Judges 11:21-40

²¹Machane SOMOL ni Got rok yu Israel, e gel nagrad ko mael ngak Sihon nge pi salthaw rok. Ma aram me yog yu Israel lungung urngin yang ni tafen yu Amor ni ur pired u lan e re nam nem.

²²Miyad par nga urngin e yungin ntafen piyu Amor ni tabab u Arnon u lan e yimuch nge taw nga Jabbok u lan e lel’och ngu daken e desert u ba’ ni ngek nge mada’ ko ba’ ni ngal e Jordan.

²³Ere SOMOL ni Got rok yu Israel e ir e tuluf piyu Amor ni fan ngak e tirok e girdi’, ni piyu Israel.

²⁴Ere gimed be guy rogon ni ngam fulwegned? Mu ted romed urngin e tin ke pi’ Kemosh ni got romed ngomed. Machane gamad e nge par romad gubin e tin ke pi’ SOMOL, ni Got romad ngomad.

²⁵Gimed be leamnag ni gimed ba cheag boch ngak Balak ni fare mo’on ni fak Zippor ni Pilung nu Moab? I ir e dariy bingyal’ nni tagenging nga Israel, fa bay? Ka’a yib bingyal’ ni mael ngomad?

²⁶Ke gaman e 300 e duw nike par yu Israel u Heshbon ngu Aroer, nge pi yuchi binaw nib liyeg, nge urngin e pi binaw u teal e Lul’ ni Arnon. Ere mangfan ni ka’aram n’umngin nap’an i yib mdawor mu sulweged e pi yungi binaw ney?

²⁷Danga’, dawor gu rin’ ban’en nib kireb ngom. I gur e ga be rin’ e kireb ni ga be m’ag e mael ngog. I SOMOL e ir e nge duwgiliy. Daba’ e bayi turguy ko piyu Israel fa piyu Ammon.”

²⁸Machane fare pilung nu Ammon e de motoyil ko pi thin ney ni yib rok Jefthah.

²⁹Ma aram me yib gelngin SOMOL nga daken Jefthah. Me yan nge th’ab daken yu Gilead ngu Manasseh me sul nga Mizpah u lan yu Gilead me yan riy nga Ammon.

³⁰Me micheg Jefthah ngak SOMOL ni ga’ar: “Fa’an ga ra gel nageg ko mael ngak e piyu Ammon,

³¹Ma bay gu urfiy ni maligach e cha’ nth’abi som’on nra yib u lan e naun rog nga wean ni nge mada’ nigeg, u nap’an ni gu ra sul ko mael ni kug gel. Gu ra pi’ e cha’nem ngom nib maligach.”

³²Ma aram me th’ab Jefthah e lul’ ni nge cham ngak piyu Ammon, me SOMOL e gelnag.

³³Me cham ngorad u Aroer ngar mada’gad ko fa gin’en nib liyeg yu Minnith, rliw’ e binaw u gubin, me yan nge taw nga Abil Keramim. Ri bo’or e girdi’ nli’rad ngarm’ad, me gel piyu Israel ngak piyu Ammon.

³⁴Nap’an ni sul Jefthah nga tafen u Mizpah, me yib be’ ni bpin ni fak nga wean ni nge mada’nag, ni be churu’ ma be chubeg e tambourine. Chipin nem e karimus fak aram.

³⁵Ma nap’an ni guy fa chipin, me guchthuy e mad rok ni gelngin e kireban’ rok me ga’ar, “Ah, fakag! Karim kirebnag lanin’ug! Mangfan nri gur e ngam k’aring e amith nga lanin’ug? Kug ngongliy ba m’ag ni kug micheg ngak SOMOL, ni dabkiyag ni nggu sulweg!”

³⁶Me ga’ar fa chipin ngak, “Fa’anra kam ngongliy ba michmich ngak SOMOL, ma ga rin’ e tin kamog ni ngam rin’ ngog, ya ke ayuwegnem SOMOL ke pi’ e pi to’ogor rom nga pa’am, ni piyu Ammon.”

³⁷Machane me ning ngak e chitamngin ni ga’ar, “Mu rin’ e ta’abney ni fan ngog. Mu pageg nge yan rogog ngog ni l’agruw e pul, ya nge yag ni nggu’un ko pi tafger rog ngu’ug warod u fithik’ e burey ma gamad be yor nigeg ni thingar gum’ ni dawor gu nang e pumo’on.”

³⁸Me yog e chitamngin ngak ni nge yan ni l’agruw e pul. Me yan fachi pin nge pi tafger rok ngar forthoggad nga fithik’ e burey ngu’ur yorgad ni bochan e fachi pin e nge yim’ ni dawri mabgol ma dawori fakay e bitir.

³⁹Tomuren fa gal pul me sul ngak e chitamngin. Me rin’ e chitamngin e n’en nike micheg ngak SOMOL, me yim’ fachi pin ni dawori nang e pumo’on. Ma aram me par nike mang ba yalen u lan yu Israel

⁴⁰nma yan e pi’in ppin nu Israel nga daken e ted ni aningeg e rran u reb e duw ngu’ur yor niged fare pin ni fak Jefthah nu Gilead.