SAN LUCAS 23:3-42

³Chi Pilato y'amɨdooy Jesús: ―¿Nej miich je' judío jäy xyrey'ajtp? Chi Jesús y'adzooy: ―Miich jadu'n mɨnamb.

⁴Chi Pilato nɨmay je teedy tungmɨɨdpɨ ajcxy etz je mayjäy: ―Ca' ɨɨch ti pocy nbaadyɨch ma jadayaabɨ yëydɨjc.

⁵Chi Jesús ymɨdzip nïgɨ anajty ajcxy ymɨnan'adɨɨtzcɨxy: ―Jada Jesús naax cajp tzachyajqueec-huäcxtaayb je judíojäy mɨɨd yɨ' y'ayuc. Yajtzondacy Galilea, e jadachambɨ ya Judea jadu'n ɨdɨ̈ch.

⁶Co Pilato mɨdoy Jesús ymɨdzip ajcxy nigapxy Galilea, chi y'amɨdooy pen galileojäy je Jesús anajty.

⁷Chi mɨc'amy huinjɨhuɨy co yɨ' jɨm anajty yajpaady ma Herodes y'ane'my, chi jɨm quejxy ma Herodes huɨdi nañ jadu'n anajty yajpatp jɨm Jerusalén huin'it xɨɨ.

⁸Co Herodes ijxy Jesús, chi oy jotcugɨɨy com tɨɨyɨp anajty ooy ja'ixa'ñ, tɨ anajty may ayuc mɨdoohuɨ, e ahuixy anajty co mɨjhuinma'ñ tunɨpy.

⁹Janch may ayuc ooy jayaj'amɨdoy, e Jesús ni tüg'aa ca' y'adzooy.

¹⁰Jɨm anajty teedy mɨjtungmɨɨdpɨ etz je escribas ajcxy, tzachnïgɨ̈béjtcɨxy mɨctägy.

¹¹Chi Herodes mɨɨd yjäy ooy nɨxiicy yajxiicy Jesús, ca' mɨj'ijxy mɨjpɨdacy. Chi xojxy mɨɨd oyhuit etz quejxhuimbijty jɨm ma Pilato.

¹²Huin'it xɨɨ Herodes etz Pilato ajcxy ñaymɨgügpɨjcɨ, com naymɨjotma'tɨp anajty ajcxy huin'it tiempo.

¹³Chi Pilato huomujcy yɨ teedy mɨjtungmɨɨdpɨ, yɨ cajptungmɨɨdpɨ, etz yɨ naax cajp.

¹⁴Chi ajcxy nɨmay: ―Tɨ miich ajcxy xyajnimíngɨxyɨch jadayaabɨ yëydɨjc, jadu'n miich ajcxy mɨnamb co ooy jäy yajqueec-huäcxtay. Tɨ ɨɨch yɨ' jatɨyduñɨch ma miich ajcxy mhuindu, ca' ɨɨch yɨ' ni ma ypocy tɨ nbaatɨ, jadu'n nej miich ajcxy mxɨ̈gɨxy.

¹⁵Nañ ni ca' Herodes ti pocy tɨ paady ma jada jäy, com tɨ njayajniquexyɨch, ni ti pocy jada Jesús ca' tɨ tuñ huɨdi huaad nyajco'ögɨ̈yɨch.

¹⁶Miñ n'octzaachytuñɨch, jaydëbɨ nnajtzmadzɨ̈huɨbɨch.

¹⁷Jadu'n je gobernador anajty costumbre mɨɨdɨty co najtzmadzɨ̈y tüg machyjäy mɨjxɨɨjoty.

¹⁸Chi je mayjäy tügmucy ajcxy ymɨnaandacy: ―¡Yaj'ög jadayaab Jesús! ¡Najtzmadzɨ' yɨ Barrabás!

¹⁹Je Barrabás anajty pujxtɨgoty tɨ ypɨdägyii co anajty tɨ nibɨdɨ̈gy je gobierno, nañ tɨ anajty yjäyyaj'ögy.

²⁰Chi Pilato nɨmay ajcxy jadüg'oc co najtzmadzɨ̈hua'ñ Jesús.

²¹Chi je mayjäy janch mɨc ymɨnañ: ―¡Yajcruudzpet miich yɨ'! ¡Yajcruudzpet miich yɨ'!

²²Chi Pilato ymɨnañ je mɨdugɨɨg'ocpɨ: ―¿Ti Jesús tɨ tundɨgoy? Ca' yɨ' ma ypocy nbaatɨch. Miñ n'octzaachytuñɨch, e najtzmadzɨ̈huɨbɨch.

²³Je jäy ajcxy nïgɨ anajty ymɨnaan'adɨɨtzcɨxy janch mɨc, co huen yajcruudzpejty. Chi ajcxy jadu'n mɨmadacy Jesús co chachne'mgɨxy je teedy tungmɨɨdpɨ, etz je cajpjäy ajcxy.

²⁴Chi jada' Pilato cuyduñ jadu'n nej je jäy ajcxy anajty pɨjctzoy.

