BƐBAATÍBƐ̀ 11:21-40

²¹Kɛ̀ ti Yiɛ̀ nKuyie nyIsidɑyɛɛribɛ tũ nkùu duɔ́ nkɛ̀ bɛ̀ɛ nɑ Sionni nɛ̀ o nìtìbɛ̀, kɛ́fietɛ o tenkɛ̀ kɛmɔu,

²²kɛ́túótɛ́ Amɔriibɛ tenkɛ̀ kɛmɔu kɛ́ketɛ́ Adinɔ kubiriku kɛ́tuɔkɛnɛ̀ kukó nYɑɑbɔku, kɛ́túótɛ́ dibiri kó dikpɑ́ɑ̀ kɛ́tuɔkɛnɛ̀ Suditɛ̃ɛ̃.

²³Ti Yiɛ̀ nKuyie ntínti Isidɑyɛɛribɛ tũ nkù, kuù duɔ́ nkɛ̀ ti fìètɛ Amɔdiibɛ tenkɛ̀ kɛ̀ fɔ̃́ nnɛ́ dɔ́ kɛ́ kɛ̀ cɔutɑ́ɑ̀?

²⁴A kó dibɔɔ̀ Kemɔɔsi dɑ duɔ́mmu kɛtenkɛ̀ kɑ̀ɑ kɛ̀ te. Ti Yiɛ̀ nKuyie nti duɔ́ nkɛ̀, ti kɔkɛ nkɛ, kɛ̀ ti dò nkɛ́ nkɛ̀ te.

²⁵A yɛ̀mmɛ̀ dò nhɑ kpeńnìnɛ̀mu Sipɔɔ birɛ Bɑdɑki Mɔɑbu ɛì kóo kpɑ̀ɑ̀tɑ̀ɑ̀? Ò í wɑmmú nɛ̀ Isidɑyɛɛribɛ dikpɑ̀nnì, ò í bɛ̀ dokɛ́nɛ̀.

²⁶Nɛ̀ Isidɑyɛɛribɛ bomɛ̀ Ɛsibonni ɛì nɛ̀ di pɛɛ́mmɛ̀ nɛ̀ Adowɛɛ ɛì nɛ̀ di pɛɛ́mmɛ̀ nɛ̀ Adimɔɔ pɛɛ́mmɛ̀ kpɛyɛ dɛ̀ mɔ̀kɛ yɛbie nsikɔusìtɑ̃ɑ̃ti ndi (300), dɛ̀ yĩmɛ kɛ̀ di í cɔutɛ́ dɛ kó kɛtenkɛ̀ nɛ̀ yíenní?

²⁷N yí dɑ cɑ̀ɑ̀rɛ̀ mùmɑmù, fɔ̃́ɔ̃̀ n wɛ̃̀ńtɛ́ kɛ n dɔ́nɛ̀ dikpɑ̀nnì. Ti Yiɛ̀ nKuyie nkuù bo ti pútɛ́ yíe ntínti Isidɑyɛɛribɛ nɛ̀ díndi Amɔniibɛ.

²⁸Kɛ̀ Amɔniibɛ kpɑ̀ɑ̀tìi yetɛ Sɛfutee nɑ̀kɛ́ tì.

²⁹Dɛ mɔ̀nnì kɛ̀ ti Yiɛ̀ nKuyie nYɑɑ́ ncútɛ́ní Sɛfutee ĩ́nkɛ̀, kòo ítɛ́ kɛ́ce nKɑdɑɑdi tempɛ̃ nyimɔu, nɛ̀ Mɑnɑnsee kpɛyi kɛ́pɛ̃ɛ̃tɛ́ kɛ́kɔtɛ Misipee kɛ́sɔɔtɛ́nɛ̀ Amɔniibɛ tenkɛ̀,

³⁰kɛ́dɔúnnɛ̀ ti Yiɛ̀ nKuyie ndinùù kɛ dɔ̀: Ti Yiɛ̀ nKuyie nkɑ̀ɑ duɔ́ nkɛ̀ n nɑ Amɔniibɛ,

³¹m bo nkũntiní kɛ̀ wèè niitɛ́ kɛ́yɛ̀nní oketiwè n cĩ́ɛ̃̀tɛ̀ kɛ́ n co, m bo wè ndɑ pɑ̃, kɛ wè ndɑ kuɔ kɛ́tuɔ.

