LUUKA 23:3-42

³Dhala Bilaaṯus ki doṯ a’di gwo mo ki: Ki /e de ntana Maliḵ gi ’Kwani Yahuuda/ mo de? Dhali a’di ki thoḵ a’di gwo mo ki: Ona /e wakan si’da/ mo be.

⁴Dhala Bilaaṯus ki o igasiis kun can gwo mo dhala waambuhany ’kwani mo ki: Aha/ dinaki gam miiŋ kamu/ e wathi/ yansan jin ṯẖutha a’di mii mo be.

⁵Hili uni ’cece’bki gwo mo mmo/o ki: A’di cuki ’kwani is mo mmoṯor gwo ki tur mo e Bampa/ Yahuudiyya ’baar mo ’peni Pany Jaliil itagi mahansan mo be.

⁶Ka Bilaaṯus ciḵki gwo yan mo tani a’di doṯki gwo mo waḵki/ a’di ta wathi/ gi Pany Jaliil mo.

⁷Dhali ki a’di da/arki gwo mo ki a’di cila mo ma Hirodus gi moshirr mo tani a’di hashki a’di ka Hirodus mo, a’di jin di’d ki is piti e Pa Urushaliim ki mo c̱aan mo be.

⁸Ka Hirodus p̱arki’da Yesus e mo tani a’di ’kunya bwa kagahara mo haali/ a’di dina gwo ibwa mo isa gush mo mmop̱ar a’di e mo, haali/ a’di ciḵki gwo mo gom a’di mo dhali a’di ṯoshki p̱ar miimera kamu/ e mo jin miikina a’di mo.

⁹Wakan a’di doṯki a’di gwon tiya ka ris mo, hili a’di diki ’de’k ’twaŋ kamu/ mo be.

¹⁰Dhali igasiis kun can mo dhali iman’kwar to mo doshkin ki ’dishe/ mo mmo’cwara ’cwar mo mmoyer a’di is ki gway mo be.

¹¹Dhala Hirodus nyaḵka askar piti mo tani uni kar a’di ki mon’the is mo dhali mmomii a’di ka maḵ mo. Yan’ko’d uni ki hi’th a’di burrinye/ jin c̱a’bki ’be’d ’be’di is mo dhali a’di ki hash a’di ka nyaŋ’ko’d eya Bilaaṯus mo be.

¹²Dhala Hirodus dhala Bilaaṯus uni warkin ka mugu ka rem ’kup̱ mo ka teeŋ gana/ c̱aan mo haali/ ki mii yansan nṯwa/a/ mo tani uni ta ’kup̱ ka rem ’kup̱ mo be.

¹³Yan’ko’d Bilaaṯus ki tul igasiis kun can is mo dhali ’kwani kun tana ’kaŋ’kup̱ pa mo dhali ’kwani mmonṯal ’de/ mo be.

¹⁴Dhali a’di ki o uni gwo mo ki: Um suski wathi/ yansan i aha/ mo me’d wathin ’de/ jin o gwo ap̱o/ ’kwani mo. Dhali ŋ’ko’d aha/ palkina a’di mo mbwambori um mo. Dhali hili mo mo ma aha/ dinaki gam wathi/ yansan ’peni ton ṯal ’deŋ kamu/ jin ṯẖutha a’di mii mo jin ona um a’di gwo ap̱o/ mo.

¹⁵Walla Hirodus si’da/ haali/ a’di hashki a’di ka nyaŋ’ko’d e ana mo. Dhali hili mo mo ma. Toŋ kamu/ yisa di’da jin ha me’d ki mowu mo jin miikina a’di mo be.

¹⁶Dhali gom mii gi wakan mo tani aha/ mina c̱i a’di monṯo’k mo dhali ’cuḵ a’di mo be.

¹⁷Dhali a’di midi mii ta mii mo jin mina a’di mii ’cuḵ wathin ’de/ gom uni ka cim gun ’boron mo be.

¹⁸Hili uni ’baar mo cuukin ki nyanye/ mo mmonṯal ’de/ mo ki: Ka bor ’deŋ gana/ e wathi/ yansan mo, dhali ’cuḵi amana Baraabas mo –

¹⁹wathi/ jin biṯkunu mo eya sijin mo gom gwo gi onuwa ’cesh e ’peŋkuman bampa/ mo dhali haali/ a’di ta’da man’kosha mee mo.

²⁰Dhala Bilaaṯus ṯorki uni gwo mo doḵ/e mmodina gwo a’di i bwa mo mmo’cuḵa Yesus mo be.

²¹Hili uni cuukin ki dhan ’twa/ kun caaca mo ki: ’Koshi a’di ki cwany’ciṯẖan dhul mo ma. ’Koshi a’di ki cwany’ciṯẖan dhul mo ma.

²²Me’di kwara a’di ki o uni gwo mo ki: Goma tinta? tonthus wakata imiikina a’di mo? Aha/ dinaki gam miiŋ kamu/ jin ṯẖutha a’di mii mo jin midi ha me’d ki mowu mo. Gom mii gi wakan mo tani aha/ mina c̱i a’di monṯo’k mo dhali ’cuḵ a’di mo be.

