San Lucas 23:3-42

³Lëë Pilat chëb lo Jesús: —¿Pe nli lii nak xrey meñ Israel? —Misme chuwoo pchoo nii naaw —chëb Jesús.

⁴Tsigo lëë Pilat chëb lo xaa nii xñabey lo pxosy ni lo meñ kyedzy: —Nody xfalt xaa re.

⁵Per nguiedzy chëb xaa xñabey: —Con kchë xiwseedy xaa lëë xaa noyuñ meñ chop tiiy. Galilea bislo xaa, lëë na lëë xaa kwlañche Judea.

⁶Tsiñee biñ Pilat ngo, lëë Pilat kwnabtiits dyon pe xaa Galilea nak Jesús.

⁷Lëë xaa xñabey chëb nii lëëw, aan lëë Pilat pxaal Jesús lo Herodes porñee lëë Herodes xñabey Galilea aan lëë xaa so Jerusalén leñ tse go.

⁸Tsiñee lëë Herodes kon Jesús, lëë xaa ble porñee penaadle kokladzy xaa nyan xaa Jesús, porñee biñ xaa kchë nii beeñtsyey Jesús aan kokladzy xaa nyan xaa tu kyalntson.

⁹Ndaly nii kwnabtiits Herodes, per koñee kwëbty Jesús.

¹⁰Aan wi xaa nii xñabey lo pxosy ni maestre ley nii tugak xkëëkiy Jesús nche siko.

¹¹Lëë Herodes kwtsityni Jesús ksa xsoldad ni lëë xaa pkakw Jesús ladx nii chakw rey. Loxsye ngo lëë Herodes pxaal xaa lo Pilat stub.

¹²Tse go lëë Herodes ni lëë Pilat bnee buen, por klo xñee lsady xaa.

¹³Loxsye ngo lëë Pilat ptop kchë xaa nii xñabey lo pxosy, ni kchë xaa nii nak xtisy ni kchësy meñ kyedzy.

¹⁴Aan lëë xaa chëb: —Lëë do gon biidni xaa re lon, në do nii lëë xaa noyuñ meñ chop tiiy. Aan xña lo do gon lëë xaa beeñ kñelin, per nlidy ngo xaa kchë falt nii xkëëkiy do xaa.

¹⁵Nikle gaa Herodes, byeñ xaa nii nody xfalt xaa re. Por ngo lëë xaa ptikche xaa nu stub. Kol kan gaanoo nii ngody xaa falt nii tsigal kety xaa.

¹⁶Lëën ksaksi xaa, aan loxsye ngo lëë xaa klaan.

¹⁷Porñee tsiñee chak paskw, nak xmod Pilat klaa xaa tu xaa nii no skiib par kuuñ ksak xaa styoo meñ kyedzy.

¹⁸Per nguiedzy chëb meñ: —¡Beety xaa gue, aan blaa Barrabás!

¹⁹Lëë Barrabás no skiib por tu tily nii kok leñ kyedzy, ni porñee beety Barrabás tu meñ.

²⁰Kokladzy Pilat nlaa xaa Jesús. Por ngo kwnee xaa lo meñ stub.

²¹Per mastre nguieex chëb meñ: —¡Pkëë xaa lo crusy! ¡Pkëë xaa lo crusy!

²²Lëëw byon vuelt nii xñee Pilat lo meñ: —¿Per pe cos nak xfalt xaa? Karty ko xaa tu falt nii tsigal kety xaa. Lëë xaa ksaksin, aan loxsye ngo lëë xaa klaan.

²³Per loñee singootyee nguiedzy kwnee meñ nii no nii kyë Jesús lo crusy, lëë nii kokladzy meñ kok.

²⁴Lëë Pilat beeñtsyey nii kokladzy meñ.

²⁵Aan loxsye blaa xaa xaa nweety bñech nii no skiib, lëë xaa pko Jesús ña meñ.

²⁶Tsiñee lëë soldad sijkëë Jesús lo crusy, lëë xaa kwnaasy tu xaa Cirene nii lë Simoñ, nii bikche tañ, aan lëë xaa pkoy xaa xicrusy Jesús. Loxsye ngo lëë xaa bneechlo Jesús.

²⁷Ndaly meñ ni ndaly kwnaa choon ni chuptsyë sinal xitsy Jesús.

²⁸Per lëë Jesús byoogw, aan lëë xaa chëb: —Kchësy to siñee nak to kwnaa Jerusalén, koondy to por naa, sink kol koon por lëë do ni por xiñ do.

²⁹Porque sitsiñ tse nii lëë meñ këb: “Dichos kwnaa nii chilody kap mëëd ni dichos kwnaa nii pkasty mëëd.”

³⁰Ni lëë meñ këb lo kiy: “Kol kyab lady noo.” Ni lëë meñ këb lo tañ: “Kwloolan lëë noo.”

³¹Por deelñee ptsyoolaa kchë kyalnë re nii nakaa sinak tu yag mbañ, ¿xa lë nii xña kyalnë ktsyool do nii nak to sinak tu yag pidzy?

³²Wi chop xaa mal kuni xaa kyë lo crusy ksa Jesús.

³³Tsiñee lëë xaa ptsiñ laañee lë Calavera, lëë xaa pkëë Jesús lo crusy, ni lëë xaa pkëë chop xaa mal go kwi Jesús, tu xaa nëzli, stu xaa nëzpeg.

³⁴Aan lëë Jesús chëb: —Tat Tios, beeñ kchë xaa re perdón, porque nandy xaa pe cos chuuñtsyey xaa. Aan lëë soldad kwloo xab Jesús rif parñee dyon cho xaa kchalo.

³⁵Lëë meñ kukuy aan axte wi kchë xaa xñabey kwtsityni xaa xñee: —Pteelaa xaa meñ. Kyety xaa lo crusy na dyon deelñee nli nii lëë xaa nak Crist nii pxaal Dios.

³⁶Wi soldad kwtsityni Jesús. Ptee xaa viñ nyi lo Jesús,

³⁷ni chëb xaa lo xaa: —Deelñee nli lii nak xrey meñ Israel, pteelaa lii.

³⁸Ni kwë blalan tiits kik xicrusy Jesús nii xñee: “Lëë xaa re nak xrey meñ Israel.”

³⁹Wi tu xaa mal nii kwë kwi xaa kwlootsyetsy xaa chëb: —Deelñee nli nii lii nak Crist, pteelaa lii ni pteelaa lëë noo.

⁴⁰Per lëë stu xaa mal nii wi kë lo crusy kwëntseeb lo xcombañer chëb: —¿Pe xtsyeebtyoo Dios nawen? ¿Pe xyeñdyoo nayak nii lo crusyak kël?

⁴¹Lëë no busy porñee beeñ no mal ngo no tizh no xfalt no lo crusy. Per lëë xaa re, ni tu pe karty kuuñtsyey xaa.

⁴²Tsigo lëë xaa chëb lo Jesús: —Psaladzy naa tsiñee lëël sob kñabeyoo.