²⁵Chi Pilato najtzmadzɨɨy je Barrabás huɨdi anajty pujxtɨgótyɨp, co anajty chach jäy yajqueec-huäcxy, etz yjäyyaj'ögy, je' huɨdi yɨ jäy ajcxy ypɨjctzou. Chi Pilato cɨ̈yejcy Jesús ma yɨ' ajcxy huen tungɨxy nej tzojccɨxy.

²⁶Chi je judíojäy ajcxy yajnɨcxy Jesús. Jɨm tü'am ajcxy mɨnaybaatɨ tüg jäy huɨdi anajty tɨ chooñ camjoty, huɨdi anajty yxɨɨ Simón, e ycogájpɨty anajty Cirene. Chi adzip ajcxy Simón yajquejcycabɨy Jesús ycruudz, e yajpanɨcxy ajcxy Jesús.

²⁷Jac'axam anajty naax cajp panɨcxcɨxy, etz nañ may töxyjäydɨjc ajcxy chachyaaxcɨxy mɨɨd jotmay mɨɨd yɨ' ycɨxpɨ.

²⁸Chi Jesús ni'ijxhuimbijty je töxyjäydɨjc ajcxy, chi nɨmay ajcxy: ―Miich Jerusalén töxyjäydɨjc ajcxy, ca' xyñiyáaxcɨxɨch. Nayñiyaaxɨgɨx miich ajcxy cɨ'm etz m'ung ajcxy ycɨxpɨ.

²⁹Chi ypaadɨpy tiempo co jäy ajcxy ymɨna'nɨpy: “Jotcujc je töxyjäy ajcxy huɨdi ca' y'ung ixy, huɨdi ca' tɨ y'ungtzɨmɨ̈gy, etz huɨdi ca' tɨ y'ung yajtzïtzcɨxy.”

³⁰Chi je jäy ajcxy nɨmaydägɨpy mɨjtun mɨjcop: “Nïgɨdagótcɨch ajcxy”; etz je mutztun mutzcop: “Yajtɨgooygɨch ajcxy.”

³¹Pen jäy ajcxy tzaachypɨ ayo'n mooyb Dios y'ung, nïgɨ ajcxy jacjiinɨ ytundɨgoya'ñ mɨɨd Dios yjäy, tɨm jadu'n nipaady nej pɨn puxam tzuxy quipy nañ puxamy quipy tɨ̈tzpɨ.

³²Nañ jɨm anajty yajnɨcxcɨxy mɨɨd Jesús jametz pocyjäy. Tú'cɨy mɨɨd Jesús anajty yaj'ögaangɨxy.

³³Co ajcxy oyjäty jɨm ma tüg it huɨdi jäy ytijpy ögpɨ cohuajc, chi ajcxy jɨm Jesús yajcruudzpejty mɨɨd metz pocyjäy: tüg pocyjäy a'oy'amy, jadüg anajty'amy.

³⁴Chi Jesús ymɨnañ: ―Dios Teedy, mecxɨ ajcxy ypocy, com ca' nejhuɨɨygɨxy ti ytungɨxyp. Co je soldados anajty ajcxy yajhuäcxaanɨ ac je'y Jesús yhuit, chi ajcxy ijxy suerte pɨn ocjëdɨɨb.

³⁵Jɨm je cajpjäy anajty yhuindɨɨcxcɨxy, yam je tungmɨɨdpɨ nɨxïgy yajxïgy Jesús, ymɨnañ ajcxy: ―Jada Jesús huingjäy tɨ yajtzögy, huen cham cɨ'm nayyajtzögyii, pen yɨ' je' je Cristo, je huɨdi Dios tɨ huin'ixyɨ.

³⁶Nañ jadu'n je soldados ajcxy nɨxiiccɨxy yajxiiccɨxy Jesús, nimɨjhuägy ajcxy möhuaangɨxy anajty vino ta'mbɨ.

³⁷Chi je soldados ajcxy ymɨnañ: ―Pen miich Rey'ajt ma yɨ judíojäy ajcxy, nayñihuänɨɨ cɨ'm.

³⁸Ma Jesús ycödu jɨm anajty yjaayɨty griego'amy, latin'amy, etz hebreo'amy: JADA JE' YƗ JUDIOJÄY AJCXY YREY.

³⁹Chi tüg pocyjäy huɨdi anajty cruudzcɨ́xy ooy nɨxiicy yajxiicy Jesús ymɨnañ: ―Pen miich je' je Cristo, naygohuänɨɨ cɨ'm, e cohuaangɨch ɨɨch ajcxy nañ jadu'n.

⁴⁰Chi je jadügpɨ pocyjäy oy y'adzooy, ojy ymɨgüg, nɨmay: ―¿Nej ca' miich Dios mdzɨgɨ̈y. Ca' m'ixy co tú'cɨy tɨ nbócycähuɨm?

⁴¹Ɨɨch ajt janch paatɨp jadu'n, co jadu'n jada ngöbɨ́jcɨm tzaachypɨ je tɨɨbɨ ndundɨgooyɨm. Jadayaabɨ Jesús janch ni ti jɨbɨcpɨ jada tɨ catuñ.

⁴²Chi je pocyjäy nɨmay Jesús: ―Tun may'ajt xyjäymedzɨpɨch co anajty mjäty jiiby ma m'ane'mdac.