠɛwolaiti ti liini, ti Zɛfetee loli Tɔɓe yooi zu.

⁶Ti ɠɛni Zɛfetee ma: «Ʋa è ɠɛ ga gá-ɠɔɔɠuluɓai, ade Amɔn nuiti sakpe.»

⁷Zɛfetee Galaade ɠɛwolaiti gooɠaaʋoteni, é ɠɛ ti ma: «Wo la ɠɛni wɔ̀inzeɠeni ɓaa, wo ʋa kpɛ̀, wo kùla kɛ̀ɛ ná-pɛlɛyeɠei ʋa? Lee vaa zu wo ʋaazu pɔ̀ niina, tɛi wo kidaaʋiligi zu ɓaa?»

⁸Galaade ɠɛwolaiti ti ɠɛni Zɛfetee ma: «Naa mu ka é kɛai gi ʋaai è ʋɔ bɛ ʋolu niizu, è lo gi luɠɔ, è Amɔn nuiti sakpe, è ɠɛ ga gá-ɠundiɠii, è ɓɔ Galaade nuiti kpein ba.»

⁹Zɛfetee Galaade ɠɛwolaiti gooɠaaʋoteni, é ɠɛ ti ma: «Wa liina ga ze ʋolu, gè Amɔn nuiti sakpe, ni Ɠɔoɠɔ GALAGI a ti lɔɔna zèezu, nà ɠa ga ɠɛ ga wa-ɠundiɠii.»

¹⁰Galaade ɠɛwolaiti ti ɠɛni Zɛfetee ma: «Ɠɔoɠɔ GALAGI ɠa ga zeelei, nii gi bosu gá ziɛ ga è-wooi.»

¹¹Zɛfetee ʋilɛni Galaade ɠɛwolaiti polu, ti li. Nuɓusɛiti ti yeeloni ba, ti kɛ ga kundiɠii, ta kɔɔɠuluɓai ɓɔɠɔ unda. Zɛfetee naa kpein suɠulani, nii ti zolooni ma ta kɛwolaiti, Ɠɔoɠɔ GALAGI ɠaazu Misepa.

¹²Zɛfetee keelaiti teʋeni Amɔn masagi ma, é ɠɛ ma: «Leeni ɠa é è ɠisu dàalɔɠɔma, è ʋaazu è ɗa kɔɔi ʋɛɛ nà-zooi ʋa?»

¹³Amɔn nuiti ta-masagi keelaiti gooɠaaʋoteni, é ɠɛ ti ma: «Toɠa ga Izelayɛle ɠulazuʋɛ Ezipete yooi ʋa, ti nà-zooi zeɠeni, é zo ziɛ wolai Aalenɔn ʋa, é li ziɛ wolai Yaɓɔke ʋɔ bɛ, é zeeli Zuludɛn ma nɛmɛi ma. À mináti fe zèa, ziilɛigi zu.»

¹⁴Zɛfetee keelaiti teʋeni ʋolu ga niinɛ Amɔn nuiti ta-masagi ma,

¹⁵ti liini ti ɠɛ ma: «Zɛfetee bogɛ ga: Izelayɛle la Moaɓe you zeɠeni, ɓaa Amɔn nuiti ta-you.

¹⁶Tɔɔzei Izelayɛle lɛɛni é zeɠe Ezipete, é ziɛni ga teʋebai zu ʋelei, eyɛsu é zeeli Seeli Kpoloɗɛi ma, é zeeli Kadɛse.

¹⁷Názu ɠa Izelayɛle nuiti ti keelaiti teʋeni la Edɔme masagi ma, ti ɠɛ ma: ‹Soma gi leʋe ga ɗa-yooi zu ʋele.› Kɛlɛ Edɔme masagi la ɠɛni kɛɛni, é ʋa woilo. Ti ta leʋeni ɓalaa Moaɓe masagi ma, naa ɓalaa ɠɛlɛni. Izelayɛle nuiti ti yɛni Kadɛse.

