Sie Chronicle 16

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Elos usla Tuptup in Wuleang nu in lohm nuknuk se David el akoela nu kac, ac elos filiya loac. Na elos orek kisa ac mwe kisa in akinsewowo nu sin God.

²Tukun David el orek kisa tari, el akinsewowoye mwet uh Inen LEUM GOD,

³ac el kitalik mwe mongo nu selos nukewa. El sang nu sin kais sie mukul ac mutan in Israel kais soko lof in bread, ipin ikwa manman se, ac kutu raisin.

⁴David el sulela kutu mwet in sruf lal Levi tuh elos in kol alu lalos nu sin LEUM GOD lun Israel, ac elos on ac kaksakunul ye mutun Tuptup in Wuleang.

⁵Asaph pa sulosolla tuh elan mwet kol, ac Zechariah el mwet kasru lal. Jeiel, Shemiramoth, Jehiel, Mattithiah, Eliab, Benaiah, Obed Edom, ac Jeiel pa ac srital ke harp. Asaph pa srital ke cymbal,

⁶ac ma kunen mwet tol luo, Benaiah ac Jahaziel, in uk mwe ukuk ye mutun Tuptup in Wuleang ke len nukewa.

⁷Pa inge pacl se emeet David el sang kunokon se inge nu sel Asaph ac mwet Levi wial, tuh in elos pa on ac kaksakin LEUM GOD.

⁸Sang kulo nu sin LEUM GOD, ac fahkak fulat lal; Fahkak orekma lal nu sin mutanfahl uh.

⁹On ac kaksakin LEUM GOD; Fahkak orekma wolana ma El orala.

¹⁰Kut in engan lah kut ma lal; Lela mwet nukewa su alu nu sel in arulana engan!

¹¹Ngetak nu sin LEUM GOD tuh Elan kasrekowos, Alu nu sel pacl e nukewa.

¹²Esam orekma sakirik El orala, Mwenmen lal ac nununku lal su El fahkla.

¹³Kowos fwil natul Jacob, mwet kulansap lal, Tulik nutin Israel, su God El sulela.

¹⁴LEUM GOD El God lasr; Ma sap lal ma nu sin faclu nufon.

¹⁵Nikmet mulkunla wuleang lun God, Su El orala tuh in oan ma pahtpat,

¹⁶Wuleang su El oakiya inmasrlol ac Abraham, Aok, wulela lal nu sel Isaac.

¹⁷LEUM GOD El orala sie wulela yorol Jacob, Sie wulela su fah oan ma pahtpat.

¹⁸El fahk, “Nga ac fah asot facl Canaan nu sum. Ac fah mwe usru lom sifacna.”

¹⁹Mwet lun God elos mwet pu, Elos tuh mwetsac in facl Canaan.

²⁰Elos forfor liki sie mutunfacl nu ke sie pac mutunfacl, Liki sie tokosrai nu ke sie pacna tokosrai.

²¹Tuh God El tia lela kutena mwet in akkeokyalos; El karingnalos ke El kai tokosra saya ac fahk,

²²“Nik kowos aklokoalokye mwet kulansap sulosolla luk; Nik kowos kalyei mwet palu luk.”

²³On nu sin LEUM GOD, kowos mwet faclu nufon! Fahkak pweng wo ke len nukewa lah El molikutla.

²⁴Fahkak wolana lal nu sin mutanfahl uh, Fahkak orekma ku lal nu sin mwet nukewa.

²⁵LEUM GOD El fulat, ac fal in arulana kaksakinyuk El; Lela in akfulatyeyuk El yohk liki god nukewa.

²⁶Tuh god lun mutunfacl saya kewa elos ma sruloala na, A LEUM GOD El orala kusrao.

²⁷Wolana ac sunak apnulla, Ku ac insewowo nwakla Tempul lal.

²⁸Mwet nukewa fin faclu, kowos in kaksakin LEUM GOD, Kaksakin wolana lal ac ku lal.

²⁹Kaksakin Ine wolana lun LEUM GOD; Fahsru nu in Tempul lal ac use mwe sang lowos nu sel. Epasr ye mutun El su Mutal ke El sikyak;

³⁰Rarrar ye mutal, kowos faclu nufon! Faclu oakwuki ku, ac tia ku in mokleyuk.

³¹Kusrao ac faclu, kowos in enganak! Fahkak nu sin mutanfahl uh lah LEUM GOD El tokosra.

³²Meoa ac ma nukewa loac in ngirngir; Lela inima uh ac ma nukewa we in enganak!

³³Sak insak uh elos fah sasa ke engan Ke LEUM GOD El ac tuku in leumi faclu.

³⁴Sang kulo nu sin LEUM GOD, mweyen El wo; Lungse lal oan ma pahtpat.

³⁵Kowos in fahk nu sel, “O God, Mwet Lango lasr, molikutla; Uskuteni nu sie, ac molikutla liki mutunfacl saya, Tuh kut fah ku in sang kulo Ac kaksakin Ine mutal lom.”

³⁶Kaksakin LEUM GOD, God lun Israel! Kaksakunul inge ac nu tok ma pahtpat! Na mwet nukewa elos fahk, “Amen,” ac elos kaksakin LEUM GOD.

³⁷Tokosra David el sang tuh in ma kunal Asaph ac mwet Levi wial ah tuh elos in liyaung alu in acn se ma Tuptup in Wuleang oan we. Na elos in oru orekma lalos we ke len nukewa nwe tok.

³⁸Obed Edom wen natul Jeduthun, ac mwet onngoul oalkosr in sou lal pa mwet kasru lalos. Ma kunen Hosah ac Obed Edom in topang ke mutunpot.

³⁹Tusruktu ma kunen mwet tol Zadok ac mwet tol wial, in karingin alu nu sin LEUM GOD ke nien alu in acn Gibeon.

⁴⁰Ke lotutang ac eku nukewa, elos oru mwe kisa firir fin loang uh, fal nu ke ma simusla in Ma Sap su LEUM GOD El tuh sang nu sin Israel.

⁴¹Sayen mwet tol inge, Heman ac Jeduthun oelulos, ac oayapa kutu pac mwet su sulosolla tuh elos in on in kaksakin LEUM GOD ke sripen lungse lal su oan ma pahtpat.

⁴²Ma kunen Heman ac Jeduthun in karinganang trumpet ac cymbal ac oayapa mwe on saya ma orekmakinyuk ke pacl on in kaksak inge orek uh. Ma kunen mwet in sou lal Jeduthun in topang ke mutunpot uh.

⁴³Na mwet nukewa folokla nu acn selos, ac David el folokla pac nu acn sel nu yurin sou lal.