Text copied!
CopyCompare
Kâte Bible - Muqâqiŋ Dâŋ

Muqâqiŋ Dâŋ 23

Help us?
Click on verse(s) to share them!
1Go ŋic fekicne moc ehec nânâ nâcmuo ine ŋic weniŋucne ehec ŋekopac i manasuzemec.
2Ehuc go nânâ bocjaha nâekicko sifu âmbâŋ mi nâzemec.
3E esâicguhuc nânâ aŋacne râe bâmoc eha go hone fâfârerâ gapec tâmiric mi nâzemec.
4Go maŋɋârâŋhec juhuc moneŋ mafa sâko bâfuacmurâ tâpirige mi sipirickezemec.
5Manakic, tucwipezi furuc furuc qahuc ratâmireekac irec sâc jaha moneŋ mafagezi fakecnehec erâ ratâmireocmu.
6Go ŋic buchâro ehec nânâ mi nâzemec, me nânâ aŋacne râe bâmoc eekac irec andac wâc boc mi ezemec.
7E nânâ garehuc ŋifec ine upegao baocmu. Ehuc maŋticnezi gorao mi domaha miczi burec erâ ʒiŋuc gazahuc eatucguocmu: “Ware nânâ opâ nâc.”
8Go ere nânâ wiac nârâ maŋucmu, ehuc daŋgedâŋ âzâcnetec fârimâc eocmu.
9Go ŋic mutuc matacne ere maio dâŋ mi muzemec, e maŋɋârâŋ dâŋge mi mana tarahuc qaisockeocmu.
10Apa ŋosafâcge jaŋe mâreŋ ma râembiŋ i baʒic baefuc mi ezemec, erâ bekâ mâsiŋ jaŋere mâreŋ wâc mi jowac rozemec.
11Wofuŋ e jaŋere ŋeŋezic hâcne, irec dâŋgieo jaŋere dâŋ dopeckehuc gore dâŋ bawahaocmu.
12Go qaqazugere dâŋte hazec râehuc tâpiri fogarekac sâc mamana gie bazemec.
13Go naru motec bâtiŋ‐jopazore manabâc mi ezemec, jaŋe kâcbiŋ kirâ mi hâmoniŋmu,
14aricne, kâcbiŋ kirâ juju bapa‐jeŋic biaŋkeocmu.
15O motec‐mae, go maŋɋârâŋhec erâ jucmuo ine bunane biaŋkeocmu.
16Micbipicgaonec maŋɋârâŋ dâŋ wahame manarâ ʒeri bari epemu.
17Go sâqocne bapa jaŋere erâ maŋge mi bâruŋkezejec, Wofuŋ ine dameŋ sâc araŋ bacnehuc juzemec.
18Go iŋuc ehuc juhaŋte woworicgezi mi omaeocmu.

19O motec‐mae, no gazape manac: Go maŋɋârâŋhec juzemec, ehuc hata fâretiŋko jaha maŋ mamanasuge râetec fozejec.
20Go ŋic waiŋ âmbâŋ nânâ me nânâ gapecmâc nâeŋgopieŋ jaŋere ŋondeŋko boc mi juzemec.
21Opâ sanaŋ â bec qowi âmbâŋ nânâ ŋic i jaŋe hapetac erâ juniŋmu, ehuc ojoŋ fohuc ŋaqi qoruc basaniŋmu.
22Go mamac bâbâfuage ere dâŋ manahuc juzemec, â neŋgocgezi ŋokac qizec erâ juha mi qaisockezemec.
23Go dâŋ fâri qizecne, maŋɋârâŋ, maŋsowa juju â mamana tara i furine barâ bajuhuc moneŋte erâ mocwâc mi qikiŋnezemec.
24Ŋic tiŋnere mamaczi ʒeri eocmu, â ŋic moc e motec‐ticnezi maŋɋârâŋhec jume bubiaŋ manaocmu.
25Go juju bapagezi neŋgoc mamac jahecge bubiaŋ qajactezemec, ehame neŋgoc rorogezi gore erâ ʒeri bari ezejec.
26O motec‐mae, go maŋge norao râetec fooc, ehame kike hata‐nane honehuc juzemec.
27Hata ŋokac iriŋ biriŋne â sasec ŋokac jaŋe bitiŋ egarehapie raʒitec kihâmocguocmu:
28Ŋokac i jaŋe hâcne fiuc roro ŋic jaŋe iŋucne ruc bahuc jueŋgopieŋ, ehuc ŋic bocjaha eatuc‐jopapie ŋonâŋfâc‐jeŋic behec‐jopaeŋgopieŋ.
29Mozi ʒârâ ʒâpâo â busâqoc faio juekac, me mozi mu qaqatarac â muheŋɋâŋhec juekac, me mozi fuŋne tâmiricko wic fuacneekac, me mozi ʒâŋe bâruŋhec juekac?
30Waiŋ opâ nâhuc ŋehapie ŋafe ʒâŋiŋkeekac, erâ waiŋ opâ fuŋne fuŋne bâsifuckerâ nâeŋgopieŋ ŋic i jaŋe hâcne wiac i fua‐jareekac.
31Go waiŋ opâ bâbâroŋ â ɋaɋac taeŋne i opâ nânâ kiruŋko du âtehuc wefume hone aŋac erâ sifu âmbâŋ mi nâzemec.
32Manakic, go waiŋ opâ gapecmâc nâku guŋ fohaŋtec hae fureme manatec homa momorizi kicnume huc fua‐nareekac irec sâc egareocmu.
33Ehame ʒâŋege bâniniŋkeme wiac ʒâŋe furu honecmu, erâ mamanasuge sifuckeha dâŋ musifuckecmu.
34Go ŋic moczi wokeo rahuc maŋuekac, â hâwec siri sâko qaha jâmâ wâtuŋko wiserâ feekac irec sâc ecmu.
35Ehuc kecʒiŋuc mucmu: “Ŋic jaŋe mi manahape numbieŋ mecne, jaŋe qa bâʒâic enarembieŋ me weniŋuc i mi manasukopac. No wemocte mi ɋârekopac? No waiŋ opâ ʒuhuckerâ nâzore enarekac.”