Lukaj 23:3-42

³Pilatuj ari idok re a majani: Nanmarki en Juj akan komui? A kotin japen i majani: Komui me inda.

⁴Pilatuj ap majani on jamero lapalap akan o pokon o: Jota dip, me i diar ren aramaj men et.

⁵A irail nidinideki i indada: A kin kapeida aramaj ni a kaukawewe jili nan Iudäa, tapiada Kaliläa kokodo lel jap wet.

⁶Pilatuj lao ronadar Kaliläa, ap idok, ma i aramaj en Kaliläa men.

⁷A i lao ronadar, me kijan toun wein Erodej, ap kadarala i ren Erodej, me pil kotikot Ierujalem ni ran oko.

⁸Erodej lao majani Iejuj, ap perenda kaualap, pwe me warai a kin anane udial i, pweki me toto a ronadar iran i, o a pil kaporoporeki, me a pan udial kilel eu jan re a.

⁹I ari kalelapok re a ni majan toto. A i jota kotin man japen i.

¹⁰A jamero lapalap o jaunkawewe kan kajinenda o impimpa i kaualap.

¹¹A Erodej o na jaunpei kan mamaleki i o likauki i likau puetepuet o kapure won i ren Pilatuj.

¹²A ni ran ota Pilatuj o Erodej injenemau pena, pwe maj o ira imwintiti pena.

¹³A Pilatuj kapokon pena jamero lapalap, o monjap, o aramaj akan,

¹⁴Ap majani on irail: Komail wa don ia aramaj men et, dene kaweid japun aramaj akan. A kilan, i kalekalelapok re a mo ’mail, ap jota dip, me i diar ren aramaj men et, duen me komail katikatipiaki i.

¹⁵Erodej pil jo, pwe i kadar won i komail. A kilan, jota me a wiadar pwen kame kila i.

¹⁶Ari, i pan woki i ap lapwada.

¹⁷Pwe a pan udan lapwa dan irail meamen nin kamadip o.

¹⁸Irail karoj ap likelikwir indada: Kajapokela men et o lapwa don kit Parapaj!

¹⁹Me lokidokilar nan imaten aki moromoron eu o kamela en aramaj amen, me wiauier nan kanim o.

²⁰Pilatuj ari men lapwada Iejuj, ap pil majani on irail.

²¹A irail likelikwir indada: Kalopuela, kalopuela i!

²²A majani on irail kajilepak: Pwe me jued da, me a wiadar? Jota me i diaradar re a, me i en kamata kila. Ari, i pan woki i ap lapwada.

²³A irail nantion weriwereda nidinidiki i, me a en lopuela; o ar weriwer o en jamero lapalap akan lalaudelar.

²⁴Pilatuj ap inda, me ar poekipoek en pwaida,

²⁵Ap lapwada i, me lokidokilar nan imaten aki moromoron eu o kamela en aramaj amen, me irail poeki, ap mueid on irail Iejuj, en wiai on i duen injen arail.

²⁶O ni arail kalua wei i, re ap jaikidi Jimon men Kirene, me kodo jan nan jap o. Ir ari kidan po a lopu, pwen wala murin Iejuj.

²⁷O pokon kalaimun idauenla i, o li kai me janejan o mamaukeki i.

²⁸Iejuj kotin jaupei don irail majani: Li en Ierujalem akan, ender janejan kin ia, a janejan kin pein komail o noumail jeri kan.

²⁹Pwe kilan, ni ran oko kokodo aramaj pan indinda: Meid pai li dapwan o irail me jota naitik, o didi kan, me jota kadidi!

³⁰Re ap pan pikikidi ekeker on nana kan: Pupedi on po at! O on dol akan: Kadupal kit edi!

³¹Pwe ma re wiadar mepukat on tuka maur, da me re pan wia on tuka monedi?

³²A pil lolap riamen ian i kalua wei kamela.

³³Irail lao lei waja, me adaneki pondal en mon, ap kalopuela i o me lolap oko, amen ni pali maun o amen ni pali main.

³⁴Iejuj ap kotin majani: Jam (ai), Kom kotin maki on irail, pwe irail jaja, me re wiawia. Irail ari nene pajan japwilim a likau kan o kadoropwa kida.

³⁵Aramaj me u kankakil o monjap akan ian irail kapikapiti i indada: A kamaureda akai, i en kamaureda pein i, ma i Krijtuj japwilim en Kot.

³⁶A jaunpei kan pil kapikapiti i, kai on i, ki on i pinika,

³⁷Indada: Ma koe Nanmarki en Juj akan, en kapitila pein uk.

³⁸A pil intin eu, me intinidier ponanen i ni lokaia en Krik, o Latain, o Ipru: Iet Nanmarki en Juj akan.

³⁹A amen ren lolap oko, me lanadar, lalaue i indada: Kaidin koe Krijtuj Kapiti jan pein uk o kit!

⁴⁰Me teio ap japen, kapun on i indada: Koe pil jota majak Kot ni om ian kadeik wet?

⁴¹Pwe ata kalokolok me pun, pwe iduen ata wiawia kan, a ol men et jota wiadar meakot me jued.

⁴²Ap potoan on Iejuj: Main, re kotin kupura ia, lao re kotida nan wei ar.