Text copied!
CopyCompare
Bible Ni Thothup - Proverbs

Proverbs 23

Help us?
Click on verse(s) to share them!
1Nap’an ni ga ra par nga but’ ni ngam abichgow be’ nib pilung, ma ga tay u wun’um ko ir mini’.
2Fa’anra ba pag urngin e ggan ni ga ma kay, ma ga sag’al ngom.
3Dab mu nemow nigem ko fapi ggan ni bfel’ ni be pi’, ya rayag ni be guy rogon ni nge ban nigem.
4Ngam gonop nge dabi aw parowom i muruwliy ni nge yo’or e salpiy rom.
5Ya salpiy rom e rayag ni nge mul u pa’am u lan ba talab, ni gowa yib pon nge changeg nge yan ni bod ba arche’ ni manuw.
6Dab mu’un ko abich u tabel rok be’ nib si’in ara mu nemow nigem ko ggan ni falel’ ni be pi’.
7Be ga’ar, “Mmoy ngki yag boch ngom,” machane gathi aram rogon ni be leamnag. N’en ni be leamnag e ire bin riyul’ i ir.
8Ga ra sull’ugunag e chu’uw ni kamkoy, ma urngin e thin ni bfel’ ni u mog e ke ma’adab.
9Dab mu guy rogon ni ngam chep ku be’ nib balyang; ya dabyag ni nangfan nge fel’ u wan’.
10Ri dab mu n’ag gil’ e mathil ko binaw romew be’, ara mu fek e binaw ni tafen e bitir ni kanim’ rorad.
11Ya SOMOL nib gel e ir e ta’ayuw rorad u tafen e puf oloboch, ni ra togopluw ngom.
12Mu l’eg i lim ko sensey rom ma ga fil gubin nrayag rom.
13Dab mu pag i llowan’nag fakam; ga ra toy ni bfel’ rogon ma dabi yim’ riy.
14Ma bin rriyul’ riy e rayag ni ayweg e yafos rok.
15Fakag, fa’an ga ra gonop, ma ra gu felfelan’.
16Gu ra uf ko ngiyal’ ni gu ra rung’ag ni ga be yog e thin nib gonop.
17Dabi awan’um ko girdi’ ni tadenen; nge par ni madgun SOMOL e ngam lik’eg u lan e yafos rom.
18Fa’anra aram rogon, ma par rom i yan e ngaram e bay e tamilang riy.

19Fakag, mu telim, um par ni ga ba gonop, ma ga be fal’eg i leamnag rogon e par rom.
20Dab um cheg ngak e girdi’ ni tamu’un rrum, ara pi’in yad ma abich nge pag rogon.
21Pi tamu’un rrum nge pi’in yad ma abich nge pag rogon e ra yib e gafgow ngorad. Fa’anra kemus ni abich nge mol e ga be tay, ma dabi n’uw nap’an ma ga chuw ko mad nike mogchothchoth.
22Mu telim ngak e chitamam, ya fa’an mang e de moy ma dariy owchem. Ra pilibthir e chitinam, ma ngam dag ko ngongol rom ni ga be pining e magaer ngak.
23Tin nriyul’, gonop, fanow nge tamilangan’, irera’ e pin’en ni bay rogon ni ngan chuw’iy, ma ri dab mu pi’ ni chuway’.
24Gallabthir rok be’ nib mat’aw e bay rogon ni ngar felfelan’ gow. En ra fakay be’ nib gonop e ra felan’.
25Ngam guy rogon ngi i par e chitamam nge chitinam ni yow ba felan’ ngom; ngam pi’ ngak e chitinam e re felan’ nem.
26Fakag, mu uthum e lim ngog, ma ga folwok rog.
27Pi’in ppin ni yad ma chuway’ ngorad nge pi’in nib kireb e yad bod ba wup ni yira aw ngay mi nim’.
28Yad be son nigem ni bod e moro’ro’ nma og ngak e girdi’ nge fek ban’en rorad, ma yad tapgin ni pire’ e pumo’on ndakurir yul’yul’gad ngak le’engirad.
29Mu dag e girdi’ ni yad ba tamu’un rrum, ni yad ma unum e rrum ni kan athkuy ban’en ngay ni nge fel’ lamen, mu gu dag ngom e girdi’ ni yad be par u fithik’ e gafgow nike gafgowan’rad ngorad, ma gubin ngiyal’ ni yad be ngongliy e tin tagan ma gubin ngiyal’ ni yad be yog ni der fel’ u wan’rad e tin bay rorad. Be par lan owcherad nib row ma be maad’ad dowrad, ni maad’ad nrayag ni ngan ayuwegey riy nge dabi yib.
31Dab mu pag e wayin nge waliyem ngam unum, darifan ni yagga be guy nib row ra’en ma be wuthwuth u lan e kap, ma ga ra unum me yan u ngorongorem nib munguy.
32Ma ra yan i kadbul, ma ga be thamiy ni gowa k’adem ba porchoyog ni bay e yub u langan.
33Ma ga changar u reb e changar ma dabkiyag ni ngam leam ara mu non ni yira nang fan.
34Ma ga ra thamiy rom ni gowa ga bay u p’ebugul e wulyang ko barkow ni be yin’ e day u rigur ni kam mislal.
35Ma bayi lungum, “Sana kan toy ban’en ngog, sana kan li’eg, machane da kug nang. Mang ndabiyag ni nge tamilangan’ug? Thingar gu wan ngkug unum e rrum bayay.”