Noca 18:37-43

³⁷Pea cuana jama cua baꞌa: —Jesosa iquio cueje, de.

³⁸Majoya aje jama taaame cua baꞌa: —Jesosa, miya Eyacuiñajjija huoojeaꞌyo cuani. Miya ma etiiquiana emeshi mese, Dabi jayojja cuani. Eya ca iña oe che cojjamaꞌ, de. ¡Che iña jjacojjajaꞌaqui meeꞌyocue!

³⁹Ehui dojojji pea cuana poquije jama cua baꞌa: —De, ¡quea shajjaquijjo pajjaja coma aꞌa taaajji! Oya ca ca taaa oꞌoya cua; jama cua baꞌa: —Jesosa, ¡che iña yohua sahuacue, miya Eyacuiñajjija huoojeaꞌyo!

⁴⁰Jesosa poquije tii nequiñaquia cua. Majoya aje oya jama cua baꞌa: —¡Cojjamaꞌ e que jjequicue! Yechipi cajo Jesosaa cojjamaꞌ jama huohuiꞌajjame aca cua baꞌa:

⁴¹—¿Apiojji eya miyaya taaaña, cojjamaꞌ? —Jesosa, miya ecuea Emeshi Mese nei, mi que e jjacojjajaꞌaqui meeꞌyojji mi taaanaje —jamaya cua cojjamaꞌ.

⁴²—Eꞌe de, ¡jjeya miya quea cojja jaꞌa poꞌyocue! Eyaya miya jjabapojjaqui meeꞌyonaje ejo eꞌe jojo nei jjashahuaba bamebamequinajejojo —jamaya Jesosa cua.

⁴³Majoya aje quea cojja jaꞌa nee nee poꞌya cua. Oya Jesosa nijje poquia cua. Oya jama cua baꞌa: —Eꞌe de, Eyacuiñajji quea bame nee nee, de. Jesosaa ecuea ecojja quea jaꞌa po mee caꞌyonaje, de. Pea cuaa ma ba majjeya Eyacuiñajji bihuia ca cua.