Text copied!
CopyCompare
Holi Baibul - Prabebs

Prabebs 23

Help us?
Click on verse(s) to share them!
1If yu jidan blanga dagat daga garram eni king yu garra dagat daga raitwei.
2Yu nomo go jis blanga dagat bigismob daga. Yu garra meiksho yu nomo dagat tumatj.
3Yu nomo gridi blanga ol detlot gudwan daga. Maitbi im trai blanga trikim yu.
4Yu stap dumbat olkain ting blanga meigim miselp jidan ritjwan.
5Det mani blanga yu gin binijap kwikbala jis laik im abum wing laik igulok weya flaiwei kwikbala.
6Yu nomo dagadagat daga garram detkain pipul hu nomo wandim sherimbat enijing, en yu nomo gridibala blanga dagat det gudwan daga blanga im.
7Detkain pipul oldei luk haumatj yu dagat en dei dalim yu, “Kipgon dagat mowa,” bat dei nomo tok trubalawei.
8Wal yu garra baku det daga weya yubin dagat en yu garra weistim ol yu kainwan wed.
9Yu nomo tok langa silibala pipul. Dei kaan lisin langa yu sabibala wed.
10Yu nomo go en mubum det bandri mak brom det pleis weya im jidan en yu nomo teikoba det kantri blanga detlot pipul hu nomo garram mami o dedi.
11YAWEI det trubala God, im na det brabli strongbalawan hu oldei maindimbat olabat, en im garra tok blanga olabat.
12Teiknodis blanga ola gudbala wed en len wanim yu titja titjimbat yu.
13Yu garra streitinimap yu biginini olabat en yu garra beldim olabat. Tharran kaan kilim olabat ded,
14en bambai olabat garra jinggabat nomo blanga dum lagijat, en tharran mait seibum olabat laif.
15Main biginini olabat, if yumob jidan sabibala langa yumob main, wal yumob garra meigim mi brabli gudbinji.
16En if yumob tok ola trubala wed, wal ai garra rili gudbinji.
17Yumob nomo jelas blanga detlot nogudbala pipul. Yumob garra oldei shoum rispek langa YAWEI.
18If yumob dum lagijat, wal yumob garra abum det brabli gudwan laif en jidan longtaim.

19Main biginini olabat, yumob lisin en yumob garra jidan brabli sabibala, en yumob garra kipgon jinggabat gudwei blanga bulurrum det raitwanwei.
20Yumob nomo jidan drangginbala o laigim dagadagatbat loda daga,
21dumaji wen yumob jidan lagijat, tharran meigim yumob jidan leisibala en yumob garra jidan powan en werrimonbat rabishwan klos.
22Yumob garra lisin langa yumob dedi en yumob nomo fogedabat yumob mami wen im olgamen.
23Yumob garra len blanga abum gudwan main en jidan trubalawei, en yumob garra len en sabi mowa en nomo fogedabat tharran.
24Yumob garra meigim yumob dedi brabli gudbinji wen yumob jidan raitwei en dumbat ola brabli gudbala ting.
25Yumob garra meigim yumob mami en dedi gudbinji blanga yumob en yumob mami garra jidan brabli gudbinjiwei.
26Main boi, yu garra teiknodis langa mi brabliwei en yu wotjim wanim mi oldei dumbat.
27Detlot nogudwan gel en ola waif hu oldei silipsilipbat garram eni men jidan laik det brabli dipwan hol.
28Dei weidabat blanga gajim yu jis laik detlot pipul hu oldei stilimbat enijing brom enibodi olataim en meigim loda men jidan nomo trubala langa olabat waif.
29Detlot pipul hu oldei laigim dringgimbat loda wain jidanbat sedwan en fait gija en agamin gija, en abumbat loda sowa oloba langa olabat bodi en blad langa olabat ai. Olabat na oldei abum loda trabul.
31Nomo larram det wain jidan bos oba yu, nomeda im redwan en shain insaid det kap en wen yu dringgim, im teist brabli gudwan.
32Bambai na im garra bidim yu jis laik jigiwan sneik, en im poisinim yu.
33Yu garra luk olkain ting en yu kaan luk gudwei en yu main garra trikimbat yu.
34Yu garra filim miselp sikwan jis laik yu jidan langa bout wen bigwan rein en strongwan win meigim im go ebriweya langa det bigwan solwoda.
35Yu garra abum pein langa yu bodi ebriweya en yu kaan sabi wanim bin hepin langa yu. Olnait yu garra toktok miselp, “Wotaim im garra ailibala? Ai wandim dringgim mowa grog.”