Lukas 23:3-42

³Pilatus ari idok re a masani: Nanmarki en Sus akan komui? A kotin sapeng i masani: Komui me inda.

⁴Pilatus ap masani ong samero lapalap akan o pokon o: Sota dip, me i diar ren aramas men et.

⁵A irail ngidingideki i indada: A kin kapeida aramas ni a kaukawewe sili nan Iudäa, tapiada Kaliläa kokodo lel sap wet.

⁶Pilatus lao rongadar Kaliläa, ap idok, ma i aramas en Kaliläa men.

⁷A i lao rongadar, me kisan toun wein Erodes, ap kadarala i ren Erodes, me pil kotikot Ierusalem ni ran oko.

⁸Erodes lao masani Iesus, ap perenda kaualap, pwe me warai a kin anane udial i, pweki me toto a rongadar iran i, o a pil kaporoporeki, me a pan udial kilel eu sang re a.

⁹I ari kalelapok re a ni masan toto. A i sota kotin man sapeng i.

¹⁰A samero lapalap o saunkawewe kan kasinenda o impimpa i kaualap.

¹¹A Erodes o na saunpei kan mamaleki i o likauki i likau puetepuet o kapure wong i ren Pilatus.

¹²A ni ran ota Pilatus o Erodes insenemau pena, pwe mas o ira imwintiti pena.

¹³A Pilatus kapokon pena samero lapalap, o monsap, o aramas akan,

¹⁴Ap masani ong irail: Komail wa dong ia aramas men et, dene kaweid sapung aramas akan. A kilang, i kalekalelapok re a mo ’mail, ap sota dip, me i diar ren aramas men et, duen me komail katikatipiaki i.

¹⁵Erodes pil so, pwe i kadar wong i komail. A kilang, sota me a wiadar pwen kame kila i.

¹⁶Ari, i pan woki i ap lapwada.

¹⁷Pwe a pan udan lapwa dang irail meamen nin kamadip o.

¹⁸Irail karos ap likelikwir indada: Kasapokela men et o lapwa dong kit Parapas!

¹⁹Me lokidokilar nan imateng aki moromorong eu o kamela en aramas amen, me wiauier nan kanim o.

²⁰Pilatus ari men lapwada Iesus, ap pil masani ong irail.

²¹A irail likelikwir indada: Kalopuela, kalopuela i!

²²A masani ong irail kasilepak: Pwe me sued da, me a wiadar? Sota me i diaradar re a, me i en kamata kila. Ari, i pan woki i ap lapwada.

²³A irail nantiong weriwereda ngidingidiki i, me a en lopuela; o ar weriwer o en samero lapalap akan lalaudelar.

²⁴Pilatus ap inda, me ar poekipoek en pwaida,

²⁵Ap lapwada i, me lokidokilar nan imateng aki moromorong eu o kamela en aramas amen, me irail poeki, ap mueid ong irail Iesus, en wiai ong i duen insen arail.

²⁶O ni arail kalua wei i, re ap saikidi Simon men Kirene, me kodo sang nan sap o. Ir ari kidang po a lopu, pwen wala murin Iesus.

²⁷O pokon kalaimun idauenla i, o li kai me sangesang o mamaukeki i.

²⁸Iesus kotin saupei dong irail masani: Li en Ierusalem akan, ender sangesang kin ia, a sangesang kin pein komail o noumail seri kan.

²⁹Pwe kilang, ni ran oko kokodo aramas pan indinda: Meid pai li dapwan o irail me sota naitik, o didi kan, me sota kadidi!

³⁰Re ap pan pikikidi ekeker ong nana kan: Pupedi ong po at! O ong dol akan: Kadupal kit edi!

³¹Pwe ma re wiadar mepukat ong tuka maur, da me re pan wia ong tuka mongedi?

³²A pil lolap riamen iang i kalua wei kamela.

³³Irail lao lei wasa, me adaneki pondal en mong, ap kalopuela i o me lolap oko, amen ni pali maun o amen ni pali maing.

³⁴Iesus ap kotin masani: Sam (ai), Kom kotin maki ong irail, pwe irail sasa, me re wiawia. Irail ari nene pasang sapwilim a likau kan o kadoropwa kida.

³⁵Aramas me u kangkakil o monsap akan iang irail kapikapiti i indada: A kamaureda akai, i en kamaureda pein i, ma i Kristus sapwilim en Kot.

³⁶A saunpei kan pil kapikapiti i, kai ong i, ki ong i pinika,

³⁷Indada: Ma koe Nanmarki en Sus akan, en kapitila pein uk.

³⁸A pil inting eu, me intingidier ponangen i ni lokaia en Krik, o Latain, o Ipru: Iet Nanmarki en Sus akan.

³⁹A amen ren lolap oko, me langadar, lalaue i indada: Kaidin koe Kristus Kapiti sang pein uk o kit!

⁴⁰Me teio ap sapeng, kapung ong i indada: Koe pil sota masak Kot ni om iang kadeik wet?

⁴¹Pwe ata kalokolok me pung, pwe iduen ata wiawia kan, a ol men et sota wiadar meakot me sued.

⁴²Ap potoan ong Iesus: Maing, re kotin kupura ia, lao re kotida nan wei ar.