Make 3

1

2

3

4

5

6

7

8

9

10

11

12

13

14

15

16

¹Gii mendepa Jisasa baa Judamanya lotuu anda dokonya peamopa, akali kingi yangi talyanga mende peteamo kandea.

²Parasai dupame Jisasa kote lamana latala, baame akali doko Sambata gii dokonya kingi doko tolasakamailyape lao, isokondape petae peteami.

³Jisasame akali kingi yangi talyanga doko lamaiyoo, “Emba sakatatala, endakali pitakanya enombanya kalya ipu” lea.

⁴Dopa latala baame dokaita tipa pyoo, “Sambata gii dokonya kalai koo pipengepe, pande epe pipengepe? Dee endakali pyao kumasepengepe, pande nisepengepe?” lea. Dopa leamopa, dokaita ema napiami.

⁵Dokaitame akali kingi yangi talyanga doko kondo kaeyala naeyaminosa, Jisasame imbu kaeyao dokaita kandayoko latala, akali doko lamaiyoo, “Embanya kingi tinoka” lea. Leamoli pyoo baanya kingi doko tinokateamopa, tolea.

⁶Tolaseteamopa, Parasai dokaita kamaka pyakalyetala, Kiŋi Erote Antipasa tata dupa-pipa, Jisasa aipa petala pyao kumasemape lao, yapa pao kambuiyami.

⁷Dopa piaminopa, Jisasapi, baanya disaipolo dupapi, anda doko yakinatala, Galilea pete dokonya peami. Peaminopa, Galilea tangepi, Judia tangepi, Jerusalema tangepi, Idumia tangepi, endaki Jodane omotena tangepi, Taeya tangepi, Saidone tangepi, kambu longo dupame Jisasame pilyamo lapae dupa sepala, baa kateamo dokonya epeami.

⁹Wamba baame endakali yaina pyapae longo mee jakamaiyamo kandeamino dokonya, endakali waka yaina pyapae longome baa watandamana latala, tuu-tuu lao baa katao tambukinalanya piaminosa, sipi yakane mende disaipolo dupame depa lekena lea.

¹¹Imambu koo dupame baa kandeaminoli pyoo, baa kateamo dosa ipao tombauli sepala puu lao, “Emba Gote Ikiningina” lata piami.

¹²Dokopa Jisasame kyeto joo imambu koo dokaita lamaiyoo, “Nyakamame namba dokona lao panala naeyalapape, eteteaka daana” lea.

¹³Jisasa baa yuu manda mendenya pupala, akali mendatupa yapao nyotoo lao masiamo dutupa epena leamopa, baa kateamo dokonya epeami.

¹⁴Epeamino dupanya akali 12 dutupa yapao nyepala, baa-pipa tole katamana latala, kenge aposolo maiya. Dutupame wai pii epe doko lamaiyoo, dee imambu koo dupa watao pingi pupu lapae doko maiyanya yapao nyia.

¹⁶Baame 12 disaipolo dutupa yapao nyepala, Saimone kandao kenge enenge Pita lea.

¹⁷Sebedi ikiningi Jemesa, Jonepa dolapo kandao kenge Bonagesa lea. (Bonagesa tenge doko, “Kaiti toka lelyamo dopale.”)

¹⁸Dee baame Andruapi, Pilipapi, Batolomyuapi, Matyuapi, Tomasapi, Alopiasa ikiningi Jemesapi, Tadiusapi, Saimone kenge mende Selote lengema dokopi, Jisasa enge nyiamo akali Judasa Iskariota dokopi, dutupa yapao nyia.

²⁰Disaipolo yapao nyepala, Jisasa baa andaka pea. Dokopa endakali deaka ipao kambu piaminosa, baanya disaipolo dupa-pipa nee napenge nanjia.

²¹Endakali yangi dupame baa kyekelyamo leamino doko sepala, baanya tata dupame kii minao lanyala epeami.

²²Epeaminopa, Mosesanya loo mana nyepae akali, Jerusalema katao epeamino dupame lao pituu, “Baa-kisa imambu koo dupanya isingi, Belesabulu doko ipao palipya dokome, imambu koo waka dupa watao pilyamona” leami.

²³Dopa leaminopa, baame dokaita epena latala, kongali piimi lamaiyoo, “Sataneme Satane tange aipa petala watao pyatape?

²⁴Kiŋi mendenya tata doko pyaloo petala, nyakama wakale pitamino doko, nyakama mendai joo napalitami.

²⁵Akali mendenya enda wanepi dupa wakale petala, nyakama yangolapo pyaloo pitamino doko, nyakama mendai joo napalitami.

²⁶Dokaitaka joo Sataneme baanya tata doko wakale pyoloo petala, nyakama yangolapo yanda pitamino doko, nyakama mendai joo napalitamiaka. Nyakama etatami.

²⁷Akali mendeme akali pupu lapae mendenya andaka kolandatala, baanya pinju dupa pake nyalanya-tamo doko, wambao kendeme baa yaki pinya setapala nyeta.

²⁸“Nambame nyakama kiningi langilyo: Endakalinya koo dupapi, Gote kandao lamba lengepi, dupa pitaka Goteme kunao nepakamaita.

²⁹Dopaka doko, endakali mendeme Oli Spirit kandao lamba latamo doko, Goteme baanya koo doko kunao nepala naeyata. Tanga tangapi baa-kisa koo doko setana” lea.

³⁰Jisasa-kisa imambu koo mende palelyamona leaminosa, baame dopa lea.

³¹Dokopa Jisasanya endangi kaiminingipi, dupa ipao katapala, baa kamanda epena lao, endakali mendeme lanyala pena leami.

³²Lateaminopa, endakali baa pituu kakopeamino dupame Jisasa lamaiyoo, “Embanya endangi kaiminingipi, kamanda katao, emba ipu lelyamino” leami.

³³Jisasame yanu pyao, “Nambanya endangi kaiminingipi dupa apitupape?” lea.

³⁴Baa pituu kakopeamino dupa kandatala, “Pii soo pilyamino datupa nambanya endangi kaiminingipina kanjepa!

³⁵Gotenya masingili pingima endakali dupa nambanya kaiminingipi, pimalengepi, endangipina” lea.