Ruk 23:3-42

³Pairat singui ane, “Ge Ju igiyawa kin mumawa?” Iesu garawa wane, “Ge natawa vege, ne meme di.”

⁴Pairat me tobiyag pirisi koukawa ge iyayapan gumbo dirum wane, “Ne yauna, apan mame danave kukaeba da onan.”

⁵Megara mu gae yusipamit diyag waya, “Apan mame toyau meuma at Judia undag iyayapan danowa undag aune. Gariri apa amatog on mame uwane.”

⁶Pairat mame anonewa singui ane, “Apan mame Gariri apan?”

⁷Me yaug anone me Erod yusiwa ankwatave wakenewa. Sira tate me baraune Erod oya aine. Kuiyawa kum me kumiwa apa Erod Jerusarem apa wakene.

⁸Erod Iesu yaunewa degadega kokavit ane. Kuiyawa me gaiyawa anone, kum yobutatae me imive me yautan anoivi, sira me irayauyau meuma yautan anoivi.

⁹Meoya me gumbe singui obiren ane, megara Iesu garawa den wane.

¹⁰Pirisi koukawa ge Gwangwan toewanewan igiyawa mu yokek gae kukaeba me gumbe yusipamit diyag veme.

¹¹Meve Erod ge mut igiyawa meumawa me iviwa aug yan barauya iyagau waniya. Meve wape oraimina en waniya barauya Pairat oya taig aine.

¹²Oiyat me, Erod ge Pairat yaire aya. Namu mu anavi eme.

¹³Pairat me pirisi koukawa, namuyoiyoi igiyawa ge iyayapan auwane mu onamiya.

¹⁴Mu dirumne, “Ye apan mame nenan aug onekke sira aib wayana. Apan mame namuyoiyoi gwambe aivi. Ne gare ye namuyap epinawa yobana, megara me kukaeba meuma kuiyawa da den yaug anona.

¹⁵Erod me meib. Me sira me baraune nunan onne. Yauya, me kukaeba da den ane bo atan oya.

¹⁶Meoya ne murap gumbe tog meve kwetna aipe.”

¹⁷(-)

¹⁸Iyayapan undagit nouwa desiromit kwaruwaya, “Apan mame toengura, ge Barabas aropa dauwag nunan ompe.”

¹⁹(Barabas me nog aig wakene, kuiyawa at kokawa danave me mut amatone sira iyayapan gudne oya.)

²⁰Pairat imive Iesu yankwepe aipe, meoya mu gumbo sira wane.

²¹Megara mu kwaruwaya, “Me korosi gumbe toya! Korosi gumbe toya!”

²²Sira me mu gumbo koni duwamdesiyawa wane, “Megara me kukaeba divi da ane? Ne kukaeba meuma bo totanwa me ne da den yauna. Meoya ne aug murap gumbe totna meve kwetna aipe.”

²³Megara mu kwat wansin ande veme. Mu imuwo me yoma korosi gumbe tope botope. Mu kwat mumawa natawa matadne.

²⁴Meoya Pairat iyayapan noiwa aune sira yoig wane mu imuwo gumbe ape.

²⁵Sira Pairat Barabas kwene aine, mu imuwo gumbe. Apan me mut amatone sira iyayapan gudne oya nog aigne wakene. Pairat Iesu mu nanuwo baraune sira mu Iesu gumbe anoano muma gumbe aya.

²⁶Mu me auwag amomewa, Sairin apan iviwa Saimon me at meuma apa oniviwa mu auya. Mu yoma korosi oieve baraug diyag waya. Me aug Iesu amave yoine.

²⁷Iyayapan obiren Iesu amave amiya, sira vesin obiren gaibu danadawai auwag it menan wag amome.

²⁸Megara Iesu munan tobiyag wane, “Jerusarem gwaitawaiwa, it nenan den waya, go yembo yenan ge ud yeuma oya iruwaya.

²⁹Kuiyawa, yauya, kum me onivi iyayapan aib wapewa, ‘Agara vesin, danowo ud onanwa, sira ud am den munemewa, mu gumbo waribiya wakeigimpe!’

³⁰Kum me kumiwa, iyayapan tui gumbe amatog wape, ‘Egunup aiga,’ sira tui kusikaren gumbe wape, ‘Um nuna.’

³¹Mu yoma kaninga gumbe dividivi mame apewa, yoma toyainewa gumbe aninin ape?”

³²Kukaeba igiyawa duwam gaibu me gaibu bo atan oya tam amiya.

³³Mu amog at iviwa Kuiyamarednawa vemewa uwaya. Meve Iesu yoma korosi gumbe toya sira apan kukaeba duwam gaibu guriya. Dawa naniyutanwa dawa naniketaiwa apa.

³⁴Iesu wane, “Maman, kukaeba muma anog yankwema. Mu den yawag anoya mu divi eme.” Mu kae kusida aya wape meuma keptetan oya.

³⁵Iyayapan yokeg yangureme. Namuyoiyoi igiyawa iyagau me gumbe waya, “Me iyayapan upeba waita munne. Apan mame God wagomiyanewa Keriso ipewa, me membovit warinampe.”

³⁶Mut igiyawa uwake iyagau me gumbe aya, sira omoke wain sisipama waniya.

³⁷Mu waya, “Ge Ju igiyawa kin mumawa ipewa, ge gembovit inaigita.”

³⁸Me egave gae mame teya: MAME JU IGIYAWA KIN MUMAWA.

³⁹Apan kukaeba desirom yoma korosi gumbe toyawa Iesu gumbe iyagau wane, “Ge Keriso ipewa, ge gembovit ge nu gaibu warinam nuna.”

⁴⁰Go apan kukaeba dawa garawa wane aib diengudne. “Ge God aeba den ege? Ge ibnawa gina desirom auege.

⁴¹Nu ibnawa nuniyawa me bainda. Kuiyawa garawa me atuwa nu aviete. Go apan mame kukaeba da den ane.”

⁴²Meve kukaeba abnawa da dig wane, “Iesu, toimu geuma danave unig Ayapan awa kumiwa apa, nenan imug anoa.”