1Jisasa baa Kapename yakinatala, Judia pao pyakamatala, endaki Jodane omotena pea. Dokopa endakali kambu dupa ipatae katao, baa kateamo dokonya ipao kambu piami. Dopa piaminopa, baame pingiliaka pyoo, endakali dupa deaka mana lamaiya.
2Dokopa Parasai mendapuame ipupala, baa minao makande pyoo, “Akali mendeme baanya enda yakinatamo doko, loome daa latae singi doko yalatape?” leami.
3Jisasame yanu pyao, “Wamba Mosesanya mana seteamo dokonya aipa latae silyape?” lea.
4Dupame yanu pyao, “Akali dokome enda yakinenge pepa doko maitala, yakinapengena latae silyamona” leami.
5Jisasame dokaita lamaiyoo, “Nyakamanya yumbange dupame tuu-tuu piaminosa, Mosesame mana doko pepa pyanya setea-pyaa.
6Seteamoaka doko, Goteme tee pyao yuu kaitipi wasiamo dokopa, enda akalipa lao wasia.
7Tenge dokonya, akali dokome baanya endangi takangepi yakinatala, enda dokopa tole pingi.
8Dopa pilyambinopa, nyakamba lapo joo napetenya, yonge mendai joo petengemba.
9Goteme nyoo pyasetae doko, endakalimi wakale pyoloo napipengena” Jisasame lea.
10Dopa lateamopa, baanya disaipolo dupame dee andaka patala, pii leamo dokonya Jisasa tipa piami.
11Dokopa baame dokaita lamaiyoo, “Akali mendeme baanya enda doko yakinatala, waka mende nyetamo dokome, enda wambatae dokonya enombanya baa kepo kolata.
12Dopaka pyoo, enda mendeme akalingi yakinatala, waka mendenya patamo doko, baa kepoaka kolatana” lea.
13Endakali mendapuame Jisasa kateamo dokonya wane wanakupi dupa Jisasame kingi aiyombanya setapala, pii epe lamaina lao laminao epeaminopa, disaipolo dupame dokaita pyalanya leami.
14Dokopa Jisasame imbu kaeyapala dokaita lamaiyoo, “Gotenya isingi mate doko wane wanakupi koo dapale joo kalyamino dupanyana, epekena kaita lyokala naeyalapa.
15Nambame nyakama kiningi langilyo: Wane wanakupi koo dupame Gotenya isingi mate doko nyingimali pyoo, endakali mendeme nanyetamo doko, Gotenya isingi mate dokonya napatana” lea.
16Dopa latala baame wane wanakupi koo dupa kopinyetala, kingi aiyombanya setao auu pisia.
17Dopa petala Jisasa paanya kaita nyiamopa, akali mendeme yapa ipao luma lakapala, baa tipa pyoo, “Mana Lenge Akali Epe, namba lete etete katenge doko aipa petala nyotope?” lea.
18Jisasame baa lamaiyoo, “Aipuma embame namba kandao epena leepe? Endakali mende epe daa, Gote iki baa epe kalyamo.
19Mosesanya loo dutupa embame masilino: 'Endakali pyao kumasala naeyape. Kepo kolala naeyape. Pake nala naeyape. Endakali mende sambo lao minakasala naeyape. Endakali mendenya dopale mende sambo lao tolao nyakamaiya naeyape. Embame embanya endangi takangepa, dolapo andanda semaiyoo katapena'” lea.
20Akali dokome Jisasa lamaiyoo, “Mana Lenge Akali, namba wane kolesa pituu, Mosesanya loo dutupa pitaka watao minio, dopaka pyoo minao kalyona” lea.
21Dopa leamopa, Jisasame akali doko kondo kaeyao kandatala, “Emba mendai mende daa jilyamona, pupala embanya oapi dupa pitaka muni nyepala, endakali daa jingi dupa maitala, namba watao ipupi. Dokopa embanya epe dupa kaitinya sakatana” lea.
22Dopa leamopa, baanya oapi etete longo singi dokonyana, mona etete kenda kaeyao, enomba kumatala, Jisasa yakinatala pea.
23Pateamopa, Jisasame kandayoko latala, disaipolo dutupa lamaiyoo, “Yuunya kamongo dupa Gotenya isingi mate dokonya paanya, etete leke-leke tatamina” lea.
24Dopa leamopa, disaipolo dupame sepala, mona kenda kaeyaminosa, Jisasame deaka lamaiyoo, “Wane paluma, endakali dupa Gotenya isingi mate dokonya paanya, eteteaka leke-leke tatami.
25Kamele mendeme kepo tii mendenya leke-leke tao kolandapyaliaka doko, yuunya kamongo mendeme Gotenya isingi mate dokonya paanya, etete leke-leke tapyalina” lea.
26Dokopa pii dutupa sepala, disaipolo dupa etete walu leami. Walu latala nyakamalapo laloo pyoo, “Dopa-tamo doko, endakali apimi Gotenya isingi mate dokonya patape?” leami.
27Dopa leaminopa, Jisasame dokaita kandatala lamaiyoo, “Endakalimi nyakamanya pupu lapae dokome Gotenya isingi mate dokonya napatami. Endakalimi kapa pao napipenge dupa pitaka Goteme kapa pao pingina” lea.
28Dokopa Pitame baa lamaiyoo, “Naimanya tatapi, pinjupi, dupa pitaka yakinatala, emba watao epelyamano” lea.