³²Mɛm̀mɛ Sɛfutee tɑmɛ̀ Amɔniibɛ tenkɛ̀ kɛ́ bɛ̀ do, kɛ̀ ti Yiɛ̀ nKuyie nduɔ́ nkòo bɛ̀ nɑ.

³³Kɛ̀ kùu ò teennɛ̀ kòo bɛ̀ potɛ́ kɛ́fietɛ yɛhɛkɛ̀ sipísìdɛ́ kɛ́túótɛ́ Adowɛɛ, dihɛì dìì tɔ̀kɛ́nɛ̀ Miditi kɛ́ntɔ kɛ́tuɔkɛnɛ̀ Abɛdi-Kedɑmimmu kɛ́ bɛ̀ ɑutɛ́ mɛdiɛ̀, kɛ̀ Amɔniibɛɛ bɔ́útɛ́ Isidɑyɛɛribɛ.

³⁴Mudoò dèè dìì mɔ̀nnì kɛ̀ Sɛfutee nkũntiní o cĩ́ɛ̃̀tɛ̀ Misipɑɑ, kòo kóo sɑpɑ̀ɑ̀ nweè yɛ̀nní kóò co kɛ bie ndibɑ̀rì kɛ ɑuti. Ò do we mmɔkɛ omɑ́ɑ̀.

³⁵Sɛfutee ò yɑ̀ní dìì mɔ̀nnì kɛ́kɛ̃tɛ́ o yɑ̀ɑ̀tì kɛ́kuɔ́nko kɛ dɔ̀: M birɛ ɑ cɑ̀ɑ̀rɛ̀ n yɛ̀mmɛ̀ mmɛ kɛ n kɔ̀utɛ, n dɔúnnɛ̀ ti Yiɛ̀ nKuyie nku dinùù, n tɛ̃́nkɛ í yóó nɑ kɛ́ di kpɑ̀tɛ.

³⁶Kòo kóo sɑpɑ̀ɑ̀ nhò tɛ̃̀ńnɛ́ kɛ dɔ̀: Kɑ̀ɑ dɔúnnɛ̀ ti Yiɛ̀ nKuyie ndinùù n dɔɔ̀nɛ̀ ɑ dì nkù dɔúnnɛ̀ kɛ yɛ̃ mmù kɛ yɛ̃́ kuù dɑ teennɛ̀mɛ̀ kɑ̀ɑ nɑ ɑ dootitɔbɛ̀ Amɔniibɛ,

³⁷kɛ́yíɛ́ kɛ́bɛ́i nkɛ dɔ̀: A nɛ́ m pɑ̃ mɛfíè mbɛtɑ̃̀ɑ̃̀bɛ̀ bɛ̀dɛ́bɛ̀ kɛ̀ n dekɛ ditɑ̃rì ĩ́nkɛ̀ nɛ̀ n dúɔ̀bɛ̀ kɛ́kɔmmú n yóó kúmɛ̀ kɛ í yĩ̀ɛ̃́tɛ́ onitidɔ̀ù.

³⁸Kɛ̀ Sɛfutee ò pɑ̃ kucɛ kòo dekɛ ditɑ̃rì nɛ̀ o dúɔ̀bɛ̀, kɛ dɔ̀ bɛtɑ̃̀ɑ̃̀bɛ̀ bɛ̀dɛ́bɛ̀, kɛ kuɔ̀ nhò yóó kúmɛ̀ kɛ í yĩ̀ɛ̃́tɛ́ onitidɔ̀ù.

³⁹Bɛtɑ̃̀ɑ̃̀bɛ̀ bɛ̀dɛ́bɛ̀ dèè dìì mɔ̀nnì kòo wɛ̃tɛní o cicɛ borɛ̀ kòo ò dɔ̀ɔ̀nɛ̀ ò dɔúnnɛ̀ dìì nùù ti Yiɛ̀ nKuyie. Mɛm̀mɛ ò kumɛ̀ kɛ mu nyí yĩ̀ɛ̃́tɛ́ onitidɔ̀ù. Kɛ̀ dɛ̀ nɑɑ́ nyIsidɑyɛɛribɛ kó ikuɔ́.

⁴⁰Bɑ́ dìì benni kɛ̀ bɛnitipòbɛ̀ ɔ̃ɔ̃ kɔtɛ kɛ́kɔmmú Kɑdɑɑdi kou, Sɛfutee birɛ kpɛ́í nkɛ dɔ̀ yɛwe yɛ̀nɑ̀ɑ̀.