Esodo 17

1

2

3

4

5

6

7

8

9

10

11

12

13

14

15

16

17

18

19

20

21

22

23

24

¹Isaraela moutuana Sini barabarana se laugabaei se sigilau begana begana, GUIAU ena lauhesom arinai i lau e Repidim edi numa lulu se hetorodi. Na nei eai nige goila bena tatao se nom.

²Arinai tatao Mose se hegiru si ene, “Goila u leama bena ai nom.” Na Mose i ene, “Paana saha au hegirugu? Eo paana saha GUIAU au lau ita?”

³Na tatao nei eai se gadomagu ariri bena goila se nom, eo tatao Mose se monumonunuei, si ene, “Paana saha Aigupito eai u woeahaimai abo ai, eo nanatumaiyao eo ema suisui abo u unuimai gadomagu arinai?”

⁴Arinai Mose i eogalau GUIAU arinai, “Abo saha ea ginauri tatao ta aridi eai? Se nonoha begana abo se lauwe’uigu.”

⁵Eo GUIAU i ribalau Mose arinai i ene, “Tatao u bagunaedi Isaraela edi babadayao headi maemyao, eo nimam eai em tu’e wa u abi, tu’e wa arinai saga ue oi, na u lau.

⁶U ita abo matam eai ea toro we’utau potana eai Horeba eai, we’u abo u oi’ita eo goila abo arinai i didima bena tatao se nom.” Mose hinage i ginauriwatai Isaraela edi babadayao matadi eai.

⁷Tupo ne esana ie tore Masa eo Meriba, Isaraela edi lauhegiru debana eai, eo paana GUIAU bena se lau ita, si ene, “GUIAU ia boeada eai, e nige’e?”

⁸Abo Amaleka tataodi se laoma eo Isaraela tataodi se ialaidi Repidim eai.

⁹Eo Mose i ribalau Iosua arinai i ene, “Tatao enamai u hineridi eo au torohai au lau Amaleka tataodi au ialaidi: maraitom abo oea tupina potana eai ea toro, Eaubada ena tu’e nimagu eai.”

¹⁰Arinai Iosua i lauwatai gonogonoana doha Mose i ribaei, eo Amaleka tataodi i ialaidi: abo Mose, Arona eo Hura se sae oea tupina eai.

¹¹Abo ena Mose nimana i lausini Isaraela tataodi se adidiri, eo ena nimana i toredobei Amaleka tataodi se adidiri.

¹²Na Mose nimana se ape’ape, arinai we’u se abi se torelaei ena ababawa, eo i bawa potana eai, eo Arona eo Hura nimana se lausinidi esau tupo esau eai, esau tupo esau eai; abo nimana se adidiri esegai i lau e mahana ie dui.

¹³Eo Iosua elepa eai Amaleka tataodi i oidobedobedi.

¹⁴GUIAU i ribalau Mose arinai i ene, “Ina ta abo u uridobei buka eai bena emi abahenuaisini, eo abo au hasiri Iosua beana eai, bena abo Amaleka tataodi esadi ea la’ahaigabaedi galewa ubuna eai.”

¹⁵Mose aba‐aitalasam abo i hetoro, eo esana i atai, ‘GUIAU egu gora ede.’

¹⁶I ene, “Paana nimadi se lausinidi GUIAU se ialai arinai GUIAU Amaleka tataodi i ialaidi i lau e isina to isina.”