Text copied!
CopyCompare
Paipel - Än Salomon Fos

Än Salomon Fos 23

Help us?
Click on verse(s) to share them!
1Are ka mot ngeni mongö ren eman samol, kopwe ekiekifichi mine a nom me mwom.
2Are en eman mi mongömong, kopwe fokun atitini mine kopwe eni.
3Kosap mochenia ngeni anan mongö mi fokun annö, pun ena sokun mongö a tongeni atupuk ren.
4Kosap angang weires fän iten om kopwe wöümongola, kopwe aea om tipachem o emwen seni.
5Lupwen ka kärän nengeni woumw, ese chüen nom. Pun a müttir sü usun chök a angei pöükässin o ässitä läng usun eman ikel.
6Kosap mongö enen eman aramas mi kichingau. Kosap mochenia ngeni anan mongö mi fokun annö.
7Pun i ewe sokun aramas mi chök ekieki usun liwin. A ürenuk, “Kopwe chök mongö o ün,” nge lon lelukan esap wenechar ngonuk.
8Kopwe musäsini ewe mongö ka fen eni, nge om kewe kapasen kilisou repwe lomotongau.
9Kosap fos ngeni eman chon tiparoch, pun esap aücheani om kewe kapasen tipachem.
10Kosap amwökütü ekewe kiä minen lomlom ika tolong lon fanüen ekewe mi mäsen.
11Pun ewe Samol mi Lapalap ar chon alisi mi pöchökül epwe peniir o ü ngonuk.
12Kopwe suki lelukom ngeni ekewe kapasen öüröür o aü selingom ngeni ekewe kapasen silelap.
13Kosap tipemwaramwar le apwüngü noum. Are ka wichi ngeni efoch wok, esap mäla.
14Are ka wichi ngeni efoch wok, ka tongeni amanaua manauan seni mäla.
15Nei, are kopwe mirit, üpwe fokun pwapwa.
16Lelukei epwe mwänek, are ka apasa kapas mi pwüng.
17Kosap lolowoiti ekewe chon tipis, nge kopwe chök achocho lon om niuokusiti ewe Samol mi Lapalap fansoun meinisin.
18Pun ellet epwe wor om apilükülük lon fansoun mwom, nge kosap lichipüng lon om apilükülüköch.

19Nei, kopwe aüseling o miritila, kopwe ekieki usun om kopwe föri mine a pwüng.
20Kosap chiechi ngeni ekewe mi ünümong wain ika ekewe mi ochomong fituk,
21pun ekewe chon ünüpuch me ekewe chon mongömong repwe wöüngauala, nge eman a chök mongö o annut epwe üföüf üf mi kamwakam.
22Nei, kopwe aüselinga alon semom, ätewe ka up seni, nge kosap aücheangaua inelapom, lupwen a chinlap.
23Kopwe kamö let, nge kosap amömöla. Kopwe kamö tipachem, kapasen öüröür me weweöch.
24Semen eman chon pwüng epwe fokun meseik, nge eman mi nöüni eman ät mi tipachem epwe pwapwa ren.
25Kopwe föri mine semom me inom repwe pwapwa ren, amwo neminewe mi nöünuk epwe meseik reöm.
26Nei, kopwe fokun aüselingaei o apirüei lon ai föför.
27Pun eman fefin mi amömö inisin fän iten lisowu a wewe ngeni eu pwang mi alolol, nge eman fin lüangau a wewe ngeni eu chönüttu mi wäkükün lon.
28Neminewe a operi mwän usun eman chon solä o alapala iteiten chokewe mi kirikiringau ngeni pwülüer.
29Iö a osupwang? Iö a lolilen? Iö a afisätä fitikoko? Iö a lalapat? Iö a kinas, nge esap wor popun? Iö a parapar lon mesan?
30Chokewe mi momototam le ün wain, chokewe mi chök kükütta ünümer wain mi nofit.
31Kosap tup ren ewe wain mi parapar, lupwen a puropur lon ewe kap, a mecheres ngeni om kopwe ün.
32Iwe, lesopolan om ün, epwe pwichipwich leutum usun pwichipwichin küwen eman serepenit mi poison.
33Mesom epwe nenengeni mettoch mi mwäl, om ekiek me fos esap fat.
34Kopwe usun chök eman mi nom lukalapen matau, a mailölö o chuwenewenfeil usun chök eman mi nom letonen efoch aü.
35Kopwe apasa, “Ra wichiei, nge üsap kinas. Ra awataei, nge üsap mefi. Inet üpwe nennela? Mürin üpwe pwal ünsefäl.”