¹⁸«Ti ziɛni teʋebai zu, ti latini Edɔme yooi ma, ta Moaɓe yooi, ti ʋa ga Moaɓe yooi folo ɠulazu ʋelei, ti ʋuuni ziɛ wolai Aalenɔn ʋoluʋɛ, ti la lɛɛni Moaɓe yooi zu, mazɔlɔɔ Aalenɔn ɠa é ga Moaɓe you ɠwɛgi.

¹⁹«Izelayɛle nuiti ti keelaiti teʋeni Amɔɔl nuiti ta-masagi Siɠon ma, Ɠɛseɓon masagi, ti ɠɛ ma: ‹Soma, gi ziɛ ɗa-yooi zu, gi leʋe, gi li ʋɛ gi liizu ná.›

²⁰Kɛlɛ Siɠon la ɠɛni wola laani Izelayɛle la, é ʋa va bu ga naa ʋa leʋe ná-zooi zu. É ná-nuɓusɛiti kpein gaalɛɛni ba, ti ti ɓɔun Yaɠase, ti kɔɔi ʋɛɛ ti ʋa.

²¹«Ɠɔoɠɔ GALAGI, Izelayɛle ná-GALAGI, Siɠon ta ná-nuɓusɛiti dɔɔni Izelayɛle yeezu, é pilɛ sɔlɔɔ ti ma. Izelayɛle zooi kpein soni, ʋɛ Amɔɔl nuiti ti ɠɛni ná.

²²Ti Amɔɔl nuiti ta-yooi kpein soni, é zo ziɛ wolai Aalenɔn ma, eyɛsu é zeeli ziɛ wolai Yaɓɔke ma, é zo teʋebai ma, é zeeli Zuludɛn ma.

²³«Niizu niina, ni Ɠɔoɠɔ GALAGI, Izelayɛle ná-GALAGI, Amɔɔl nuiti kpɛa ná-nuɓusɛiti Izelayɛle luɠɔ, ɗa pɔ è ti ɓɛ ná ɓaa?

²⁴Nii nɔpɛ ɗa-ɠalagi Kemɔse feezu è ya ga è so, è la naa zoga ɓaa? Nii kpein Ɠɔoɠɔ GALAGI, gá-ƓALAGI seizu gi luɠɔ ga gi seɠe, gi la naa zeɠea ɓaa?

²⁵È vizɔgɛ mu Ɓalake ʋa ɓaa, Sipɔɔl ná-doun zunui, Moaɓe masagi? É Izelayɛle zakpeni nɛi ɓaa, ɓaa é kɔɔ ʋɛɛni ba?

²⁶É ɠɛa ga kona unsaʋagɔ (300) Izelayɛle zeini Ɠɛseɓon, ta Alɔwɛɛl, ta taaiti ti ɠiliai ti ʋa, ta taa wolaiti kpein ti ziɛ wolai Aalenɔn laaʋɛ. Leeni vaa zu wo la ɠɛni ti ɠulani ti ya naama ziɛgi zu?

²⁷Nɔ̀un nà, gè la kotoba vaa nɔpɛ kɛɛni è laalɔɠɔma, ɗa ɠa è faa ɲɔi ɠɛɛzu ga ze, è kɔɔi ʋɛɛ vai nɔ̀un ba. Ɠɔoɠɔ GALAGI, tukpɔɠaaleʋe ƓALAGI, ɠɛ za ga tukpɔɠaaleʋe nui Izelayɛle nuiti ta Amɔn nuiti zɔɠɔzu!»

²⁸Amɔn nuiti ta-masagi la ɠɛni woiloni naama wooiti ma, niiti Zɛfetee ɠɛni ti wosu ma.

²⁹Naazu ʋɛ, Ɠɔoɠɔ GALAGI ná-Zɛnvui yeini Zɛfetee ma, é Galaade ta Manasee yooiti maazuɓudɛni, é leʋe Misepa Galaade yooi zu, seɠeai ma miná, é liini luɠɔ, é laalɛ Amɔn nuiti bu.