San Lujc 23:3-42

³Dxel gunabdiidx Pilato lojman rëbaman: ―¿Lüjn na̱j xrey ree bén Israel ya? Badxiꞌ Jesús laan, rëbaman: ―Waliquil, najcan.

⁴Dxel rëb Pilato loj ree bixhioz rniabee ree bixhioz në loj gra ree bén rigaꞌ yagaj: ―Achet xfalt xin guie radxejlan.

⁵Per laa reeman naguiejnczi rüjn reeman, rëb reeman: ―Cusquieex bejn ree guidib niz Judea con ree ni rulüüx laa reeman. Guzulojx niz Galilea abiꞌ yan cayüjnx zian niz guie.

⁶Chi biguiejn Pilato bazaꞌt reeman Galilea, gunabdiidxaman loj reeman bal niz Galilea na̱j ladx Jesús.

⁷Abiꞌ chi rëb reeman guial najman bén Galilea, guxhaalaman laaman loj Herodes bén rniabee Galilea, guial lën ree dxej guin në Herodes zaꞌ Jerusalén.

⁸Chi baguiaa Herodes Jesús dád babaaman guial diizd gocli rënman guguiaaman laaman guial bacaagdiajgaman ruzaꞌt ree bejn laaman, abiꞌ rbëzaman guguiaaman güünman tijb milagr.

⁹Zien ree ni gunabdiidxaman lojman, per Jesús achetczi badxiꞌman.

¹⁰Në ree bixhioz rniabee ree bixhioz zaꞌ yagaj con ree mextr rajc ley, ad rucwëëzt rutediaꞌ reeman laaman.

¹¹Dxel Herodes con ree xsuldadaman xhiernarajc beennë reeman laaman, bazeꞌ reeman laaman, bascajcw reeman laaman lajd zagdxe lasaꞌ ni rajcw ree rey. Zianz baxhaal Herodes guin laaman loj Pilato zatijb.

¹²Abiꞌ dxejzii bazuloj baneenë Herodes Pilato zagdxe, din gocli rdxeꞌch lasaꞌ reeman.

¹³Dxel bachajg Pilato lasaꞌ ree bixhioz rniabee ree bixhioz con ree guxtis, con ree bén luguiedx guin,

¹⁴abiꞌ rëbaman loj reeman: ―Bidnëdi xin guie nadi cusquieex bejn ree. Per niz lojdi ma gunabdiidxan lojx abiꞌ achet xfaltix radxejlan ziꞌc nadi.

¹⁵Niꞌqui Herodes ad badxejlt xfaltix, zeel baxhaalaman laax lon zatijb. Ma baguiaalojdi achet ni mal beenx din guiëtix.

¹⁶Yan, gudëdan laax casti dxel guslaan laax.

¹⁷Lën ree dxej lanij guin ruslaa Pilato tijb bén yuꞌ ladxguiib ziꞌc goc xcostumbr reeman.

¹⁸Per graczi reeman guzuloj rbixdiaj, rëb reeman: ―¡Bagüjt xin guin! ¡Baslaa Barrabás!

¹⁹Badxeꞌ reeman Barrabás guin ladxguiib guial beenman tijb wadijl Jerusalén, guial guzujman contr ree suldad rom, në guial bagüjtaman bejn.

²⁰Guneenë Pilato laa reeman zatijb guial guyënman nuslaaman Jesús,

²¹per laa reeman gurixdiaj reeman mazri rejs, rëb reeman: ―¡Bacaax loj crüjz! ¡Bacaax loj crüjz!

²²Ni bayon volt rëb Pilato loj reeman: ―¿Xhieza ni mal been xin guin? Achet xfaltix radxejlan din guiëtix. Gudëdan laax casti dxel guslaan laax.

²³Per laa reeman mazri rbixdiaj reeman, rëb reeman loj Pilato din gucaaman laaman loj crüjz. Abiꞌ guial tant rbixdiaj reeman con ree bixhioz rniabee ree bixhioz, been reeman gan gojc ziꞌc rën reeman.

²⁴Dxel cwëjb Pilato beenman ziꞌc rën reeman.

²⁵Abiꞌ baslaaman Barrabás bén guyu ladxguiib por wadijl në guial bagüjtaman bejn, guiáad Jesús bayüman laaman loj reeman persi beennë reeman laaman ziꞌctzi rën reeman.

²⁶Chi zinë reeman Jesús din gucaa reeman laaman loj crüjz, gunaaz reeman tijb bén za Cirene laaman Simón. Ziaadaman bazaman dajn, gunabee reeman laaman güüman xcrüjz Jesús din chinalaman laaman.

²⁷Zien daꞌt bejn zinal laaman, abiꞌ zien ree béngunaa roon rbixdiaj guial raya reeman laaman.

²⁸Per baguiaa Jesús loj reeman abiꞌ rëbaman: ―Béngunaa Jerusalén ad roondi por naj, gol biin por lëjt gajc në por xiꞌndi.

²⁹Din zadxin dxej guiëbidi: “Xiquilbaa ree béngunaa ad rajct ru xiꞌn, në ree béngunaa ad gojlt xiꞌn con ree béngunaa ad caꞌt bindobëz.”

³⁰Dxel suloj guiëb ree bejn loj ree guiaꞌ: “Gol guxaꞌt du guijcan”, guiáad loj ree lom guiëb reeman: “Gol baquieꞌch dunujn.”

³¹Yan, nacli naj rüjnnë reeman zian, diidxgui lëjt, wed xhieczinin güünnë reeman lëjt.

³²Abiꞌ në tioꞌp ree xingubaan zinë reeman din tia reex loj crüjz con Jesús.

³³Chi bidxin reeman lod la Calaver, bacaa reeman Jesús loj crüjz, con grop ree xingubaan guin: tijbix cwa ladbee zatijbix cwa ladruvejs.

³⁴Abiꞌ chi cucaa reeman Jesús loj crüjz, rëbaman: ―Dad, been reeman perdon, din ad ragbeet reeman xhienin rüjn reeman. Dxel gudxijt ree suldad suert guijc xabaman din yalaꞌ reex laan.

³⁵Zien ree bejn rigaꞌ yagaj cuguiaa reeman, abiꞌ xt ree guxtis ruzeꞌ laaman, rëb reeman: ―Baslaax ben ren ree, yan guslaa laagajquix bal walix laax na̱j Cristo.

³⁶Në ree xin suldad ruzeꞌ laaman, rbig reex rudëëd reex vinagr guiëꞌman,

³⁷rëb reex lojman: ―Bal lüj na̱j xrey ree bén Israel, baslaa lüj gajc.

³⁸Abiꞌ guijc crüjz guin bacaa reex lëjtr con diidx grieg, diidx latin, në diidx hebreo, rëban: “Bén guie na̱j xrey ree bén Israel.”

³⁹Tijb xingubaan ni ca loj crüjz guin guneex diidxguijdx loj Jesús, rëbix: ―Bal lüj na̱j Cristo, baslaa lüj gajc, baslaa tëë dunujn.

⁴⁰Per zatijbix gudilë xcompniarix, rëbix lojx: ―¿Staczi ad rdxebtil Dios ya majsi lasaꞌgajc casti guin cadëdil?

⁴¹Dunuj rayalczi cayzaagdiaj din zian caydijx ni baguieen. Per bén guie achetczi ni mal wayüjnman.

⁴²Dxel rëbix loj Jesús: ―Basaaladx naj chi ma canabeel.