Ləmɑɣɑsɛɛ tʋ 2:14-23

¹⁴Pə tɑɣɑ pʋlʋ, ləmɑɣɑsɛɛ tʋ nyəmɑ́ ɩ təpote kɛ́. Ɩlɛnɑ kpɑŋtʋ nɑ́ɑ́ yontiɣi yem. Ɩlɛ mɑ nyəmɑ́ sɩ pə kɔŋ pɑ tənɑɣɑ kpɑ́tʋ́ɣʋ́ kʋlʋmʋɣʋ kpɛntʋɣʋ kɛ́.

¹⁵Ɩlɛnɑ mɑ́ tɔ mɑ tɑɑ sɩ, ye pɩɩ kpɛntɩ mɑ nɑ kpɑŋtʋ kɛ kpɑ́tʋ́ɣʋ́ kʋlʋmʋɣʋ. Ɩlɛ pepe tɔɔ kɛ́ mɑ tɛɛ-ɩ ləmɑɣɑsɛɛ. Təlɛ tə wɛ kɑtɛ tɔtɔɣɔ.

¹⁶Pɑɑ ləmɑɣɑsɛɛ tʋ, pɑɑ kpɑŋtʋ, pɑ nɑɑlɛ pɑ səkɩ teitei kɛ́. Pə́cɔ́ pɑɑ tɔɔsəɣɩ nɔɣɔlʋ tɔɔ kɛ́ tɑm tɔɔ nɑ pə kəlɩ lɛlʋ. Ye kʋyɛɛŋ ɩ́ sikɑɑ pɑ sɔɔkɩ pɑ nɑɑlɛ pɑ tɔɔ kɛ́.

¹⁷Mɑ nyəɣəsɑ weesuɣu kɛ́. Mpi tɔ, mɑ tɑɑ kpɑɑnɑ mpi yəlɑɑ lɑkɩ ɑtɛ tɔɣɔ. Pə tənɑ pə wɛ kɑtɛ kɛ́ ɩsɩɩ yʋlʋ lʋkʋɣʋ sɩ ɩ́ tiiki heelim tɔ.

¹⁸Mɑ tɑɑ kpɑɑnɑ təmɑ wenɑ mɑ tɔɣɔ wɑhɑlɑ nɑ mɑ́ lɑ tɔɣɔ. Mpi tɔ, wei ɩ kɑ́ lɛɛtɩ mɑ lonte tɑɑ tɔɣɔ mɑ kɔŋ yelinɑʋ.

¹⁹Pəyele nɔɣɔlʋ tɑ nyɩ sɩ ɩ kɑ́ lɑ ləmɑɣɑsɛɛ tʋ yɑɑ kpɑŋtʋ. Pəyele pʋntʋ ɩnɩ ɩ kɑ́ pɑɑsənnɑ mpi mɑ tɔɣɔ wɑhɑlɑ nɑ mɑ́ lɑnɑ ləmɑɣɑsɛɛ kɛ ɑtɛ tɔ. Təlɛ tə wɛ kɑtɛ tɔtɔɣɔ.

²⁰Ɩlɛnɑ mɑ ɑpɑlʋtʋ yɔɔlənɑ təmlɛ nte mɑ lɑpɑ ɑtɛ tɔ.

²¹Mpi tɔ, ye yʋlʋ lɑpɑ pʋlʋ nɑ ləmɑɣɑsɛɛ nɑ ɩ́ wɑɑ pə tɑɑ. Ɩlɛnɑ ɩ́ yelinɑ yʋlʋ wei ɩ tɑ wɩɩ pə tɔɔ tɔ. Pə wɛ kɑtɛ tɔtɔɣɔ, pəcɔ pə wɩɩkɩ.

²²Ye mpʋ yəlɑɑ kɑɑsʋɣʋ pɑ tɩ nɑ pɑ́ tɔkɩ wɑhɑlɑ nɑ pɑ́ kɑɑkɩ yem tɔ, weɣe pɑ wɑɑkɩ ɑtɛ cənɛ?

²³Pɑ kʋyɛɛŋ tənɑ kɛ cɔɔsɛɛ kɛ́. Pɑ təmlɛ kɛ wɑhɑlɑ nyəntɛ. Pɑɑ ɑhoo pɑɑ hɛɛsəɣɩ. Təlɛ tə wɛ kɑtɛ tɔtɔɣɔ.