SAN LUCAS 23:3-42

³Tuhme tumerune Pila̱to ihyan: ―¿A di che rey yahn nación yahn Israel ne? Ndahconan Dihvo vo: ―U, nduhca̱ che rahn.

⁴Ra̱hn Pila̱to ri se chidocuya̱n ndina̱n nduco nducoya̱ca ihyan: ―Hua renda̱cá nde a̱ma nunde yahn sa̱hnguh.

⁵Ate quendi sa̱hn chahn rica nunde se, ne ra̱hn se: ―Numacuahn nación yahn nuhn, nde esta̱do yahn Galilea nde muhn, ndedecuan se ihyan nduco ndudo che ricuahn se.

⁶Cuahn che chihnevan Pila̱to che ra̱hn se yahn Galilea ne, tumerune se ndete che min ya̱n va̱co Dihvo vo.

⁷Cuahn che checadino se te min ya̱n va̱co ye ne, dechuh ye ihyan na̱n Herodes, te sa̱hn min che rihquentiyon se min, ne quenan se ya̱n Jerusalén ro min.

⁸A̱ma chi yeno Herodes cuahn che ndihchero se Dihvo vo, te a ra̱hn che nahn ndihchero se ihyan. Nducote rihnevan se che a̱ma rente ihyan yahn Dihvo vo ne, quenan rino se che din ye a̱ma vederihno, ndihchero se.

⁹A̱ma ndeh na̱n che tumerune se, ate nde hua ndahconan Dihvo vo.

¹⁰Chidocuya̱n ndina̱n ma̱n, sa̱hn devano ley che dirun Moisés ma̱n ne, ndevana̱n se, ndere rica nunde se yahn ye.

¹¹Tuhme Herodes nduco sanda̱do yahn se ne, din duche yahn se Dihvo vo. Tihyon se a̱ma tino ndah ihyan, ne ndedechuh se ihyan na̱n Pila̱to.

¹²Ro mena̱n ne, ta̱n Pila̱to nduco Herodes, ate nde ro min ne, ndoya̱n se nduco vih.

¹³Nedin da̱ma Pila̱to chidocuya̱n ndina̱n ma̱n, sa̱hn intiyahn ma̱n, ihyan ya̱n ma̱n,

¹⁴ne ra̱hn se: ―Nchuhn ne, nda ne sa̱hnguh ná̱n, rica nunde ne yahn che ndedecuan se ihyan ya̱n. Ate tumeruné sa̱hn na̱n nchuhn yahn dehtenduh che rica nunde ne yahn se, ne metah nde a̱ma nunde yahn se.

¹⁵Dechúh nchuhn nduco se na̱n Herodes, ne namin hua nta̱ca se nde a̱ma nunde yahn se. Cua̱co te hua dehva din se ca̱va che ca̱hno vo sa̱hn.

¹⁶Tahque ndah cuáhn sa̱hn, nta̱hté sa̱hn.

¹⁷Nduyo nduyo che renda̱ vihco ro yudo ne, va che nta̱hte se a̱ma preso.

¹⁸Ate cah nducoya̱ca ihyan: ―¡Cuihno ne sa̱hn tih! ¡Cuenta̱hte ne Barrabás!

¹⁹Barrabás ne, quenun se va̱coya̱hn, te ndedecuan se ihyan ya̱n che cuhma ye nduco gobierno ma̱n, chihno se sanda̱do yahn ye ma̱n.

²⁰Ndaconan ra̱hn Pila̱to te nahn nta̱hte se Dihvo vo.

²¹Ate cah tun ihyan chahn: ―¡Cuenahn ya̱h ne sa̱hn! ¡Cuenahn ya̱h ne sa̱hn!

²²Ndaconan ra̱hn Pila̱to nde na̱n che chi ino yune: ―¿Dehra nedin sa̱hnguh? Hua co ca̱hno vo sa̱hn, te metah nde a̱ma nunde yahn se. Tahque ndah dín castigo sa̱hn, ne nta̱hté sa̱hn.

²³Ate quendi ihyan chahn rah ye, rica ye che conan ya̱h Dihvo vo. A̱ma quendi chidocuya̱n ndina̱n nduco ihyan chahn rah ye.

²⁴Tuhme ca̱h yune Pila̱to che co nduhca̱ che rica ye.