29Dopa leamopa, Jisasame lao pituu, “Nambame nyakama kiningi langilyo: Nambapa, wai pii epe dokopa, dolapo lao masetala, endakali mendeme baanya ee andapi, takange endangipi, kaiminingi pimalengepi, wane wanakupi, dupanya mende yakinatamo dokome, ee andapi, endangipi, kaiminingi pimalengepi, wane wanakupi, dupa wakao 100 lao baa nyeta. Dee endakali dokome kenda pipae longo dupa apata nyoaka katata. Dopa petala yuu enenge ipatamo dokonya, baa lete etete katenge doko nyeta.
31Salapape! Epapu endakali longo mendapu wambao kalyamino dupa, tanga maita pyatami. Maitapyao kalyamino dupa, wambatamina” Jisasame lea.
32Jisasa disaipolo dupa-pipa Jerusalema paanya, kaita peaminopa, Jisasa wambea. Dokopa disaipolo dupa walu leami kandatala, watao peamino dupa paka kaeyami. Dopa piaminopa, baame 12 disaipolo dutupa lanyepala, tenda baa-kisa pitamo dupa dokaita lamaiyoo pituu,
33“Naima Jerusalema pelyamano. Patatamanopa, akali mendeme Akalinya Ikiningi doko enge nyepala, pitisa mupapi, Mosesanya loo mana nyepae akalipi, dupa laitaka pyaapomo. Laitaka petatamopa, baa nyoo kote latala, pyao kumasalanya, akali kamalya katenge dupanya kingilyaka maitami.
34Dopa petataminopa, baa lamba lao, sopokalimi pyao, konjame pyao petala, angi pyao kumasetaminopa, baa yuu gii tepo dokonya dee sakatatana” Jisasame lea.
35Sebedi ikiningi Jemesa, Jonepi ipupala Jisasa lamaiyoo, “Mana Lenge Akali, nalimbame emba-kisa dopale mende tee latambanopa, embame latamba dopaka pipi laka lao masilyambanona” leambi.
36Jisasame dolapo lamaiyoo, “Nambame nyakambanya aki mende pyakapili lao masilyambipi?” lea.
37Dokopa dolapome yanu pyao, “Embanya tii pipae dokonya ipatenopa, nalimbanya mende embanya kingi tolae-kaita pilyepa lape, mende kingi koeya-kaita pilyepa lapena” leambi.
38Dopa leambinopa, Jisasame dolapo lamaiyoo, “Nyakambame masala naeyao lelyambino. Nambame kenda pipae salapo-lamo doko, nyakambame kapa pao setambipi? Namba kumala pelyo dopa pyoo, nyakambame kapa pao kumala patambipi?” lea.
39Dopa leamopa, dolapome yanu pyao, “Nalimbame kenda pipae dupa kapa pao setambaka. Dee nalimba emba kumateno dokonya kapa pao kumatambakana” leambi. Dopa leambinopa, Jisasame dolapo lamaiyoo, “Kini, nambame kenda pipae salapo-lamo doko, nyakambame setambiaka. Namba kumalapo dopaka pyoo, nyakamba kumatambiaka.
40Dopaka doko, nambanya kingi tolae-kaita petena lapengepi, koeya-kaita petena lapengepi, doko nambanya kalai daa. Goteme pititamina lao yapao nyiamo endakali dupa pititamina” lea.
41Dopa lelyambino lapae doko sepala, 10 disaipolo dutupame Jemesa, Jonepa imbu kaemaiyami.
42Dopa piaminopa, Jisasame disaipolo dupa epena latala dokaita lamaiyoo, “Akali kantri waka isingi, Gote tungi napingi dupame, nyakamanya endakali isingi dupa kandanya palyetala, nyakama alyasale joo katengema, doko nyakamame kandengema. Kantri dupanya akali andake dupame, nyakamanya pii watao minekena lao kandatae paengema, mana doko nyakamame kandengemaka.
43Nyakamame dopa napyepape. Nyakamanya mende akali andake joo katapuli lao masetamo dokome, dokaitanya kalai akali joo katapenge.
44Nyakamanya mende alyasale joo katapuli lao masetamo dokome, dokaitanya kendemane joo katapenge.
45Dopaka pyoo, Akalinya Ikiningi dokome baanya kalai pyekena lao naepea. Baame endakali longo dupa nisoo, kii tamao nyalanya baa tangeme kumala epeana” lea.
46Dokopa dokaita Jereko peami. Dokonya katao, Jisasapi, disaipolopi, endakali kambu andake mendepimi Jereko yakinatala peami. Pao kandeaminopa, Timiasa ikiningi Batimiasa, lenge monda doko kaitinisa muni tee lao petea.
47Baa Nasarete tange Jisasa ipao pelyamo lapae sepala, wii lao, “Dapiti Yumbange Jisasa, namba kondo kaeyapoko!” lea.
48Dopa leamopa, endakali longo dupame baa pii kaena lao, pyalanya leami. Dopa leaminopapi, baame etete puu lao wii lao, “Dapiti Yumbange, namba kondo kaeyapoko!” lea.
49Dokopa Jisasa katapala, “Baa epena lapa” lea. Dopa leamopa, endakali dupame akali lenge monda doko lamaiyoo, “Emba ipu lelyamona, paka nakaenya sakatao puu” leami.
50Dokopa baanya yonge pee ketae pingi doko lyokanya pyale latala, pupae sakatao Jisasa kateamo dokonya pea.
51Dokopa Jisasame baa tipa pyoo, “Nambame embanya aipa pyakapili lao masilipi?” lea. Akali lenge monda dokome yanu pyao, “Mana Lenge Akali, namba dee lenge tao kandatoo, embame namba nisepoko!” lea.
52Dopa leamopa, Jisasame baa lamaiyoo, “Embame namba tungi pyapino dokome, embanya lenge dolapo auu pilyamona puu” lea. Dopa lalu piamopa, baanya lenge dolapo auu peteamopa, Jisasa watao pea.
