1Eme Abia e apa ŋosafâcne jaŋerao ʒuhuckehuc hâmome Dawidire hae qizecko duckembiŋ. Ehame ŋokâ‐ticne Asazi tucticne qarâ ŋicwofuŋ juwec. E ŋicwofuŋ juhame mâreŋ ira wama fuarâ foha jara 10 tarawec.
2Eme Asa e Wofuŋ Anutu‐ticnere maio wiac biaŋne â fâretiŋ ebac ewec.
3E alata jabane â furu mâreŋ i hetâtiehuc wâtuŋ â Aserim nemuɋâŋ henʒaŋ qanʒaŋne‐fârewec.
4Ehuc Judaŋic jaŋe apa ŋosafâc‐jeŋic jaŋere Wofuŋ Anutu e wira basac ecnehuc sâcmutâc dâŋqâhâc â sâcmutâc soŋaŋkehuc juniŋte mujarewec.
5Erâ wâc Juda hae sâc ira furu mâreŋ â hosâc âsu ririkere alata ŋerawec i hetâtie‐fârewec. Eki ŋicwofuŋ juha uucmaŋ‐ticnao wama fuarâ fowec.
6Eme mâreŋ ira wama fuarâ fowecte e Juda mâreŋko hae sacsanaŋ‐jeŋichec barawec. Wofuŋzi wama tahackewecte jara irec maŋnao ʒika wiac moc mi fuawec.
7Eme Asa e Judaŋic ʒiŋuc jazawec: “Nâŋâc hae ʒi barahuc saczi orâŋke‐fârenʒepeneŋ, erâ ʒae â motâc â babasanaŋ wiac i râe‐fârenʒepeneŋ. Nâŋâc Wofuŋ Anutu‐nâŋec e wira basac ecnembeŋte mâreŋ i nâŋâcne jaha fokac. Nâŋâc e basahapene eki rârec rârec wama bâfua‐nârewec fokac.” Irec jaŋe hae i barahuc juhâc qâhâmombiŋ.
8Eme Asa e Judaŋic jaŋeraonec momori ŋic 300 tauseŋ jaŋe sându marohec jucnembiŋ â Benjamiŋ guru jaŋeraonec 280 tauseŋ jaŋe maro piticne â tepe bajumbiŋ. Ŋic i jaŋe sasawa qac momori jâmbâŋ jumbiŋ.
9Juku Etiopia ŋic Ʒerazi Judaŋic râsi rojarehuc momorifâcne 1 milioŋ â keretacfâcne 300 iŋuc rocjopame wareku Maresa haeo fisimbiŋ.
10Ehame Asa e bâfuac‐jopaocte rawec, rahame Maresa haeo wâneŋ moc ʒâŋene Zefata ira qaqac eniŋte birickembiŋ.
11Eme Asa e ʒiŋuc muhuc Wofuŋ Anutu‐ticne wâsickewec: “O Wofuŋ, tâpirihec â tâpiri tâmiric bafic‐jopazore go iŋucne moczi moc mi jukac. O Wofuŋ Anutu‐nâŋec, go bafic‐nâpoc. Nâŋe gore mamanac â gore ʒâŋeo sawa guru dindiŋ ʒi râsi fisi‐jareŋgopeneŋ. O Wofuŋ, go sawa Anutu‐nâŋec; ŋiczi go mi bawahacgunʒepieŋ.”
12Eme Wofuŋzi Asa â Judaŋic jaŋere ʒâŋe faio Etiopia ŋic bawahac‐jopame wisembiŋ.
13Ehame Asa â ŋicfâcne jaŋe jopa jâpec ejare raku Gerari haeo fisimbiŋ. Eme Etiopia ŋic jopakupie moczi moc mi juwec. Jaŋe Wofuŋte maio â Asare momorifâc jaŋere maio tâpiri‐jeŋic ŋeŋgoroŋkewec. Ehame Judaŋic jaŋe mafa mateŋ wiac‐jeŋic afecne mi rombiŋ.
14Jaŋe Wofuŋte hâwic‐jopawecte Gerari hae rârec rârec hae ŋerawec i imacke‐fârembiŋ. Ehuc hae sasawa irec maŋnao wiac furi sâko forawec i rofârembiŋ hâcne.
15Erâ bulimakao bacjopa jumbiŋ ŋic i jaŋere boze wiac i iŋuc jaha ima bafârembiŋ. Ehuc lama â kamele bocjaha jâmbâŋ bacjopa wisembiŋ. Jaŋe iŋuc ehuc Jerusalem haeo risiembiŋ.
