Lukasi 23:3-42

³Pilato nakamuuza, “Hegwe kwa mndewa wa wayahudi?” Yesu kedichila nakamlonjela, “Hegwe kulonga.”

⁴Pilato nakawalonjela watambika wakulu na wala wanhu wamemile, “Sichiwene chinhu cha kumtagusa munhu yuno.”

⁵Ila Hewo wang'ang'anila walonga, “Nakanguwasonjeleza wanhu vibi wetowe na undewa wa Loma kwa ulanguso wa udesi muli isi yeng'ha ya Yudeya, kaluchila Galilaya na sambi ka hano.”

⁶Pilato loyahuliche ago, nakawauza, “Munhu ayu mwenyeng'haye wa Galilaya?”

⁷Loyavizelele Yesu nayali hasi ha ulongozi wa mndewa Helodi, kamgala kwa Helodi, mhela awo nayali Yelusalemu.

⁸Helodi loyamuwene Yesu kazangusechelela ng'hatu. Kwa vila nakagana kumona kulawa mazuwa menji. Nakahulika mbuli za heye, na kagana yamone yodita vinduzanduza.

⁹Lelo kamuuza Yesu mbuli nyinji kwa mhela uhejile, ila Yesu hedichile ne chinhu.

¹⁰Watambika wakulu na walangusa wa malajizo ga Musa, wema wamlonjeleza Yesu kwa lupichi.

¹¹Helodi hamwe na wala walingulolela wazangumbasa soni Yesu na kumbeza, wolawa wamvalisa nguwo ya chiundewa, wamhilula kwa Pilato.

¹²Helodi na Pilato, wala aho katali wali wehilwe, kulawa zuwa lilila wazangigana.

¹³Pilato nakawachema watambika wakulu na vilongozi na wanhu.

¹⁴Baho nakawalonjela, “Mmigala munhu ayu kwa heni, mlonga kota nayali yowahada wanhu. Lelo mhulichize! Na heni ndizipugajiza mbuli za heye, ila sonile ne chinhu choyawifile kuli mbuli azo zomumlonjeleze.

¹⁵Si nene yeng'ha, na heye Helodi hachiwene ne chinhu choyawifile munhu ayu chilingumgana yakomigwe.

¹⁶Ahyo ndangugana yazapigwe ng'hobwa hamba ndomlechela.”

¹⁷Kwa vila kaganigwa yamlechele munhu yumwe kwa wala wawele mchinweng'ho kuli mnvina ya Pasaka.

¹⁸Ila lung'hongola lweng'ha lwa wanhu wachemeleza hamwe, “Mkopoleni munhu ayo na utuchumulile Balaba!”

¹⁹Balaba nayali yahindilwe kwa kwambuza wanhu kuhinduka kuli muji na kukopola.

²⁰Pilato nakagana kumlechela Yesu, yolawa kalongana nawo kahi,

²¹ila hewo wachemeleza, “Muwambeni mumsalaba, muwambeni mumsalaba.”

²²Pilato nakawalonjela lwa kadatu, “Kadita choni chihile? Hambe ndichone chinhu chimwambuza yabagame, ndolajiza yasubuligwe ng'hobwa, hamba ndomlechela.”

²³Ila hewo waza nguchemeleza lukami ng'hatu twangugana Yesu yawambigwe mumsalaba, hamba lizi lyawo lihulikwa hamba wakundizwa chowaganile.

²⁴Pilato nakalonga iditigwe kota vyowalingugana.

²⁵Kachumula kamlavya yula walingumgana, yula yawohigwe kwa kwambuza kuhinduka na kukopola wanhu, yolawa kamlavya Yesu wamditile vowogana.

²⁶Lowali womgala wating'hana na munhu yumwe nayali nguchemigwa Simoni mwenyeng'haye wa Kilene, nayali yolawa kumgunda. Wamibata wamdwika ula msalaba yauhole kumbele kwa Yesu.

²⁷Lung'hongola lwa wanhu lwali lumuwinza, wali mumo wadala womlilila na kumuwembela.

²⁸Yesu kagalamka nakawalonjela, “Hemwe wadala wa Yelusalemu! Mleche kundilila heni, ila mililile mwemwe na wana wa hemwe!

²⁹Kwa vila mazuwa ganguya mozangulonga, ‘Wabweda wala wali mhende, hewo hawalelile na hambe wonyeze wana!’

³⁰Baho wanhu wokwaluka kuvilonjela vidunda, ‘Tugwile!’ Na vidunda, ‘Tugubicheni!’

³¹Kwa vila wanhu wangudita vinhu avi kuli igodi idodi, ahyo yowa ndaze kwa igodi likalile?”

³²Wanhu wanji weli wehile na wegaligwa bahala, wakopoligwe hamwe na Yesu.

³³Lowafichile honhu hamwe hali nguchemigwa, “Izeje lya mutwi,” Baho wamuwamba Yesu mumsalaba hamwe na wala wabokaji, yumwe kudilo na yumwe kumoso.

³⁴Yesu nakalonga, “Mhaza uwalechele kwa vila hawavizelele hebu chowalingudita.” Wahola nguwo zonayavalaga kwa kuzitowela simbi.

³⁵Wanhu wema wazanguwalola. Wakulu wa Wayahudi wazangubeza wolonga, “Kawalohola wanhu wanji, lelo yelohole yuye wone heye yawele Kilistu Mlohozi yahaguligwe na Nguluwi!”

³⁶Wamizi nawo wazangumbeza, waluta wampa divai izazame.

³⁷Wolonga, “Wilohole uliyeka wone hegwe ndo uli Mndewa wa Wayahudi.”

³⁸Mchanya ha msalaba wa heye, na wandika mbuli ino, “Yuno ndo Mndewa wa Wayahudi.”

³⁹Yumwe wa wala wabokaji wawambigwe hamwe na Yesu nakamliga Yesu kalonga, “Hambi hegwe hauwele Kilistu Mlohzi!? Wilohole gwegwe na hetwe.”

⁴⁰Ila yula mbokaji yumwe, kamdeuza miyage, yolonga, “Hegwe hambe umdumbe Nguluwi hebu? Hegwe nagwe kwa mumo kuli kutagusigwa kwa wihe hihyo.

⁴¹Hetwe, twangutagusigwa hano kwa mbuli zihile zotuditile. Ila ayu munhu haditile ne chinhu chihile.”

⁴²Hamba nakamlonjela Yesu, “Yesu! Ung'humbuche loukwinjila Undewa wa hegwe.”