Lucangundru 23:3-42

³Pilatulu nina jakalkana wonti ja jatana wonti: “Jidni Juda kanaia Kapara nganai?” Nulu nunkangu kalabana wonti ja jatana wonti: “Jidni matja jatai.”

⁴Pilatus Priesta pirnani ja kana wolarani jatana wonti: “Ngato madlentji pani nunkangupini kanani mankamankai.”

⁵Ja tana jadijadibana wonti ja jatana wonti: “Nulia kana wolara patijiritjibai ja Judaia mitani pratjanani ngujangujara jinkiai, ja Nulia Galilaiandru wonina wonti ninkidanilu.”

⁶Pilatulu Galilaia ngarana, nulu jakalkana wonti: “Nauja kana Galilaiala?”

⁷Ja nulu matja ngujamana, Nau Herodini ngurulandru nganai, nulu nina Herodingu jinpana wonti, naupini nunkangupini ditjini bakana Jerusalemingu nganana wonti.

⁸Herodilu Jesus najina, nau pirna mankina wonti; ngangau nau ditji marapuni wolkareli nganana wonti nina najila, ngangau nulu marapu nunkangundru ngarana wonti, ja nau kalkaterina wonti malka kulno nunkangundru najila.

⁹Nulu nina jaura marapujeli jakalkana wonti, ja Nulu nunkangu panila kalabana wonti.

¹⁰Priesta pirna ja jaura jinkinietja naka terkana wonti, tana nunkangu pirna ngulkuterkana wonti.

¹¹Herodili ja milieli nunkanali nina tilpana wonti ja ngirkibana wonti, ja nulu nina kati waru widmana wonti, nina nakaldra Pilatungu jinpana tikana wonti.

¹²Pilatus ja Herodes nunkangupini ditjini kamaneli pantjina wonti; ngangau pudla ngopera kalakalarilkijiribamalina wonti.

¹³Pilatulu Priesta pirna ja kana kapara ja kana wolara matja map ana, nau tanangu jatana wonti:

¹⁴“Jura ninapini kana ngakangu wapalkana warai kulnuni jeribaka, nulu kana wolara karkarkai; ja mai, ngato jurangu mudlani ninaia wontjana warai, ja ngato nunkangupini kanani madlentji pani mankamankana warai, pratjanani jura nunkangundru ngulkuterkai.

¹⁵Bakana Herodili pani; ngangau ngato jurana nunkangu jinpana warai, ja mai, wata madlentji Nulia ngankana warai, jendrali Nauja palinanto.

¹⁶Ngato ninaia nandrala nganai ja kurakala nganai.”

¹⁷Ngangau nulu tanangu ditji pirnani kulno kurakananto.

¹⁸Tana pratjana maritjina wonti ja jatana wonti: “Ninapini worau, ja ngaianingu Barabbas kurakau!”

¹⁹Naupini tiripatijiritjinandru ngurani matja pantjina, ja nari nandranandru kanjangarini ngamana wonti.

²⁰Nakaldra Pilatulu tanangu jaura kaukaubana wonti, ngangau nau jertapaterina wonti Jesus kurakala.

²¹Tana maritjina wonti ja jatana wonti: “Kunarkuni katibamai, kunarkuni ninaia katibamai!”

²²Nau pota parkulula tanangu jatana wonti: “Mina madlentji Nulupini ngankanala? Ngato wata madlentji nunkangu mankamankana warai jendrali Nauja palinanto; ngato ninaia nandrala nganai ja kurakala nganai.”

²³Tanali nina ngaiala pirnali winpana wonti ja ngatjina wonti, Nauja kunarkuni parananto. Ja tanani ja Priesta pirnaia ngaialali kalalu ngankana wonti.

²⁴Pilatulu morlalu kurana wonti tanani ngatjina pantjinanto.

²⁵Nulu tanangu ninapini kurakana wonti, nau tiripatijiritjinandru ja nari ngankanandru kanjangarini ngamana wonti. Ja nulu Jesus tanani jertapaterinani jinkina wonti.

²⁶Ja tanali nina wapalkana, tanali Simon, Kyrenala kulno watawatali patana wonti, nan inarundru tikanani, ja nunkangu kunarku kurana wonti, nulu nina Jesungu ngadani waltananto.

²⁷Bakana kana wolara ja widla marapu nunkangu karipaterina wonti, tana nunkangundru ngaurongauro nganana wonti ja jindrana wonti.

²⁸Jesus tanangu jatana karitjina wonti: “Jura Jerusalemini ngataniura worai, wata ngakangundru jindranau, a-ai, jurangundru munta ja jurani kupandru jindranau!

²⁹Ngangau mai, ditji wokarala nganai, tanangupini tana jatala nganai: Murlali pirna tana ngameri, ja tana palku wata kantjirina warai, ja tana ngama, tanali wata tapananto jinkina warai!

³⁰Ngadani tanali wonila nganai mardawonpani jatala: Ngaianingu woraterianau! ja wonpani: Ngaianina walpadakanau;

³¹Ngangau tanali jenia pita tjankani ngankanani, mina mujani pantjinanto?”

³²Tanali bakana madlentji ngankanietja mandril morla wapalkana wonti, pudlana nunkangunto nari ngankala.

³³Ja tana nunkangupini pirini, tala nunkani “mangatandra piri” matja wokarana, tanali nina naka kunarkuni katibana wonti, ja madlentji ngankanietja kulno ngunarani ja kulno worangantjuni.

³⁴Jesus jatana wonti: “Ngaperiai; tanangu woramai, ngangau tanali mangapunkujeli jenia ngankai.” Tanali kati nunkani puntibana wonti wontjani malkali.

³⁵Ja kana wolara terkana wonti najila. Tanangunto bakana kana kaparali ngirkibana wonti ja jatana wonti: “Nguru Nulia kulkanala; Nauja munta kulkateriatimai, Nauja Christus, Godaia kalkalkani ngananani!”

³⁶Nina bakana mitaia kaparaia milieli ngirkibana wonti, tana karakararina wonti ja nunkangu kaldri pilki jinkina wonti,

³⁷Ja jatana wonti: “Jidni Juda kanaia Kapara ngananani, munta kulkateriamai!”

³⁸Bakana nunkangu miri jaura dakani parana wonti Griekaia ja Romaia ja Juda kanaia jaurali: “NAUPINI JUDA KANAIA KAPARA NGANAI.”

³⁹Madlentji ngankanietja kulnujeli, kunarkuni warukana, nina ngirkibana wonti ja jatana wonti: “Jidni Christus nananani, munta kulkateriamai ja ngalina.”

⁴⁰Nulu kulnujeli kalabana wonti ja nina daudauana wonti ja jatana wonti: “Jidni bakana wata Godandru japali nganai, ngangau jundru bakana ninapini kalala ngamalkai?

⁴¹Ja talku ngaldrangu, ngangau ngaldra maniai, mina ngaldra ngankanala;” nulupini wata madlentji ngankana warai.

⁴²Ja nan Jesungu jatana wonti: “Kaparajai, ngana ngundramai, jidni mililani jinkanani wokaranani!”