Luka 23:3-42

³Eme Pilatozi wiocnerâ muwec: “Go Judaŋic jaŋere ŋicwofuŋ me?” Eme Jesuzi muwec: “Ine hâcne mukomec.”

⁴Mume Pilatozi taha bapa micne â ŋic guru sâko mâmâc jazarâ muwec, “No ŋic ʒirec kiŋ basakopac.”

⁵Eme jaŋe fotarierâ mujâmbâŋkehuc mumbiŋ: “E jâmbomac ŋic qafeŋ‐jopame dâŋticnezi mâreŋ‐nâŋecko haŋ bafâreekac. E Galilaia mâreŋkonecteaŋ fuŋkerâ ewareku ʒira Judaia mâreŋko ijaha eekac.”

⁶Iŋuc mupie Pilatozi wio‐jarerâ muwec, “Ŋic e Galilaia mâreŋkonec me?”

⁷Eme “ine hâcne” mupie Jesu e Herodere gie gaŋkonec, iŋuc manarâ mume Heroderao barambiŋ. Herode e dameŋ ira Jerusalem haeo juwec.

⁸Herode e Jesu honerâ bune biaŋkewec. E Jesure biŋe gâbâ manahuc honeocte boc ecne jujec. Erâ wâc mâsi moc bame honeocte aŋac focnewec.

⁹Eme Jesu dâŋ fuŋne fuŋne wiocneme okacne moc mi bâtikiecnewec.

¹⁰Ehame taha bapa micne â miti qaqazu jaŋe qoricke sanaŋkehuc domambiŋ.

¹¹Eme Herode â momorifâcne jaŋe Jesu sâckehuc ʒoraŋ ecnembiŋ. Ehuc Herodezi mume Jesu ŋicbomboŋ ŋaqi moc hecnepie hume Pilatorao mocwâc bârisiembiŋ.

¹²Eme ʒoaŋ gie bapa ira Pilato â Herode jahe ââgo epic, mârâc jaha ine kikisâ ehuc jupic.

¹³Pilato e taha bapa micne â ŋic fekicne â ŋic omane jaŋe mâmâc hefârec‐jopame fisimbiŋ.

¹⁴Eme ʒiŋuc jazawec: “Ŋoŋe ʒiŋuc muhuc ŋic kecʒi norao barâ warembieŋ: ‘E ŋic qafeŋ‐jopaekac.’ Eme noni ŋoŋere maio fuŋne‐ticne bataniŋkepe fâri tâmiric ejec.

¹⁵Herodezi iŋuc jaha erâ mume mocwâc bârisierâ bawareŋgopieŋ. Manaŋgopieŋ, kiŋticnezi hâmocte sâc mi bâfuakac,

¹⁶irec mupe momori jaŋe kâcbiŋzi qapie firuepemu.”

¹⁷Kia e hombaŋ dameŋko ŋic moc firue‐jare jujec hâcne.

¹⁸Jaŋe ine micne mic sâc owackerâ mumbiŋ, “E arictac eoc, Baraba ine firue‐nârec.”

¹⁹Baraba eki ine ŋic gâcne jaŋehec ʒika qahuc ŋuc moc qâhâmome kâpâcwâru ficko râembiŋ.

²⁰Eme Pilato e harierâ jazawec, “No Jesu firuepemu i!”

²¹Mume jaŋe hahaŋne bahuc mumbiŋ, “Maripoŋko hâmooc, maripoŋko hâmooc!”

²²Eme Pilatozi qatara‐jarehame jahec â moc eme jazawec, “Wemo sâqocne bawecte? No manape kiŋticne hâmocte sâc mi ekacte mupe kâcbiŋ sawa kirâ juzejec.”

²³Eme jaŋe fota qatarierâ micne mic ʒereŋ musereckerâ owackehuc mumbiŋ, “Maripoŋko hâmooc.” Murâ qâsifu sâko qarâ fetone fehuc kiare dâŋ bawahambiŋ.

²⁴Eme Pilatozi dâŋ mumbiŋ irec fârine fuaocte mutarawec.

