1Mɑ newɑɣɑ, mɑ tɑŋiyɑ nyɑ́. Mɑ sʋʋkɩ mɑ hɑlǝm tɑɑ nɑ mɑ́ cɑɑ mɑ tulɑɑlʋ miili nɑ tulɑɑlʋnɑɑ lɛlɑɑ. Mɑɑ tɔɣɔ mɑ tɩɩŋ sɛtɑɣɑ. Nɑ mɑ́ nyɔɔ mɑ sʋlʋm nɑ mɑ nɑɑlǝm. Mɑ tɑɑpɑlɑɑ mɛ ɩ́ tɔɣɔ nɑ ɩ́ nyɔɔ. Sɔɔlʋɣʋ ɩ́ kʋ-mɛ ɩsɩɩ sʋlʋm.
2Mɑ tookɑɣɑ yɑɑ, pɑɑ nɑ mpʋ mɑ́ nɑ mɑ ɩsɛ. Ḿpʋ́ɣʋ́ mɑ nɩɩwɑ mɑ kʋsɔɔlʋ nɔɣɔ nɑ ɩ́ lɑkɩ kɑɑfɑlɑ nɑ ɩ́ tɔŋ sɩ: Tʋlʋ-m, mɑ newɑɣɑ, mɑ kʋsɔɔlɑɣɑ. N wɛ-m teu kɛ́ ɩsɩɩ ɑlukuku, nyɑɣɑlɛ mɑ kʋpɑŋkɑ. Mpi tɔ, ɑhoo cɔlɔʋ kpɑ-m kɛ́ nɑ mɑ nyɔɔsɩ tɔɔ nɑ lʋm.
3Mɑ tɛmɑ mɑ wontu wɔɣɔsʋɣʋ. Ɩsǝnɑɣɑlɛ mɑɑ tɑɣɑnɩ-tǝɣɩ suuu? Pǝ́cɔ́ mɑ kɔwɑ mɑ nɔɔhɛɛ. Ɩlɛ ɩsǝnɑɣɑ mɑɑ tɑɣɑnɩ-yɛɣɛ pilisuɣu tɔtɔ?
4Ḿpʋ́ɣʋ́ mɑ kʋsɔɔlʋ sʋsɑ ɩ niŋ nɑ pɔɣɔtɛ. Nɑ mɑ lɑŋlɛ tɑɑ lɑ tǝnyɑɩɩ.
5Ɩlɛnɑ mɑ́ kʋlɩ sɩ mɑ tʋlǝɣɩ mɑ kʋsɔɔlʋ, nɑ mɑ ntɑntɑkʋ nɑ mɑ mpee tɔɔ tulɑɑlʋ tɑɑnɑ kɑmpʋ tǝtɔkǝlɛ.
6Ḿpʋ́ɣʋ́ mɑ tʋlɑ mɑ kʋsɔɔlʋ, ɩlɛ ɩ tɛmɑ tɛɛʋ. Amɑ ɩ kʋyɔɣɔtʋtʋ wɑkǝlɑ mɑ lɑŋlɛ. Ɩlɛnɑ mɑ pɛɛkɩ-ɩ mɑ tɑ nɑ-ɩ. Nɑ mɑ́ yɑɑ-ɩ ɩ tɑ cɔ.
7Ḿpʋ́ɣʋ́ mɑ sulɑ tɑŋlɑɑ mpɑ pɑ cɔɔkɩ ɩcɑtɛ tɔ. Nɑ pɑ́ mɑ-m nɑ pǝ́ kʋ-m, nɑ pɑ́ lɛɛkɩ mɑ tɛkɛntɛ.
8Hɑɩ, Yosɑlɛm pɛɛlɑɑ mɛ, mɑ wiinɑ-mɛ. Ye ɩ́ sulɑ mɑ kʋsɔɔlʋ, ɩ́ heeli-ɩ sɩ sɔɔlʋɣʋ kʋtɔŋ kpɑ-m.
9Hɑɩ, ɑlɑɑ tɑɑ telu nyɑ́, weɣe nyɑ́ kʋsɔɔlʋ nɑ́ tɛɛwɑ, nɑ ń wiikinɑ-tʋɣʋ mpʋ?
10Mɑ kʋsɔɔlʋ nyɑ́ n sɛɛwɑɣɑ tǝkpɑŋkpɑŋ. Pɑɑ n wɛ yǝlɑɑ iyisi nɑɑnʋwɑ (10000) tɑɑ, pɑ nyǝŋɩ-ŋ kpɑkpɑɑ kɛ́.
11Nyɑ́ ɩsɛntɑɑ tewɑɣɑ ɩsɩɩ wʋlɑ mɑɣɑmɑɣɑ. Nɑ nyɑ́ nyɔɔsɩ nɑ́ɑ́ yɑwɑ tǝpolopolo ɩsɩɩ pɑ́ɑ́ʋ hɛtʋ, nɑ sɩ pilɑ kilikili ɩsɩɩ kɑtǝkɑtʋɣʋ.
12Nyɑ́ ɩsǝpee wɛɛ kɛ́ ɩsɩɩ ɑlukukunɑɑ kɛ lʋm kʋkpemim nɔɣɔ. Nɑ pɑ́ yɑɑkɩ nɑɑlǝm tɑɑ nɑ pɑ́ hɛɛsǝɣɩ timpi pǝ tɔɔlǝnɑ-wɛ tɔ.
13Nyɑ́ lukpuɣutu tewɑɣɑ ɩsɩɩ tulɑɑlʋnɑɑ tɩɩŋ tɑɑlɛ. Nɑ nyɑ́ ntompee wɛ ɩsɩɩ yɑɑyenɑɑ mpɑ pɑ tɔɔ tulɑɑlʋ miili kpeŋ tɔ.
14Nyɑ́ niŋ wɛ kɛ́ ɩsɩɩ wʋlɑ kukuwee nnɑ ɑ tɔɔ pɑ tʋ liɣitee pɛɛ tɔ. Nɑ nyɑ́ tɔnʋɣʋ tɔɔ nɑ́ɑ́ wɛ ɩsɩɩ tuu kete kʋsotile nte tǝ tɔɔ pɑ tʋ liɣitee pɛɛ tɔ.
15Nyɑ́ nɔɔhɛɛ wɛ kɛ́ ɩsɩɩ liɣitee pɛɛ kʋhʋlʋmɛɛ ɑkelenɑɑ mpɑ pɑ tɑpǝŋ tɛɛ pɑ temɑ wʋlɑ tɔ. Nɑ nyɑ́ nyǝnʋɣʋ tɑɑ wɛ ɩsɩɩ Lipɑŋ pɔ́ɔ́ŋ. Nyɑ́ nyʋɣʋ kʋlɑɑ kɛ́ ɩsɩɩ tɩɩŋ sɔsɔɔŋ, n fɛɩnɑ sɑɑlɑ.
16Nyɑ́ kʋyɔɣɔtʋtʋ tǝnɑ nɑ leleŋ kɛ́. Nɑ nyɑ́ pