1 Cronica 22

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

¹Ne migkaǥi si David te, “Kayi he lugar edtukuza is baley te Nengazen he Megbevayà wey pemuhatà para te menge ibpemuhat te menge Israilihanen he edtutungen.”

²Midsuǥù si David he meburunburun is kenà menge Israilihanen he zutun med-ubpà te Israel, ne mibpilì sikandin dutun te kandan te metau he ebasbas te menge vatu para te valey te Megbevayà.

³Mibeǥey si David te utew mezakel he menge putew he ebeelan he menge ransang wey menge bisagra para te menge ǥemawan, wey mezakel he menge brunsi he kenè en egketimbang tenged te keveǥat din.

⁴Mibeǥey zaan sikandin te menge kayu he sidru he kenè en egkevilang tenged te kezakel zin. Heini he menge kayu, ne mid-uwit te menge tig-Sidon wey menge tig-Tyre ziyà te kandin.

⁵Migkaǥi si David te, “Betan-en pa is anak ku he si Solomon ne wazè din pa utew hanew. Kinahanglan he mekempet wey egkevantug kayi te tivuuk he kelibutan is edtukuzen he valey te Nengazen. Umbe edteǥenahan ku heini ǥuntaan.” Umbe mibpurungan heini pengendami ni David hein wazè pa sikandin mebpatey.

⁶Ne impetawag ni David sikan is anak din he si Solomon, ne midsuǥù din te kabangun te valey te Nengazen he Megbevayà te Israel.

⁷Migkeǥiyan ni David si Solomon te, “He mama, egkesuatan ku pezem he edtukud te valey te Nengazen para te kegkeveyawa te ngazan te Nengazen he iyan Megbevayè ku.

⁸Piru iyan heini migkaǥi zin kedì: ‘Utew mezakel he menge etew is nengepatey nu te memeinit he neseǥazan nu he kebpekidtebek. Umbe kenè ka iyan edtukud te valey para te kegkeveyawa te ngazan ku.

⁹Piru ebeǥayan ku sikew te anak he maama he edhadì he melinawen su kenà sikandin edsemuken te langun he menge kuntada zin he nekelingut kandin. Iyan ngazan din si Solomon, su ebeǥayan ku te kelinew is Israel dutun te kedhadì din.

¹⁰Iyan sikandin edtukud dutun te valey ku para te kegkeveyawa te ngazan ku. Edhimuwen ku sikandin he anak ku, ne egkehimu a zaan he amey zin. Ne is menge kevuwazan din ne egkehimu he hadì te Israel te wazè en pidtemanan.’

¹¹“Umbe mama, berakat he iyan is Nengazen eduma kenikew wey mebmelempusen ka te kedtukuza nu te valey te Nengazen he Megbevayè nu, sumalà te migkaǥi zin he ebeelan nu.

¹²Berakat he veǥayi ka te Nengazen he Megbevayè nu te ketau wey kedsavut wey nu meveeli is menge kesuǥuan din te timpu he iyan ke zin en ibpezumala te tivuuk he Israel.

¹³Ne emun egkepurung nu egketuman is menge suǥù wey menge sulunuzen he imbeǥey zin te Israel pinaaǥi ki Moises, ne ebmelempusen ka. Umbe mebpekelig-en ka wey mebpekevurut ka. Kenè ka mahandek wey mebpenluyaluya.

¹⁴Midheǥuan ku is kedteǥana te menge egkeǥamit kayi te kedtukuza te valey te Nengazen–3,500 he tunilada he vulawan, 35,000 he tunilada he pelata, wey mezakel pa he menge brunsi wey menge putew he kenè en egketimbang tenged te keveǥat dan. Midteǥana a zaan te menge kayu wey menge vatu, piru kinahanglan he umani nu pa heini.

¹⁵Mezakel is egkekuwa nu he ibpemeterebahu nu: duen ebpemasbas te vatu, menge tigsimintu, menge pandey, wey mezakel pa he menge etew he zuen menge netuenan te minsan hengkey he kedterebehuwa,

¹⁶te vulawan, pelata, brunsi, wey putew. Umbe ǥuntaan, puun ke en peterebahu ne verakat he zumahi ke te Nengazen.”

¹⁷Ne zutun migkeǥiyan ni David is langun he menge pengulu te Israel he uǥupi zan si Solomon he anak din.

¹⁸Migkaǥi sikandin diyà te kandan te, “Iyan duma niw is Nengazen he Megbevayè niw wey mibeǥayan kew zin te kelinew su wazè kew mekepekidtebek te nekeliǥuy keniyu he menge etew. Su imbeǥey zin kedì is langun he ed-ubpà kayi he tanà, ne ǥuntaan ne iyan en teǥiǥaked kayi is Nengazen, ne nesakup tew en heini te keet-etawan din.

¹⁹Umbe ǥuntaan, uvey kew te Nengazen he iyan Megbevayè niw te tivuuk he ǥehinawa wey kedsavut niw. Puuni niw en is kedtukuza te valey te Nengazen he Megbevayà para ikesavuk niw en dutun kes Kavan te Kebpekid-uyun te Nengazen wey kes menge segradu he menge gelemiten te Megbevayà keniyan te valey te Nengazen he midtukud para te kegkeveyawa te ngazan din.”