Lucas 23:3-42

³Mig-insà si Pilato diyà kandin, “Sikona lay se Selotan te menge Judiyo?” Timaba si Jesus, “Ee. Benal se kagi nikaw.”

⁴Minikagi si Pilato diyà te menge pengolo te simbahan aw doma otaw netipon kidoen, “Wedad palos salà te otaw seini kinità ko.”

⁵Meneng labi dan pa migleges kandin, kagi dan, “Gayed sikandin egsamok te kedita te otaw, so yan se ipegtoladà din kidoen te kebelad te Judiya, lekat te Galiliya taman dini.”

⁶Pegdineg i Pilato kenyan, mig-insà kandan aw si Jesus se sakop te probinsya te Galiliya.

⁷Pegketaga-taga din te lekat si Jesus te probinsya nesekopan i Herod, impeibing din doton kandin, so kidoen heman si Herod te Jerusalem te aldaw sìyan.

⁸Pegkità i Herod ki Jesus, ontò neluba, so tapay den sikandin dimineg tepad ki Jesus, aw nenamay den te ibeg din komità kandin aw menge kepelahan inangen i Jesus.

⁹Yan se doun te medita se in-insà i Herod diyà ki Jesus, meneng wedà palos taba.

¹⁰Migpedapag se menge pengolo te simbahan aw menenoladà te punù, aw neopal dan migdimanda tepad kandin.

¹¹Gayed nebebayat si Herod aw kedita te sondalo din, aw migpelingo-lingo dan te pegsagman dan kandin iling te pegsagman dan te selotan. Penga niyan, pineseolan i Herod si Jesus te ontò mèpiya saol iling te ekasan te selotan, aw impelikò din doton ki Pilato.

¹²Pineokit kenyan, migpesigelakay si Herod aw si Pilato, so tapay dan egpedindilay.

¹³Nayan, migtipon si Pilato te kedita te pengolo te simbahan, aw menge obanen te Judiyo aw otaw netipon kidoen.

¹⁴Minikagi sikandin, “Pegpengibing niyo te otaw seini dini kanak, minikagi kaw te migsamok sikandin te kedita te otaw. Na, kinità niyo den te mig-insà a kandin, meneng wedad palos salà din kinità ko iling te indimanda niyo tepad kandin.

¹⁵Wedad heman salà din kinità i Herod, so impelikò din sikandin dini kenitadon. Na, eneng-enengi niyo ini. Wedad palos ininang din te mepakay sikandin ipelumun aw imetayan.

¹⁶Yan se doun te olò ko sikandin ipebadas, aw penga niyan ipelowà.”

¹⁷Nayan, kelikit te Pista te Pegpelowà, gayed ipelowà din diyà kandan se sebad otaw kineleboso.

¹⁸Meneng migbelobansag se kedita dan, “Imetayi se otaw seini. Pelowai si Barabas.”

¹⁹Na, si Barabas se nekeleboso pa, so sikandin se pengolo te otaw minato te gobirno kidoen te Jerusalem, aw doen heman otaw inimetayan din.

²⁰Ibeg i Pilato megpelowà ki Jesus, aw yan todà din dan inikegiyan.

²¹Meneng migbelobansag dan, “Imetayi sikandin. Lensangi diyà te kros.”

²²Te iketelo peg-ikagi i Pilato, minikagi sikandin, “Meneng wedad palos medaet ininang din. Wedad palos salà din kinità ko te mepakay sikandin ipelumun aw imetayan. Yan se doun te olò ko sikandin ipebadas, aw penga niyan ipelowà.”

²³Meneng gayed dan migbelobansag te dakel se kagi dan, so ontò dan ibeg te keilangan ilansang sikandin diyà te kros amon matay. Yan dinaeg dan si Pilato, so ontò dakel se kagi dan.

²⁴Penga niyan, minikagi si Pilato te tomanen din se ibeg dan.

²⁵Yan impelowà din lekat te keleboso se otaw pinemallì dan, sìyan otaw minato te gobirno aw nemonò. Meneng si Jesus se impeibing din amon imetayan, so yan se ibeg dan.

²⁶Penga niyan, inibing te sondalo si Jesus lekat te balay i Pilato. Kidoen te dalan, kinità dan se tege Sirene ngadan din si Simon kaling dimateng lekat te saka. Lineges dan sikandin neniang te kros aw timetondog ki Jesus.

²⁷Ontò medita se otaw timaking ki Jesus, aw medita heman se bayi ontò migkelag tandà te lano dan kandin.

²⁸Meneng miniling si Jesus aw minikagi, “Sikiyo bayi tege Jerusalem, ikà niyo egkelag tandà te kelimahan domateng diyà kanak. Meneng keilangan megkelag kaw tandà te kelimahan metoman domateng diyà kenyo aw menge batà niyo.

²⁹Penenalan kaw kanak. Doen aldaw domateng aw mikagi se otaw te labi pa meluba se menge bayi wedad palos batà dan.

³⁰Te aldaw sìyan, tomawal se otaw diyà te menge bontod, kagi dan, ‘Bonboni kay niyo. Imetayi kay niyo.’

³¹Aw medaet se kelimahan dimateng den diyà kanak pengkey wedad salà ko, labi pa medaet se kelimahan domateng diyà te otaw doen salà te modi aldaw.”

³²Dowa heman se doma otaw inibing dan amon imetayan doma din, so ontò medaet se ininang dan.

³³Pegdateng dan doton te bontod iningedanan Tòlan te Olo, inlansang dan sikandin diyà te kros. Inlansang heman se dowa otaw medaet kidoen te tangkil din, aw si Jesus diyà te tengà-tengà.

³⁴Migtawal-tawal si Jesus tepad te menge otaw miglansang kandin diyà te kros, kagi din, “Amà, pegwedadi se salà dan, so wedà dan ketegahi aw eden se ininang dan seini.” Penga te peglansang dan ki Jesus diyà te kros, pigtalad-talad dan se penenaktun linowas din, aw migbonot dan aw eden se penenaktun meabat te teg sebad-sebad kandan.

³⁵Timengteng kandin se kedita te otaw netipon kidoen. Meneng se menge obanen te Judiyo, migbaet-baet dan kandin, kagi dan, “Migtabang sikandin te doma otaw netigdaan amon eked dan pa kematay. Kitaen tadon den aw meketabang sikandin te kandin pegkeotawun amon eked kematay. Kitaen tadon heman aw benal sikandin se Misiyas insogò te Timanem, sìyan tapay pinemallì din.”

³⁶Migtompuyus heman se menge sondalo kandin. Dimoton dan kandin amon ipeinem dan kandin se bino sinengedan te wayeg.

³⁷Minikagi dan, “Aw ontò ka Selotan te menge Judiyo, tebangi se kamno pegkeotawun.”

³⁸Doen heman solat insawol doton diatas te olo din, kagi niyan, “Seini se Selotan te menge Judiyo.”

³⁹Se sebad otaw medaet impetangkil ki Jesus, migtompuyus sikandin, kagi din, “Petega-tegahi kay te ontò ka Misiyas. Tebangi se kamno pegkeotawun, aw tebangi kay heman.”

⁴⁰Meneng migsagda se sebad, kagi din, “Ikà egtompuyus te Timanem. Keilangan megselsel ka diyà te Timanem, so onawa se pelumun dimateng den diyà kenitadon.

⁴¹Keilangan ipelumun ki den, so yan se detengan te medaet ininang ta. Meneng wedad palos medaet ininang te doma ta seini.”

⁴²Penga niyan, minikagi sikandin diyà ki Jesus, “Keidowi a bag aw lomowan ka.”