Luku 23:3-42

³Ana hazageno, Paeroti'a Jisasina anage huno antahigene, Kagra Jiu vahe'mofo kinio? Jisasi'a ana kenona'a anage huno hu'ne, Ha e'i kagraka'a nehane.

⁴Anante Paeroti'a ugagota prisi vahe'ene, ana vahe kevugura anage huno zmasamine, nagra ama ne'mofompina mago hazenke zama'a kena eri fore osue.

⁵Hianagi zamagra hu hankveti'za, agra rama'a vahe'mokizmi zmarimpa zmazeri otino, maka Judia kaziga rempi huzamine. Anazamo Galiliti agafa huno amarera ehnati'ne.

⁶Paeroti ana naneke nentahino'a, Jisasi'a Galili ne' mani'neo huno hu'ne.

⁷Hagi Paerotima antahiama, Jisasi'a Heroti kvagrinea mopafinti e'ne nehuno'a, Herotinte huntene. Herotia ana knafina Jerusale emaninegeno huntegeno avare'za vu'naze.

⁸Herotinte avare'za vzageno, Heroti'a Jisasima negeno'a tusi muse hu'ne. Na'ankure Jisasina agenke'a hakare zupa antahitere nehuno, magokna Agra kaguvaza eri fore hanigena kesue huno antahinegu hu'ne.

⁹Heroti'a rama'a antahige naneke hianagi, Jisasi'a kenona'a osu mani'ne.

¹⁰Hagi ugagota prisi vahe'mo'zane, kasegere ugota hu'naza vahe'mo'za, anante oti'za mani'ne'za, hu hankveti'za Jisasina kegaga hunte'naze.

¹¹Hanki Heroti'ene sondia vahe'ane, Jisasina revatga vatago nehu'za, azanava anteza azeri haviza hute'za, knare avonke kukena eri antaninente'za, huzmantege'za Paerotinte ete avre'za vu'naze.

¹²Na'ankure znagra kora ha' vahe tro hune manina'ankino, ana knazupage, Paeroti'ene Herotikea erimago znarimpa hu'na'e.

¹³Hagi Paeroti'a ugota prisi vahezgane, kva vahezgane, vahetamine kehutru huno,

¹⁴anage huno zmasami'ne, ama ne'ma avretma nagritema aza nekura hutma, vahetamina avreno havikante nevie hutma hazanagi keho, nagrama tamagri tamavuga Agri'ma rezagnena koana, tamagrama hunentaza kemofona agafa'a kena erifore osue.

¹⁵Heroti'enena magozahu antahintahi hu'negu, ama nera huntegeno tagritega e'ne. Antahiho, ama ne'ra magore huno ahefriga hazenke osu'ne.

¹⁶E'ina hu'negu, kanonkeve amitena atresugeno vugahie huno Paeroti'a hu'ne.

¹⁷Amanahukna nehazane, kafune kafunena Anumzamo Israeli vahe ozmahe zamagtere'negu antahimi ne'za neknarera, Paeroti'a kina nompinti mago vahe kazufe zamitere nehiane.

¹⁸Hianagi maka vahe'mo'za ranke hu'za kezati'za, Jisasina avreta ome ahenefrita, Barabasi katufe tamio! hu'naze.

¹⁹Barabasi'a, Jerusale rankumate kamani vahe ha' renezmanteno, mago vahe ahefrigeza kina huntageno mani'nea nere.

²⁰Paeroti Jisasima atresigeno vanigu, mago'ene veara zamantahigene.

²¹Hianagi zamagra mago'ane kezatiza, rugeka zafare aheta hantiho! Rugeka zafare aheta hantiho! Huza nehazageno,

²²Paeroti'a mago'ene 3'a zupa zamantahigeno, nagafarere? Nankna hazenke ama ne'mo'a hu'negeta nehaze? Nagrama kena eri fore'ma huana, friga hazenke'a osu'ne. E'ina hu'negu nagra kanonkeve amitena atresugeno vugahie.

