San Lucas 23:3-42

³Suasmesa Pilatone ussa mɨmara: —¿Nune Judío awawa katsa mikwa kish? Usne ussa sɨnkara: —Nuin sun kizta. Watcha i.

⁴Pilatone katsa pariyaruzakas, wan awaruzakas kaiznara: —Nane an ampura chinkas kwail kitchi wanmaltau.

⁵Uspane an tɨnta kaizamɨzta: —Usne au awaruza pilchapuzninnamtu. Usne wan Judea sura uztuza kamtanamtu. Galilea suras kamtanamɨzta, an pɨpulurakima, kizara.

⁶Sun mɨrawane, Pilatone ¿Usne Galilea suras ki? kiz mɨmara.

⁷Suasne usne Jesús Galilea suras, Herodes ɨnintu suras, tas azi kamta. An payura Herodes Jerusalén pɨpulura tuasmin, Pilatone Jesústa Herodes tukin ɨninta.

⁸Jesústa izkane, Herodesne wat kulta. Ñamin us akwa mɨra akwa, Herodesne ussa akkwan payukima izshira, chiwazha iztasparɨt kal kinpa.

⁹Suasmesa kwisha akkwan piji mɨmarakas, Jesúsne ussa sɨnkarachi.

¹⁰Katsa pariyaruzkas Moisés pɨnkɨhta parɨt aizpa kamtamtuzkas kashara kunat kit ussa tɨnta kwail kirɨt kizamtuazi.

¹¹Suasne Herodesne paiña suldarukasa ussa kwail kiat kit ussa ishanara. Ussa kwisha watsal kwakshamkasa kwanintawane, Herodesne ussa ishan kit Jesústa Pilatorakima mamasa ɨninta.

¹²Sun payura Herodeskas Pilatokas izmuruz nampailta. An ñamin uspane aliz.

¹³Suasne Pilatone katsa pariyaruzakas Judío awaruza ɨnintuzakas Judío awaruzakas akwanat kit

¹⁴kaiznara: —Une an ampura nawa karaara. Une an ampu awaruza pilchapuzninnamtu kizamtu. Ussa u iztukin kwisha mɨmarawane, nane an ampu chinkas kwail kitchi wanmaltau. U kaizara aizpa nilchi.

¹⁵Herodeskas an ampu chinkas kwail kitchi wanmalta. Usne ussa aumɨza kailninta. Iztain. Kwail kitchi akwa, nane ussa piantasachish.

¹⁶Katmizna ussa chɨhtachasmin, nane ussa aya tɨtkasa ilninnash.

¹⁷Pascua pishta iztuasmin, Herodesne maza kajchi sɨptɨtmikasha puznintawa.

¹⁸Wan awane tɨnta ka kwianñara: —An ampura pizninti, ussa piantanapa. Barrabásta kajchiras puzninti, kizara.

¹⁹An ñamin Barrabásne awara piantat kit pɨpulu awaruza aizapninnara. Katmizna uspane ussa pizat kit kajchira sɨppara.

²⁰Jesústa chɨhtninshimtu akwa, Pilatone mamasa usparuza kwinta kinara.

²¹Uspane mamasa tɨnta kwian kit kaizara: —Ussa piantari. Kurishta irukasa pat pian piantari, kizara.

²²Kutña pijikima usparuza kaiznara: —¿Chikishma? ¿Chi kwail kirɨt usne? Nane an ampu chinkas kwail kitchi wanmaltau. Katmizna ussa aya tɨtkasain ilnintawane, ussa chɨhnash.

²³Uspane an akkwan tɨnta kwianat kit paikuara, ussa kurishta irukasa pat pian piantana. Uspa kaizara akwa, pariya ɨnintuz kaizara akwa, Pilatone uspa pashiat aizpa mɨnara.

²⁴Katmizna Pilatone uspa paikwat aizpa kira.

²⁵Suasne Pilatone kajchira sɨptɨtmikasha puzninta. Usne awaruza aizapninnat kit awara piantarɨt. Judío awa paikuara akwa, Herodesne usparuza mɨnara, uspa pashit aizpa kiana. Judío awa Jesústa piantashiamtu akwa, usne Jesústa usparuza chɨhkanara.

²⁶Roma suldaruruz ussa kurishta patpiantana tain mɨlamtuasmin, Simónne Cirene nan suras piannamtuazi. Uspane Simónta kurish munninat kit Jesústa kwizpa kanpaninñara.

²⁷Kwisha akkwan awane ussa kanpaara. Akkwan ashampane kwizpa kanpaat kit kwisha tayalat kit us akwa tɨnta azaara.

²⁸Jesúsne usparuza kɨzpu puij iz kit usparuza kaiznara: —U ashampa Jerusalén pɨpulura uztuzne, mɨzhain. Nawa azman. U akwakas u pashpa akwakas aztain.

²⁹Mɨrain. Mamaz payura awane ka kizanazi: “Pashpa mɨltuchimikakas pɨja wachimikakas chitchu kwimchimikakas an wat kulanazi.”

³⁰Suasmesa uspane ɨnkaltakas puttarakas kaizamɨznazi: “Au ɨsalta taiztain. Aumɨza kularain.”

³¹Mɨrain. Uspane uspa pashimtu aizpa nawa kiamɨznazi. Kwiztane uspane uruza an kwail kiamɨznazi.

³²An paas kwail kimtuza tain ɨninara, uskasa piantanapa.

³³Ɨamtuasmin, ɨzara piannaara. An ɨzane awa kɨzpu sɨhkana iztɨt. Suane uspane ussa kurishta irukasa patpiana panaara. Paas kwail kimtuzakas karaara. Uspane mazarakas paiña numal kurishta patpiana panaara. Mamaztakas paiña kwiyamal kurishta irukasa patpiana panaara.

³⁴Suasmesa ussa kurishta pat piantawane, Jesúsne kaizta: —Ap Taitta, mɨzha. Uspa kwail kiarɨt aizpa wat kultain, uspa chiwazha kiamtu aizpa pianchi akwa, kizta. Suldaruruzne ainki ukkasa salara, paiña kwakshamkas mamaz pĩnkas kana kinpa.

³⁵Awaruzne kasha kunat kit wan izara. Katsa mikwaruzkas ussa ishanat kit kaizara: —Usne mamaztuza watsat mɨlnara, uznanapa. Usne usmin uzna kiwainsachi. Dios ussa kiwaintuchi akwa, usne Diospa nɨrɨtmika chi, Diospa narɨtmika chi, kizara.

³⁶Suldaruruzkas ussa ishanat kit ussa tish vino kwinna ɨara.

³⁷Uspane ussa kaizara: —Nu Judío awawa katsa mikwane, nuin watsat mɨlti.

³⁸Paiña kɨzpu ɨsalkin ainki tapɨlakin ka paarɨt: ANNE JUDÍO AWAWA KATSA MIKWA I.

³⁹Maza kwail kurishta irukasa patpiantɨtmikakas ussa kwisha kwail ka kizta: —¿Nune Dios nɨrɨtmika kish? Nuin watsat mɨlti. Aumɨzakas watsaat mɨlchain, kizta.

⁴⁰Mamazne ussa pilchapuz kit kizta: —Sunkana kizmun. Une Diosta ishkwatpa. Nukas, nakas, uskas kawarain naizpuspas, inakima.

⁴¹Au paasne naizpuspas, au kwail kiarɨt akwa. An ampune chinkas kwail kit chi.

⁴²Usne ma pitchin Jesústa kaizta: —Jesús. Nu amtu payura, wanta tɨnta ɨninnakane, nawa nɨjkulcha, kizta.