Luk 23:3-42

³Pailat Yesu ivi tarakiiyanei bo, “Tam Jiu damsi i kiivavo, bo?” Yesu ivona bo, “Vonavaghata, vaghina kevonavona.”

⁴Ma Pailat ivi sisiya taparoro babadisi i babada ma koroto kurisi. Ivonesi bo, “Weni wawayina ina berona ke sago ata panani.”

⁵Ma kegha da taparoro babadisi i babada ma koroto gamosi ibagibagi, “Weni tomowina ina vibeyebeyena kubiine, wawaya peyarisi Judiya kamonai nuwanuwasi eghakighaki. Gariri kamonai ivi karei ma ipisi da wike.”

⁶Pailat sisiyina ivivi yanei na ivi tarakiiyana bo, “Tomowina na Gariri wawaya bo?”

⁷Pailat ivi yanei da Yesu tuna Herodi ina rewapana gaburinai na ivonatawei Herodi kurina, iyamna iakovi da Herodi wekarakava ipisi ku Jerusalem.

⁸Maranai Herodi Yesu ikitai, nuwanuwana ibiibii kirakai, iyamna tuna namadani kava ina kayowana da Yesu ita kitai. Varana ivivi yanei na ina nota ghamana da Yesu bera ghamaghamasi ita berai da ita kitai.

⁹Ivi taravirevire kirakiiyei ma Yesu ke ita vonapotei.

¹⁰Taparoro babadisi i babada ma giruma wawayisi imiiririya ma Yesu ivi wavu patei.

¹¹Ma Herodi, ina seri wawayisi yavata Yesu ivi namei ma ivi kaekaeyei. Ma muriyai gara kiimatanina iviiya ma Yesu ivi kotei ma ivonatawei ivovira Pailat kurina.

¹²Karenai Pailat da Herodi ivi kawapata ma nani maranai ivi karei da ivi turana.

¹³Pailat, Yesu iviiya na babadisi ma koroto kudubisi ikwaturiyariyesi,

¹⁴ma ivonesi bo, “Weni tomowina kopiyei na kovona da wawaya ivivi noraveyana berosi. Tomowina kovi wavui na maghinomiyai avi tupavirevirei ma ke sago ina berona ata panani.

¹⁵Bade Herodi nakanani ke sago berona ita panani. Tuna kubiine ivonatawei ivovira kurita. Ke aviyavisina berona ita berai da kana rabobo kota vonei.

¹⁶Tuna kubiine kovogha kava ana verei ma ana vonatawei ina nae.”

¹⁷(-)

¹⁸Peyarisi marasago ikarayogosi, “Kokiivunui! Akii kayowana da Barabas kovotawei!”

¹⁹(Barabas viruwa ma kiivunuwa kubiine ku gabura iterei.)

²⁰Pailat babadisi ma wawayisi ivonatovonisi da Yesu ita votawei.

²¹Ma kegha da koroto ere kiikiirarisi ivonavona bo, “Kotuparatui! Kotuparatui!”

²²Pailat ina vonatovona viarobina iterei, “Ikikava? Weni tomowina aviyavisina ibera beroi? Ke aviyavisina berona ita berai da kana rabobo kota vonei. Tuna kubiine ana vonesi da widi kava ina verei ma ina vonatawei ina nae.”

²³Ma kegha, ere nuwaghakighakisi koroto ikiikiirara ma ivonavona bo, “Kotuparatui!” Nani kiirarina kubiine,

²⁴Pailat i kayowana iberai. Yesu seri wawayisi ku imasi iterei da ita tuparatui.

²⁵Ma Barabas, viruwa ma kiivunuwa kubiine gabura kamonai imakamakai, ivotawei koroto i ku kayowanai.

²⁶Seri damsi Yesu irutini inenae. Nani kamonai tomowa sago, kana vava Saimon, ina dobu Sairini, ku Jerusalem irurui. Seri damsi imiiripotei ma Yesu kana korosi iviiya da Saimon ivi kavari. Ma ivonei da Yesu murinai ita baba.

²⁷Ma koroto ghamana ikivikivinisi ma kamonai na wivine Yesu itutuwei ma isiyasiyapei.

²⁸Yesu imiiritavire ma ivonesi bo, “Jerusalem wivine, ke kona tuweku. Tami ma natunatumi kubiimi kota tou.

²⁹Kokitai, mara epipisi ma wawaya ina vona bo, ‘Iyapoma da wivine gagarisi, manawisi kamonai pepeya ke ita kavari, ma ke iti susui.’

³⁰Nani maranai wawaya koya ina vonei bo, ‘Koya ghamam, ketamogunewa da kuna dogokai! Koya kikei, agu etini ku tepakai!’

³¹Mikeda wawaya weni berasi ina berai maranai kii matinai, ma avi berana ina berai maranai kii na ina poki?”

³²Seri damsi tomotomowa beroberosi ruwa irutinisi ikiibau da Yesu yavata iti rabobosi.

³³Maranai inekiibau da gawara kana vava ‘Wawaya Teuteuna,’ ma nani dobunai Yesu ma tomotomowisi ruwa ituparatusi. Sago katagheyanai ma sago dugenai.

³⁴Yesu ivona bo, “Mamai, weni damsi i berabero kenotatawei. Ti ke itakovi da aviyavisina eberaberai.” Ma seri wawayisi virekwa sago iberai da kamosiyai Yesu kana gara irereghi.

³⁵Ma wawaya imiiri ikitakita ma babada ivonavonavinamei. Ivonei bo, “Kuvona da tam God ina Vivinevine Wawayim. Wawaya kuvivi yawisi na mede kevi yawa meyem!”

³⁶Seri damsi imiiririya ma ti yavata Yesu ivi namei. Wain tomatomana iverei da itumai

³⁷ma ivonei bo, “Mikeda tam Jiu damsi i kiivavo na kevi yawa meyem.”

³⁸Ma gayamina vovonai, korosiyai, igiruma bo, ‘Weni tuna Jiu damsi i kiivavo.’

³⁹Tomowa berona yavata irororoke na Yesu ivonavinamei, “Tam Keriso bo? Kevi yawita.”

⁴⁰Ma kana viruwa kwinana iyeghai bo, “Tam God keyabuyabumanei bo kegha? Ita viaroba na kovoghina sago taviiviiya.

⁴¹Tota na ita berabero tepanai na kovogha taviiviiya ma weni tomowina na ina berona kegha.”

⁴²Ma ivonei bo, “Yesu, maranai kuni kiivavo na ke kuni notawapeku.”