Text copied!
CopyCompare
A BUK TABU A MAULANA KUNUBU ma A KALAMANA KUNUBU - Tinata Valavalar

Tinata Valavalar 23

Help us?
Click on verse(s) to share them!
1Ba u ian varurung ma ra luluai, Una nuk bulu pa nina i ki ra luaina matam;
2Ma ba u ra lukai, Una vung ra pakat ta ra kongkongim.
3Koko una kaina upi kana lavur kalami na nangnang, Tago dia da ra nian i vartuam.
4Koko una ongor upi una uviana; Una ngo ma kaum kabinana.
5Ba ra matam i bobe ke, i panie muka; Tago ra vurvur magit dia vung ra bebea i diat, Ma dia purpururung urama ra maup da ra minigulai.
6Koko una en ra magit kai ra tena langodo, Ma koko una kaina upi kana kalami na nangnang;
7Tago da i toto ta ra balana, damana ra maukuana; I biti tam dari: Una ian ma una momo; Ma vakir ra nuknukina damana piram.
8A ngungu magit ba u tar en ia una ga marue mule, Ma una ga vole kaum kalami na tinata.
9Koko una tatata ba ra lunga i ki na valongor, Tago na pidimuane ke ra kabinana ta kaum tinata.
10Koko una kari vue ra vakilang na langun amana tana, Ma koko una vana ta ra uma kai ra umana nat na ling;
11Tago kadia tena valaun i ongor; Na tata maravut diat ta ra vartakun ure u.
12A balam na ongor upi ra varvateten, Ma ra ura talingam upi ra tinata na kabinana.
13Koko una ngo ma ra varvapagumanene pire ra bul, Tago ba u tova ma ra virvirit, pa na virua.
14Una luba ia ma ra virvirit, Ma una valaun ra tulungeana kan ra ruarua na tulungen.
15Natugu, ba ra balam i kabatau, Ra balagu iat na gugu bula.
16Maia pa, ra tulungeagu na ga, Ba ra ngiem i vatang ra ko na tinata.
17Koko ra balam na varngu ure ra umana tena varpiam, Una ongor ika ta ra variru tadav ra Luluai ta ra bungbung parika.
18Tago a dovotina, ra e namur i ki, Ma ra magit u ki nunur upi ia pa na tukum.

19Natugu, una valongore ma una kabinana, Ma ra nuknukim na mur ra nga i takodo.
20Koko avat a la varurung ma ra umana lup mome vain, Ma koko una ki maravut ra umana lup kirip, a umana lukai;
21Tago ra lup nimomo ma ra lukai dir a luveana boko, Ma ba tikai i mata vava ka, na mal boko ma ra mal i tarada.
22Una toratorom tai tamam nina i ga vangala u, Ma koko una pidimuane tinam ba i tubuan.
23Una kul ra dovotina, ma koko una ivure mule; Damana bula ra kabinana, ma ra varvateten, ma ra minatoto.
24Tama i ra tena takodo na manga gugu; Ma nina i vangala ra bul i kabinana, na ga tana.
25Boina ba tamam ma tinam dir a gugu, Ma nina i ga kava vaarike u na ga.
26Natugu, una tul tar ra nuknukim tagu, Ma boina ba ra matam na manane kaugu lavur uga.
27Tago ra paiga na vavina i da ra ngala na tung; Ma ra enana vavina i da ra ubu i varvaim.
28I kiki uai da ra tena nilong, Ma i vapeal ra umana tena vavagu pire ra tarai.
29Ia i kairane ra kinadik? Ia i ki na tabun? Ia i tup ia ra varngangar? Ia ra tinata na urur i tur pirana? Ia i kinkin ma pa ta vuna tana? Ia i gavul ra matana?
30Nina diat dia vavabing ma ra kini pire ra polo na vain, Nina diat dia vana ma dia mome kilang ra vain i varpopoto.
31Koko una bobe ra vain ba i meme, Ba i tangtagul ta ra momamomo, Ba i kalakalami ta ra nimomo:
32Namur i varkarat da ra teo, Ma i varpidik da ra varkarat na vui.
33A matam na gire ra umana enana magit, Ma una ga tatike ra purpuruan na tinata.
34Una da tikai i vava ra ul a ta, Ba varogop ma nam i vava arama ra ul a toro.
35Una biti: Di ga luba iau, ma pa i makmaki; Di ga kita iau, ma pa iau ga kairane; Vingai ina tavangun? Ina tikan mulai upi ra polo na vain.