LUKA 23:3-42

³Bena Pilato ese e nanadaia, eto, Oi na Iuda taudia edia pavapava a? Iesu e haere, eto, O ena vada o gwaumu.

⁴Pilato ese hahelaḡa taudia bona aru taudia e hamaorodia, eto, Kerere ta asina davaria ina tau enai.

⁵To idia na e hereva goadagoada, eto, Ia na ena hahediba herevadia ai Iudea idoinai vada e haheloḡo-heloḡoa, Galilea amo e matamaia ema bona ina hanua.

⁶Pilato ese una hereva e kamonai, bena e henanadai, eto, Ina Galilea tauna a?

⁷Bena ia dibana ia na Herod ena kaha tauna dainai, ia ese Herod dekena e siaia lao, badina be una negana ai ia na Ierusalem ai.

⁸Herod ese Iesu e itaia, bena e moale bada; badina be nega daudau Iesu harina e kamonaiva, bena e urava bema itaia bona Iesu ese toa ta bema karaia bena bema itaia e tomava.

⁹Bena hereva diaḡau e nanadailaia, to Iesu na se haere.

¹⁰Hahelaḡa taudia bona itorena taudia unuseni ai e gini, e habadelaia goadagoada.

¹¹Bena Herod bona ena tuari taudia ese ia e kirikirilaia, e ḡonagonalaia, dabua namo-hereana ta e hadokilaia, bena Pilato dekena e siaia lou lao.

¹²Una dina ai Pilato bona Herod vada e herohemaino; badina be gunaguna idia raruosi e heinai heheniva.

¹³Bena Pilato ese hahelaga taudia bona hanua lohiadia bona hanua taudia e boiridia,

¹⁴e hamaorodia, eto, Ina tau o mailaia, oto ia ese hanua e haheloḡoamu; a lau ese umui vairamui ai o habadelaia herevadia vada name tahu, to ena kerere ta asiname davaria.

¹⁵Herod danu unuheto; una dainai ia ese ma e siaia lou ita dekedai. Benaini, ia ese mase karana ta se karaia;

¹⁶namo, aina dadabaia, ma baina ruhaia nege.

¹⁷Badina be vaia ena kara una aria negana ai dibura rumana ai noho tauna ta baine ruhaia nege.

¹⁸Bena iboudiai e lolo bou, eto, Ina tau na herevana. Baraba hari ba henimai.

¹⁹Una na heatu bona ala-ala hanua lalonai e havaraia dainai dibura rumana ai e koua tauna.

²⁰Pilato ma e hereva henidia lou, Iesu baine ruhaia nege eto;

²¹to idia ma e lolo, eto, Ba hasatauroa, ba hasatauroa.

²²Nega ihatoina ma e hereva henidia, eto, Ina tau ena dika be dahaka? Lau na mase badina ta ienai asina davaria. Vada baina dadabaia, bena baina ruhaia nege.

²³To idia na e lolo lalo-dika, eto, Ba hasatauroa. Bena idia eredia vada e kwalimu.

²⁴Bena Pilato ese edia ura heḡereḡerena e karaia:

²⁵hari heatu bona ala-ala dainai dibura rumana ai e nohova tauna e ruhaia nege, edia noinoi heḡereḡerena; a Iesu na e henidia, edia ura bae karaia.

²⁶Idia ese Iesu e hakaua lasi, bena Simona, Kurene tauna ta, gunika amo lasina ai e dabaia tao, satauro na ia paḡana ai e atoa kau, Iesu murina amo baine huaia.

²⁷Taunimanima hutuma na ia murinai e raka, bona hahine haida rakadia ai e tai hetutu.

²⁸Bena Iesu e gini kerehai, e hereva henidia, eto, Ierusalem hahinemui e, lau taigu asio tai, a sibomui hari ba hetai heheni, bona natumui taidia hari ba tai.

²⁹Badina be negana be maimu baeto “Gabani hahinedia bona ratadia asie topo hahinedia hari nanamo”.

³⁰Una negana ai ororo badadia bae hereva henidia, baeto “A kuremai tao”; bona ororo maraḡidia bae hamaorodia, baeto “A gorumai tao”.

³¹Badina be au maurina ini e karaia tomamu, matona kakorona na ede bae tomaia?

³²Kara dika taudia rarua danu ia ida e hakaudia lasi, bae hasataurodia hebou.

³³Gabu ta ai e kau, ladana na Kwara Koukouna; unuseni ai e hasatauroa. Hari kara dika taudia danu, ta idibana kahana ai, ta laurina kahana ai, e hasataurodia.

³⁴Bena Iesu e ḡuriḡuri, eto, Tamagu e, ina e karaiamu karana na asi dibadia, davadia na basio henidia. Bena ena dabua e hari, mari ai ta ta ahudia e abi.

³⁵Hanua taudia na e gini, e herarai. Bona hanua lohiadia ese e kirikirilaia, eto, Ia na idau taudia e hamauridiava; bema Dirava ena Keriso, ena abi-hidi tauna, ia na sibona bema hahemauri.

³⁶Tuari taudia ese e ḡonagonalaia, e raka kahira, vine ranuna iditana e duduia dae, eto,

³⁷Oi na Iuda taudia edia pavapava o tomu, matona sibomu ba hahemauri.

³⁸Revareva ta danu e torea, ia daenai e kapaia, eto: IUDA TAUDIA EDIA PAVAPAVA.

³⁹Bena ia ida e hasataurodia hebou taudia ta ese e ḡonaḡonalaia, eto, Oi na dia Keriso a? Sibomu a hahemauri; ai danu a hamaurimai.

⁴⁰A bamona ese e gwau henia, eto, Dirava garina to garimu a? Oi danu bo masemu, ia heḡereḡerena.

⁴¹Ḡau tamona, ita raruosi baita mase eda kara dika davana, a ina tau na asi ena kerere.

⁴²Bena ia eto, Iesu e, emu basileia bavabia negana ai, ba lalogu.