²⁵Nta̱hte se sa̱hn che quenun va̱coya̱hn me nduhca̱ che nahn ye, ne chihquentiyon se sanda̱do che nahn ya̱h se Dihvo vo.

²⁶Cuahn che quenda sanda̱do chahn Dihvo vo ne, chihquentiyon se a̱ma ihyan ya̱n Cirene che duche ye Simón, che cuenchi ye nahn ye viya̱ta, che ntihde dihme ye cruz, quendi ye Dihvo vo.

²⁷A̱ma ya̱hn ihyan ya̱n ma̱n, ihyan nda̱hta che raco ye ma̱n, rah ra̱n ye ma̱n, cuahn ye nduco vih.

²⁸Ndihchero Dihvo vo ihyan nda̱hta chahn, ne ra̱hn ye ri ye ihyan: ―Nchuhn ihyan ya̱n Jerusalén, hua cuaco ne ca̱va u. Cuaco ne ca̱va ma̱n ne ma̱n, ca̱va da̱ya ne ma̱n,

²⁹te nda̱ ro che ca̱hma ihyan: “Ndah ro yahn ihyan nda̱hta che hua rahcoya̱n ye ma̱n, ihyan nda̱hta che hua renda̱ca da̱ya ye ma̱n, ihyan nda̱hta che hua reta̱ve ye ma̱n.”

³⁰Ro min ne, ca̱hma ihyan co ye ico ma̱n, cuete ma̱n: “Conda̱h ndudo nchuhn nuhn, cuedendeh ne nuhn.”

³¹Nducote numacuahn vedeta̱n ca̱hno se u che ametah nunde yáhn ne, nda̱ ro min ne, tahque nun ca̱hno se ihyan nunde.

³²Namin quenda se o sa̱hn nunde ca̱va che ca̱hno se sa̱hn da̱ma nduco Dihvo vo.

³³Cuahn che nda̱ se na̱n che duche Cuete Ine Tin Tena̱hn ne, nahn ya̱h se Dihvo vo da̱ma nduco sa̱hn nunde chahn. A̱ma se ne, quenan ya̱h se la̱do ta̱h cua̱co ye, ne ta̱ma se la̱do ta̱h cueh ye.

³⁴Cova̱h Dihvo vo: ―Chida má̱n, cuenchahco ne yahn ihyan sih, te nde hua devano ye deh che redin ye. Sanda̱do chahn ne, din se sortear tino yahn ye, cha sa̱hn quenda̱h yahn se che co yahn se queri a̱ma.

³⁵Ihyan ya̱n chahn ne, vatendi ye, rendihchero ye. Sa̱hn intiyahn ne, riyon nan se Dihvo vo, ne ra̱hn se: ―Ta̱ma ca ihyan ne, ndedevahn se. Ndete che sa̱hn tih che a va ca̱de che dechuh Dendiohs, ndedevahn se ihyan iyehnse ne, ¿dehco che hua ndedevahn ma̱n se sa̱hn?

³⁶Namin redin duche yahn sanda̱do chahn ihyan, reca̱h se vinagre, cuh ye,

³⁷ne ra̱hn se ri se ihyan: ―Ndete che di che rey yahn nación yahn Israel ne, cuendedevahn man di.

³⁸Tin cruz ne, ndirun ndudo griego ma̱n, ndudo latín ma̱n, ndudo hebreo ma̱n, tuhca̱: “Nga̱ Rey yahn nación yahn Israel.”

³⁹A̱ma cha sa̱hn nunde chahn che quenan ya̱h se ne, riyon nan se ihyan, ne ra̱hn se: ―Ndete a di ihyan che a va ca̱de che chi ye, ndedevahn ye ihyan iyehnse ne, cuendedevahn man di ma̱n, cuendedevahn nuhn ma̱n.

⁴⁰Ate sa̱hn che ta̱ma me ne, ra̱hva se nduco vih, ne ra̱hn se: ―Namin di, ¿a hua vah Dendiohs, andahre quenan yah nduhca̱ che quenan ya̱h ye?

⁴¹Uvo ne, a redin yahn che rechuhrihn vo, te renedihvo vo nunde yuhn vo. Ate ihyan cuh ne, nde a̱ma nunde hua quendihco ye.

⁴²Tuhme ra̱hn se ri se Dihvo vo: ―Cuahn che a va ne, rihquentiyon ne ne, cueneca̱hco ne u, ne conan va̱hino ne u.