²⁵Ehuc dâŋjeŋic reŋkerâ qaqafeŋte â ʒikare kâpâcwâruo râekicne ŋic e firue‐jarewec â Jesu ine qikiŋne‐jarewec.

²⁶Jaŋe Jesu baraku hatao ŋic moc bâfuambiŋ, ʒâŋene Simoŋ, Kirene hae mâreŋkonec. E gieonec wareme rorâ Jesure maripoŋ ɋawenao râepie hâporâ Jesure râpefuŋko rawec.

²⁷Erâ ŋic ŋokac guru sâkozi bâjâpembiŋ. Ehuc ŋokac jaŋe kio wâwâsic â mu mamakuc ecnembiŋ.

²⁸Epie Jesuzi fotikierâ ʒiŋuc jazawec: “Jerusalemnec ŋokac bureŋ, ŋoŋe nore mi kioniŋ. Ŋoŋe â naru motecfâc‐ŋeŋic ŋaŋacne kioniŋ.

²⁹Manaŋgopieŋ, juku dameŋ moc maickeme ʒiŋuc munʒoŋgopieŋ: ‘Oi, ŋokac hufiŋne â me sawane jaŋe iŋucne junʒapeŋ me!’

³⁰Eme dameŋ ira tiki jaŋere ʒiŋuc muniŋmu: ‘Ŋoŋe herickerâ waha ŋefac‐nâponiŋ’, â hârâc jaŋere muniŋmu, ‘Ŋoŋe fâuckerâ bârâraŋ‐nâponin’.

³¹Wiac ʒiŋucne jâc ɋâricne ecneŋgopieŋko hâmocne weniŋuc ecnezo?”

³²Eme sâqocne bapa jajahec ehec mâmâc jopaniŋte bacjopa rambiŋ.

³³Eme raku mâreŋ moc ʒâŋene Utusiec ira fisirâ Jesu maripoŋko qambiŋ, â sâqocne bapa moc ŋifec â moc ŋifec mâmâc jofambiŋ.

³⁴Eme Jesuzi numuhuc muwec, “Mamac, jaŋe wiac eŋgopieŋ i fuŋne kâuc baŋgopieŋte kiŋjeŋic behec.” Momori jaŋe ine ŋaqi‐ticnere jaŋaczia ɋâsâi qapie âke fuac‐jopame sâc rauckembiŋ.

³⁵Ŋic ine wemo afecne ijaha domahuc wiac hone‐fârembiŋ. Ehuc ŋic fekicne jaŋe sâke itic ecnehuc mumbiŋ, “Gâcne bafic‐jopaweczi e jahacne sahac bafickeoc me! E Kristo Anuture joroc jukacko iŋuc eoc me!”

³⁶Momori jaŋe iŋuc jaha mu ruruc ecnembiŋ, ehuc waiŋ opâ ʒaʒacne sicnecnehuc mumbiŋ:

³⁷Go Judaŋic jaŋere ŋicwofuŋ jukomecko sahacge ŋezickec me!”

³⁸Eme Jesure qizec botâŋko dâŋqâreŋ ʒiŋuc râembiŋ: “Ʒi Judaŋic jaŋere ŋicwofuŋ.”

³⁹Eme sâqocne bapa moczi maripoŋko domahuc bafic‐joparâ sâke kiki ecnerâ muwec, “Go iŋucnezi Kristo me? Murâ gahacne sahac batararâ nâhe mâmâc batarac‐nâfoc.”

⁴⁰Iŋuc mume âgonezi dâŋ mucnehuc muwec, “Go ʒikare biŋe mâmâc ekicnezi Anuture mi hâwicguha iŋuc mukomec?

⁴¹Nâhâc kiŋnâhecte sâcko wiac sâcne enâctekicne, ŋic kecʒizi ine sindaŋ moc mi ewec.”

⁴²Iŋuc murâ muwec, “Jesu, go Wofuŋ tâpirigehec juku fisirâ nore manasuzemec.”