1Iwe, ewe Samol mi Lapalap a kapas ngeniei,
2“Nöün aramas, kopwe newenewen ngeni ekewe chukun Israel, pwe kopwe osuni usun ar repwe feiengau.
3Iwe, kopwe apasa: Ämi chukun Israel, oupwe rongorong alon Kot ewe Samol mi Lapalap. Pun iei mine Kot ewe Samol mi Lapalap a apasa ngeni ekewe chukutekia me chukutekison, ngeni ekewe pwokur me ekewe lemol: Ngang üpwe fokun awarato womi efoch ketilas, pwe üpwe ataela ekewe leni ia aramas ra fel ngeni ekewe uluulun anümwäl ie.
4Ekewe rongen asor repwe tatakisitiu, nge ekewe rongen asoren ötüöt repwe mökküla. Iwe, üpwe niela ekewe aramas fän mesen ar kewe uluulun anümwäl.
5Üpwe anomu somän ekewe chon Israel fän mesen ar kewe uluulun anümwäl, üpwe pwal atoropasafeili chür ünükün ekewe rongen asor.
6Ekis meinisin ia oua nom ie telinimwemi me ämi kewe lenien fel won ekewe leni tekia repwe tala, pwe ämi kewe rongen asor me ämi kewe uluulun anümwäl repwe mökküla o tatakisitiu, ämi rongen asoren ötüöt repwe sönüla, nge föriemi angang repwe mola.
7Iwe, aramas repwe ninnila me leimi, pwe oupwe silei pwe ngang ewe Samol mi Lapalap.
8Nge üpwe amanaua ekoch leimi. Ir repwe sü seni ewe män feiengau o toropasfeil lein chon ekewe mwün fanüfan.
9Mürin, chokewe me leimi mi chüen manau repwe chechemeniei me lein ekewe mwü ia ra oola ie, lupwen üpwe atai letiper mi kirikiringau ngeniei o kul seniei, o achuna meser mi mocheisou ngeni ekewe uluulun anümwäl. Mürin repwe püsin oputeer pokiten ekewe föför mi ngau o anioput ra föriir.
10Iwe, repwe silei pwe ngang ewe Samol mi Lapalap. Ewer, epwe fokun fis mine üa apasa usun ewe feiengau üpwe afeiengaueer ren.”
11Iei alon Kot ewe Samol mi Lapalap, “Isikiel, kopwe aitietä poum o pupures ren om letipeta, kopwe pwal apasa, ‘Feiengauen chon Israel pokiten ar kewe föför mi ngau o anioput meinisin.’ Pun repwe mäla lon maun, ren lengita me mätter.
12Iwe, ir mi nom won fanü toau repwe mäla ren mätter, nge ir mi nom won fanü mi arap repwe mäla lon maun, nge ir mi chüen manau me mürin repwe mäla ren lengita. Iei usun üpwe fokun song ngeniir.
13Iwe, repwe silei pwe ngang ewe Samol mi Lapalap, lupwen ar kewe somä ra itifengen lein ar kewe uluulun anümwäl ünükün ar kewe rong, won ekewe chukutekison meinisin pwal won ungen ekewe chukutekia, fän iteiten irä mi mwuresires me iteiten ook mi palapal, pwal ekis meinisin ia ra eäni asor ie mettoch mi pwokus ngeni ar kewe uluulun anümwäl.
14Iwe, üpwe aitiela pei ngeniir, pwe üpwe atai ewe fanü ekis meinisin ia ra nonom ie, pwe epwe tala o pön seni ewe fanüapö mi nom ör tori Ripla mi nom efeng. Mürin repwe silei pwe ngang ewe Samol mi Lapalap.”
