1Sumalà te suǥù te Nengazen, mid-awà is tivuuk he keet-etawan te Israel ziyà te sibsivayan he Sin ne midlaus dan te kedhipanew zan. Neketulung en sikandan mekahalinhalin taman te nekeuma zan diyà te sevaha he lugar. Ne ziyè dan megkampu te Refidim, piru wazà wahig he egkeinum diyà.
2Umbe midtebek dan si Moises ke sikandan te, “Beǥayi key te wahig he egkeinum dey.” Ne midtavak si Moises te, “Maan is edtebeken a keniyu? Maan is egezaman niw is Nengazen?”
3Piru egkengemezahan utew haazà is menge etew zutun, umbe mibpedayun is kedriklamu zan diyà te ki Moises. Ke sikandan te, “Maan is impeǥawas key pa kenikew ziyà te Ehipto? Ebpematey key zè bes te kegkemezahi kayi duma te menge anak dey wey menge uyaǥen dey.”
4Ne zutun mibuyù te tavang si Moises diyà te Nengazen, “He Nengazen, hengkey is ebeelan ku kayi te menge etew? Samè dà kenè e zan penulenga te vatu!”
5Midtavak is Nengazen diyà te ki Moises te, “Kuwaa nu is tuked nu he inlagkut nu te Wahig he Nilo, ne huna ka te menge etew. Dumaha nu is duma he menge ebmeǥurangen te menge Israilihanen.
6Edtaǥazan ku sikew ziyà te vatu ziyà te Horeb. Emun dutun ke en, legkuta nu haazà is batu, ne edtudà puun dutun is wahig su wey zuen egkeinum keniyan te menge etew.” Ne mid-ulaula ni Moises haazà dutun te etuvangan te menge edumala te Israel.
7Ne haazà he lugar migngezanan, ni Moises te Masa wey Meriba, su geina te zutun sikandin tebeka te menge Israilihanen wey migezaman dan is Nengazen pinaaǥi te kegkaǥi te, “Midumahan kiw ve te Nengazen etawa wazà?”
8Midsurung te menge Amalikanhen is menge Israilihanen hein diyè dan pa te Refidim.
9Ne migkaǥi si Moises diyà te ki Josue te, “Pilì ka te menge sakup tew kayi he ebpekidtebek keniyan te menge Amalikanhen. Ne keeselem edhitindeg a ziyà te vuvungan is egkulang duen te tuked te Nengazen.”
10Umbe, mibpekidtebek ensi Josue te menge Amalikanhen sumalà te insuǥù kandan ni Moises hein kemulu pa si Moises, si Aaron, wey si Hur edtekezeg diyà te vuvungan.
11Ne zutun te imbayew ni Moises is menge velad din, nekezaag is menge Israilihanen, iyan, emun ibpezizalem din is menge velad din, ne iyan ebpekezaag is menge Amalikanhen.
12Ne hein neuǥet en ne neveley en is menge velad ni Moises. Umbe migkuwa si Aaron wey si Hur te vatu ne zutun dan ipepinuu si Moises. Ne mibpeziveluyà si Aaron wey si Hur is egawed te menge velad ni Moises taman te kedsanlep te andew.
13Umbe nezaag eni Josue is menge Amalikanhen.
14Ne migkaǥi is Nengazen diyà te ki Moises te, “Isurat nu heini zuen te libru para kenà heini melipati ne ipehibelu nu heini ki Josue: Edezeetan ku is menge Amalikanhen.”
15Ne mibaal si Moises te pemuhatà he migngezanan din te, “Iyan Bendirè ku te Kezeeǥan is Nengazen.”
16Ke sikandin te, “Tenged te impaahà te menge Amalikanhen is kedsukul zan te Nengazen, ne kenà ed-engkezan te Nengazen te edtebek is menge Amalikanhen taman te taman.”
