Isanquienare Irocashi 23:3-42

³Ari isampitiri Pirato: —¿Queariompa? ¿Avirompa ivicatsarite jorio? Yacanaqueri: —Je, narotaque.

⁴Impoiji yora Pirato icantajeitavaqueri: —Te aneroji irantane yoca.

⁵Aiquero icantajeiti: —Iquisacaajeitacari atiripee, icantajeitaqueri atiri: “Tsame ajocajeri avincatsarite”. Intanacaro anta Carireaqui, meeca iquenaquenayeti aca Joreaqui, yamatavijeitaqueri maaroni.

⁶Iquemantacarori Pirato icantajeitaqueriri, isampitaqueri: —¿Iriompa carireasati yoca?

⁷Yacanaqueri: —Je, iriotaque. Icantiri: —Ari, paanajeri anta Eroreshiqui. Iriotaque pincatsariventajeitiriri carireasati. Savicatsi meeca aca Jerosarequi. Ipoqui chapinqui.

⁸Ari yaajeitanajiri anta. Ineantavacariri Eroreshi Jesoshi, iquimoshiretanaque. Oshequi iquemacotapinitaqueri, itasoncantayetaque, irootaque icoantavetacaniri irineeri. Icoaveta irineerime intasoncantayeteme.

⁹Oshequi isampiyevetacari paitapeerica, iro cantaincha te iranqueriji Jesoshi.

¹⁰Oshequi yapiitapinitiniri yora amaqueriri: —Te incameetsateji. Ainiro irantane.

¹¹Impoiji ishirontimentajeitacari Jesoshi yora Eroreshi aisati maaroni soraropee. Impoiji iquitsaataqueri cameetsari quitsaarentsi, ishiacantamempeacari pincatsari, irishirontimentajeitanteariri aisati. Impoiji itianquiri aisati anta Piratoqui.

¹²Ari peerani iquisavacaapinita Eroreshi aisati Pirato, iro cantaincha meeca intanacaro yaacameetsatavacaaja. Yojocajiro iquisavacaaveitani.

¹³Impoiji yapatojeitacari Pirato yora jivatacaajeitiriri saserotepee, pincatsaripee, aisati oshequi atiripee pashini.

¹⁴Ari icantavaqueri: —Pamene, incaranqui pamavetaquenari yoca, picantajeivetaquena yoamejeitaqueri atiri irojocajeitena narori, aisati iriori novincatsaririntepee. Pineajeitaquena nosampitaqueri paitaricapee, iro cantaincha noneacameetsatiri: te aneeroji irantane.

¹⁵Aisati iriori Eroreshi, ineacameetsataqueri, irootaque yoipiantacariri aca. Pineaquero, tecatsi irante noacantanteariri.

¹⁶Meeca nompasatacanteri, impoiji noimpacajeri.

¹⁷Ari maaroni osarintsi ariorica omoncarataca oca vieshita iquenqueshiretantarori yavisantaniri peerani inampire Tasorentsi, yora oantatsiri, yora Pirato yoipacajiri aparoni shirampari yoiminqueetaqueri.

¹⁸Ari itsipatavacaajeitaca icantajeitaqueri: —Poacanteri yoca, irinti Varavashi poimpacajeri.

¹⁹Ari yora Varavashi peerani icantajeitaqueri ishaninca anta Jerosarequi: “Tsame ajocajeri yora pincatsari”. Impoiji yoaqueri ishaninca, irootaque yoiminqueantacariri caravosoqui.

²⁰Icoaveta Pirato iroimpacajerime Jesoshi, irootaque icoantavetacari iroimajerentajerime atiripee, iro cantaincha

²¹aiquero icantajeitanajatiiri: —Pimpajacotacanteri. Pimpajacotacanteri.

²²Yapiivetajari aisati Pirato: —¿Paita nompajacotacantanteariri? ¿Paita yantaqueri? Nosampijeivetaquempi, iro cantaincha tecatsi piotacaasanotena noacantanteariri. Nompasanatacanteri, impoiji noimpacajeri.

²³Icantani icajemajeitanaque: —Pimpajacotacanterive. Pimpajacotacanterive. Aiquero icantanaitii, irosati iquemisantantacariri Pirato,

²⁴icantiri: —Ari nomajeitempiro oca picoacaajeitaquenari.

