Text copied!
CopyCompare
I tnalù dwata - Dad Fngewe

Dad Fngewe 23

Help us?
Click on verse(s) to share them!
1Ku kmaan ge di saféd i mdatah to, toom fandam gablà di kton,
2na ku too ge tyan kmaan, dnanam i ayeam kmaan.
3Nang ge too mibal di kafye nem i knaanan, du ken i knaanan ani i fawelan ge.
4Fandamam funa, na nangam faflungay i ktom mngabal i bong knunam,
5du i knun tatì lana di mata, salngad klana i kablak ku mayeng ditù di mdatah bulul.
6Nang ge kmaan di saféd i to sasè ldam, demen nang ge too mibal kmaan i dad fye nem knaanan,
7du kenen satu to gal faldam gablà di bong btas i knaanan. Namanan di ge, “Kmaan na minum ge,” bay i manan ani là mdà di nawan.
8Na ku gadeam i fandaman utaam i knaan fkaanan ge, na landè gukmamu i fye gmanam di kenen.
9Là knabas i to là fulung faldam i kabtas i gmanam di kenen, taman nang ge tamdò kenen.
10Nang mili ilè gusableng i tanà i kafkah di muna, na nang mlad i tanà i dad ilu,
11du Dwata i too mtulus, msen di dale na kamlung dale.
12Flinge ge i to tamdò ge, na toom dnawat di nawam i tdoan ge.
13Nang ge gdè mlayam i tingaam, du laan sa mati ku sankélam di gugsalaan.
14Kabay balingam kenen gafalwà di lanaw lifoh du tdoam fagu di kbadasam kenen.
15Tingàgu, ku mbaling ge to fulung faldam, too lehew i nawagu.
16Too lehew i nawagu flinge i glut i galam man.
17Nang mibal nawam i knè i dad to gamsalà, bay balingam too kanlikò Dwata klom dini di tah tanà.
18Ku ani nimoam, nun gufyem di satu duh, na gdohò i kafye i galam fatan.

19Tingàgu, fanlingem agu, fafulung ge na mlalò ge i dalan matlu.
20Nang ge magin i dad to langal, demen i dad to too tyan kmaan,
21du én gusen i dad langal na i dad tyan kmaan, dunan i klandèla, na ku tatì ge alò kudang du langal, én gukelam kadang alò kamlawehi lwék.
22Fanlingem i maam, du kenen mngà ge, na di ktua i yéam too ge mafè kenen.
23Toom fkah di nawam gambet i kaglut, kfulung, fye kafngewe, na kaglabat, na nangam fbayà bay toomknabas i kdee ani.
24I mà i to matlu nun bong klehewan, na i tingà fulung faldam too kanlehew i maan.
25Fye ku lehew i dad tuam gablà di ge, na fye ku lehew i yéam i mngà ge.
26Tingàgu, too ge flinge deg, na mlalò ge i deg nimò.
27Fawag ge di libun mkat lagi, na di libun mlafà yaanan, dusalngad ale i fawel, na nun dalanla mawel ge.
28Dad libun gambet ani, salngad ale i dad to meye kfagu mlayam gedi dalanam, na dee dad lagi flafàla i yaanla.
29I to too minum i gamlangal, na gal meye i dee bung gamlangal toosasè i kagkahan, du too nun kliduan, gal smamuk, na gal mugak na i matan too fulè, na lamyalo kenen tamduk, na laan moon gaslokani ku laan langal.
31Na di kakokla i gamlangal di basu, nang ge meye balù tan i kafye bawehan na balù too fye i lyalo i to di kaflon dun, nangam ftabug i ktom,
32du ku minum ge na langal ge, na di kwas i klangalam, lyalom toosasè, salngad ku nakét ge ulad i gamfati.
33Na ku minum ge, nun dee teenam sasè na gamlikò na tatì book i fandamam.
34Na lyom sadi déén ge di aweng di mahin too lamwek, na sadi déén ge di tah layal du too msayug.
35Na du mdà di kdee ani, ani i manam, “Difandamgu snuntukla agu, na bnunalla agu, bay làgu gafaldam i nimòla. Too agu mayè mukat, du fye mngabal agu i ninumgu.” Ani manam kadang ku én nimoam.