²³Hili uni ’kokin mo mmo’cece’b gwo mo mmodoṯ gwo ki cuuwa/ kun caaca mo ki a’di minu ’taki ’kosh ki cwany’ciṯẖan dhul mo. Dhali ’twam buni p̱iki gwo jip̱i/ mo be.

²⁴Wakan Bilaaṯus a’di dhalki gwon dwall me’d mo ki gwom buni kun doṯa uni minu mii mo be.

²⁵A’di ’cuḵki uni wathi/ jin biṯu eya sijin mo gom gwo gi onuwa ’cesh mo dhali goma mee jin ’kosha a’di mo, a’di jin doṯkina uni mo, hila Yesus a’di c̱ikunu uni mo gom gwo gi bwam buni mo be.

²⁶Dhali me’d jin suskina uni a’di i bway mo tani uni bu’thki wathin ’de/ jin ta’da Simaan gi Paŋ Kerawaan mo, a’di jin yayi’d ’peni pa mo dhali uni ki ’thiḵ a’di cwany’ciṯẖan dhul piti m’ba/ mo mmoḵal a’di ŋ’ko’da Yesus mo be.

²⁷Dhali adhana waambuhany ’kwani baṯẖki a’di isho’k mo dhali ki up̱ ilu/ mo uni gun miikina c̱inthar mo dhali ko kagahara gom a’di mo be.

²⁸Hila Yesus ṯu’kki ’ban mo dhali o uni gwo mo ki: I’bwa/ gi ’Kwani gi Pa Urushaliim, dhalku/ ki ko gom aha/ mo ma, hili koyi gom is bum mo dhali gom uc̱im bum mo.

²⁹Haali/ hili mo mo ma, atee mini p̱u’du/ mo jin mina uni o gwo mo ki: Mom’bor mii gom uni gun tana burum mo dhali bwa kun molona dho’th ki sule/ mo dhala bor kun ’koki c̱iya ko mmop̱i ki sule/ mo.

³⁰Dhali yan’ko’d uni mini ṯel mii ’pen mo mmo/o wosha turga/ gwo mo ki: Biṯi ap̱o/ am mo ma, dhali e wosh kun boc̱a/ she/ ki: Kumi aman is mo ma.

³¹Haali/ waḵki/ uni mii to yansan mo ki cwa yathaya’th mo tani atinta midi di mo ŋ’ko’d ki a’di midi ḵu’th mo?

³²’Kwanin tiya ’koni su/ si’da/ uni kun ṯẖu’thki mii mo, uni suskunu ka pije/ mo mmo’kosh jwa mo nyaḵki a’di mo be.

³³Dhali ki uni p̱u’dkin mo e mo jin yuḵu ka Simaŋ ’Kup̱ mo tani uni ki ’kosh a’di ki cwany’ciṯẖan dhul mmun mo. Dhali uni gun ṯẖuthi mii mo, jan ṯal ’de/ ki ’bana bim poros piti mo dhali jan ṯal ’de/ ki ’bana biny cam piti mo be.

³⁴Dhala Yesus ki o gwo mo ki: Ababa, dhalki uni miinthus buni ’pen mo ma, haali/ uni ’koki mish to jin miina uni mo be. Dhali uni ṯa’kki to mo mmoḵwa/ burrinyem piti bwa mo.

³⁵Dhali ’kwani doshkin ki ’dishe/ mo mmohil mo mo, hili ’kwani kun tana ’kaŋ’kup̱ pa mo waḵki a’di mo mmo/o gwo mo ki: A’di woṯẖki kun tiya mo tani dhalki a’di woṯẖ is pitiŋ gana/ mo ma, waḵki/ a’di ta’da Ḵrisṯẖos ’peni Arumgimis mo, a’di jin ta jim pitin ’de/ jin kwanykunu mo.

³⁶Dhali i/askar si’da/ mii a’di ka maḵ mo. Uni iikin mo dhali c̱i a’di tom’pac̱a’d mo,

³⁷dhali mmo/o gwo mo ki: Waḵki/ /e tana Maliḵ gi ’Kwani Yahuuda/ mo tani woṯẖi/ is pini mo ma.

³⁸Dhali gwo si’da/ ’kwarkunu mo ŋ’kup̱i a’di mo ki: Yansan ta’da Maliḵ gi ’Kwani Yahuuda/ mo be.

³⁹Dhali jan ’de/ jin ṯẖuthi mii mo jin shirkunu ap̱o/ cwany’ciṯẖan dhul mo tani o a’di gwo mo mmo/o ki: Dina /e ki ta Ḵrisṯẖos ’taa? Woṯẖi is pini mo ma dhali aman mo.

⁴⁰Hili jaŋ kamu/ ḵucurki a’di ki gwo mo mmo/o gwo mo ki: Dina /e ki ḵo/ka Arumgimis mo ’taa? Haali/ /e dikin ’ko’di me’d gi gwon dwall gi miiwaḵ jin nyaḵa’d mo.

⁴¹Dhali ana ka jiŋ gana/ miinu ka ḵar/e kan mo. Haali/ ana bu’thkina a’di jin minu mii c̱i ana mo gom mii gun miikina ana mo, hili wathi/ yansan diki ṯẖu’th toŋ kamu/ mii mo be.

⁴²Dhali a’di ki o gwo mo ki: Yesus, kayi aha/ e mo ma, ki /e mini p̱u’dku/ mo e mom’bi’th gi bampam pini mo.