Lucas 18:37-43

³⁷“Tata-lib si Jesus ang taga Nazaret,” ganing tanira.

³⁸Ig dayon ang miniteg tang boray, “Jesus, Inampo ni David! Mate-beka ong yen!”

³⁹Sinambleng tanandia tang mga taw ang don ong tokawan, piro mas sinodoan na pa enged tang iteg na ang ganing, “Inampo ni David! Mate-beka ong yen!”

⁴⁰Siminareng si Jesus ig nanobol ang e-lan tang boray ong nandia. Pagalenget tang boray, sine-ma tanandia ni Jesus,

⁴¹“Onopa tang galiliagan mong boateno ong nio?” Siminabat tanandia, “Magino, galiliago rin ang maita!”

⁴²Ig ganing si Jesus ong nandia, “Yawa, maitā ra! Ang pagtalig mo tang nagpao-ya ong nio.”

⁴³Lagi-lagi naita ra tang boray. Oman siminabid tanandia ong ni Jesus ang dorong pasalamat na ong Dios. Asing itaen narin tang mga taw, namagdayaw da ka tanirang tanan ong Dios.