HAHEMAORO TAUDIA 11:21-40

²¹Bena Iehova, Israel Diravana, ese Sihon mai ena orea taudia iboudiai na Israel taudia imadia ai e atodia. Bena idia ese e hadareredia; taunabunai Israel taudia ese Amoro taudia, una tano ai e nohova taudia, edia tano idoinai e abia.

²²Amoro taudia edia tano idoinai e abia, edia: Aranon sinavaina amo ela bona labok sinavaina, bona tano ḡaḡaena amo ela bona londane sinavaina.

²³Benaini, Iehova, Israel Diravana, ese Amoro taudia edia tano na edia amo e abia oho, ena bese Israel e henia. Matona, oi ese bavabia a?

²⁴Emu dirava Kemoso ese vada e henimu tanodia bavabi, ani, emu tano? A Iehova, emai Dirava, ese ai vairamai ai e luludia lasi taudia edia tano na ai ese baia abi, emai tano.

²⁵Oi ese Balak Siporo, Moab pavapavana, o hereaiamu a? Nega ta ia ese Israel taudia e ala-ala henidia eiava e tuari henidia a?

²⁶Israel na laḡani sinahu-toi Hesebon mai ena hanua maraḡidia ida, bona Aroere mai ena hanua maraḡidia ida, bona Aranon sinavaina isena hanuadia iboudiai, e noholai: dahaka dainai una negana ai asio abidia lou?

²⁷Taunabunai, lau ese asina hadikamu, a oi hari o tuari henigumu bona o kara dika henigumu. Iehova, Hahemaoro Diravana, ese Israel taudia bona Amono taudia baine hahemaoro henidia, hari ina dina ai.

²⁸A Amono pavapavana ese Iefeta ena gwaukau herevana se abia dae.

²⁹Iehova ena Lauma ese leieta e rohea, bena ia ese Gilead bona Manase tanodia e rakadia hanai, ela bona Mispa, Gilead tanona ai; unu amo Amono taudia e lao henidia.

³⁰Iefeta ese Iehova e gwau henia hamata, eto, Amono taudia na lau imagu ai boma atodia,

³¹bena mai kwalimugu ida Amono taudia ituarihenidia amo baina lou mai negana ai na egu ruma iduarana amo dekegu baine raka lasi guna ḡauna na Iehova ena: gole-oho boubouna ai baina halaoa.

³²Taunabunai, Iefeta na e hanai, Amono taudia e tuan henidia; bena Iehova ese ia imana ai e atodia.

³³Bena ia ese e aladia, Aroere amo ela bona Miniti badibadinai. Hanua ruahui e abidia, ela bona Abele-keramim, mai ala-ala bada hereana ida. Taunabunai, Amono taudia vada e darere, Israel taudia vairadiai.

³⁴Bena Iefeta na ena ruma e lou henia, Mispa ai. Bena ia natuna kekenina na ia dekena e raka lasi, imana mai tarekodia, bona mai mavaruna ida. Ia na natuna vara-edeana; asi natuna idauna ta, maruanena eiava hahinena.

³⁵Bena e itaia negana ai na ena dabua e darea, eto, Natugu o, madi ihabaigu! Vada o hahemaraigu; vada o hahekwakwanaigu. Badina be Iehova vada na gwau henia hamata, bena egu hereva na basina ha-idaua diba.

³⁶Kekeni na eto, Tamagu e, bema Iehova o gwau henia hamata, emu hereva heḡereḡerena ai ba kara henigu; badina be Iehova ese oi inaimu, Amono taudia, vada e hadareredia, oi daimu ai.

³⁷Bena kekeni ese tamana e noia, eto, Mani emu kara ini ba karagu toma: hua rua mo ba kahugu nege, bainala, mai bamogu kekenidia ida ororo ai baia loaloa, rami-hebougu ai baina mase taina baia tai.

³⁸Ia eto, Aola. Bena e kahua nege, hua rua. Ia na mai bamona kekenidia ida ela, ororo ai e taitai, rami-hebouna ai baine mase dainai.

³⁹Hua rua e ore, bena kekeni ese tamana e lou henia. Bena tamana ese ena gwau-hamata heḡereḡerena ai e kara henia. Kekeni na tau ta ida do se eno bou. Una dainai kara ta vada e vara Israel ai:

⁴⁰laḡani ta ta amo Israel kekenidia ese dina hani Iefeta, tau Gilead, natuna kekenina taina e taiva.