²⁵Yoipacaacantajiri Varavashi, aisati icantajeitaqueri: —Paajeitanaqueriqueti Jesoshica, jaocarica pincanteriri.

²⁶Ari yaajeitanaqueri Jesoshi anta impajacoterinta, iquenanaque avotsiqui. Jeri itonquiojeitavacari shirenesati pajitachari Shimo. Iponeanaca oantsiqui. Ari iperanatavacari soraro yanatanaqueneri Jesoshi coroshi, ora impajacotanteariri. Yoijatapairi itapiiqui Jesoshi.

²⁷Yoijajeitanaqueri oshequi atiri. Otimi aisati oshequi tsinane iraacojeitaqueriri. Oshequi oashiretacotacari, irootaque ocajemacojeitantacariri aisati. Jerosaresato onajeiti.

²⁸Iro cantaincha yamenanaquero Jesoshi, icantajeitanaquero: —Eiro piracojeitanatsi, avisati iracojeitajanchane, aisati piracojeiteri pitomipee.

²⁹Coajica ompomerentsitimojeitempi, pashinoncaajeitanaquea. Pincantajeite: “Oquimoshiretaque caari timatsi otomi”.

³⁰Incoajeivetea atiri ontijerime imperita.

³¹Pamene, tecatsi nanteni nainti, iro cantaincha iroashinoncayena. Tempa coajica irashinoncaasanotaquea maaroni antirori caari cameetsatatsi.

³²Aisati anta yaayeetanajiri apite coshitantatsiri, intsipajeiteari iriori Jesoshi, impajacojeiteri.

³³Ari yareetacaajeitapaacari anta Caraveraqui, ipajacojeitapaaqueri coroshiqui, tac, tac, tac. Irinti yora coshitantatsiri, ipajacotaqueri pashiniqui coroshi anta iracosanoriqui Jesoshi. Irio itsipa ipajacotaqueri anta irampatequi.

³⁴Impoiji iquenquetsatacairi Jesoshi iriri: —Apa, pincavintsayeri yocapee, eiro poasanquetaimentiritsi yoaquena. Te irioteji paitarica yantiri. Ari icoajeitaque soraropee iraajeitero iitsaareni Jesoshi. Icanti: —Tsame ampishonquero mapijaniqui ayojeitanteari janicarica aitajerine iitsaareni. Icanti itsipa: —Jaa, jentsiqueti, aneantearo.

³⁵Ari itimi anta oshequi atiri, amenajeitaqueriri, aisati itimi yora pincatsaripee, ishirontimentajeitacari Jesoshi, iji, iji, iji; icanti: —Yoavisacovetacari itsipapee, jentsite amenavaquerita ariorica irimatajea iroavisacotajea irisati. Iriotasanotaquerica Quirishito, itiancane Tasorentsi, ari irimatajea irisati iroavisacotajea.

³⁶Aisati iriori soraropee, ishirontimentajeitacari. Ijatashitaqueri, imperime ovaja, quepishijari.

³⁷Icantaqueri: —Avirorica ivincatsarite jorio, jentsite poavisacotajea avisati: iji, iji, iji.

³⁸Ainiro ipajacoyeetaquero anta coroshiqui sanquenarentsi, otimi iitoqui Jesoshi, jenioquiji. Osanquenataca irineanequi quereshiasati, aisati irineanequi oromasati, aisati irineanequi jorio. Osanquenataca, ocanti: “Jeri yoca ivincatsarite jorio”.

³⁹Aisati yora coshitantatsiri ipajacoyeetaqueri, ishirontimentacari iriori. —Avirorica Quirishito, poavisacotajea avisati, aisati poavisacotena narori.

⁴⁰Iro cantaincha iquisatsataqueri itsipa coshitantatsiri: —Tempa pimpincatsateri Tasorentsi. Aisati avirori, irotaintsi pincame.

⁴¹Ainiro antanepee arori ancamajeitanteari, irintiquea yoca, tecatsi irante incamanteari.

⁴²Aisati icantiri: —Jesoshi, ariorica pareetea anta pimpincatsaritenta, pinquenqueshiretapeena narori, poavisacotena.