²³Hianagi zamagra kazigazi hu'za, rankefinti antahige'za, rugeka zafare ahefrio hu'zama hazankemo, Paerotina agu'a azeri rukrehe hu'ne.

²⁴Hagi kema hazare, Paeroti'a antahintahi'a retrohuno Jisasinkura ahefriho hu'ne.

²⁵Hagi zamagrama kamani vahe ha' renezmanteno vahe zmahe fri'nege'za kina hunte'naza ne'kuma antahigaza ne' katufe nezamino, hanki Jisasina ahefrisunema hazagu avarezamine.

²⁶Jisasima avare'za nevazageno mago Sailiniti (Afrika) nera agi'a Saimonikino, Jerusale ne-ege'za kantega ome nege'za, Jisasi rugeka zafa erio hu'za eri kofintageno erino Jisasina avaririno vu'ne.

²⁷Jisasina tusi'a vea kevumo'za avaririza nevazageno, ananpina mago'a a'nenagamo'za zamasunku hunente'za, zavite'za vu'naze.

²⁸Hianagi Jisasi'a rukrahe huno nezmageno amanage huno zamasmi'ne, Jerusale kumate a'nemota nagrikura zavira oteta, tamagragu'ene mofavre timigu'enenku zavira ateho.

²⁹Antahiho, mago kna ne-eankiza vahe'mo'za anage hugahaze, narvo a'ne mo'zane, mofavre onte'anene, mofavre ami anuntage nosnamo'za muse hiho hu'za hugahaze.

³⁰Ana nehu'za zamagra agafa huza, ra agonamoka ankrisenka refiteranto, hu'za nehu'za, osi 'agonagura refiteranto hu'za hugahaze. (Hos 10:8)

³¹Na'ankure kasefa huno me'nenia zafamofoma e'inahuma huntesuza, osapama ana zafamoma renkenoa, inanknaza fore hugahie?

³²Tare kumzafa netrene, Jisasine magoka zanahe frisazegu zanavre'za vu'naze.

³³Aseni zaferine (Golkote) nehaza agonarema zamagra vute'za, Jisasine tare kumzafa netrena keka zafare zmahe'za hanti'naze. Magomofona Jisasi azantmaga ahe'za nehantiza, magomofona aza hoga hanti'naze.

³⁴Hianagi Jisasi'a anage hu'ne, nafanimoke, ontahine'za anara nehazanki, kumizmia atrezmanto. Anage nehige'za sondia vahe'mo'za zaza kena'a refko huza erinaku taisi zokogo re'naze. (Sam-Zga 22:18)

³⁵Ana nehazageno, hakare veamo'za anante otine'za uruha nehzageno, kva vahe'mo'zanena azanvanke hunte'za, vahe'mokizmia zamza nehia neki, Anumzamo huhamprintenemo Krasima mani'nesuno'a atregeno agra agu'vazisnigura kamaneno hu'za nehazageno,

³⁶Sondia vahe'mo'zanena azanava ke nehu'za, akahenea waini tina eme nemiza,

³⁷Kagra Jiu vahe'mokizmi kinima mani'nesunka, kagra ka'a kaguvazio! hu'za hu'naze.

³⁸Hanki asenirega anage hu'za avona kreza ome hentenaze, ama'i Jiu vahe'mokizmi kinie.

³⁹Mago kumzafa ne'ma aheza hantinaza nemo'enena Jisasina kesuno, Kagra Kraisiga omninano? Kagra'ka'a kagu'nevazinka, tagri'enena taguvzio!

⁴⁰Hianagi mago'mo'a azerikorino, kagra Anumzamofonkura korera nosano? Ana mikomota anahukna knazampi mani'none.

⁴¹Tagra tamage huta hazenke hu'noa zamofo nona'a, eriga knaza eneru'e. Hianagi ama ne'mo'a mago hazenke osu'ne.

⁴²Anantera anage huno ana ne'mo'a hu'ne, Jisasiga hihamukafima manisunka kagesa antahinamio.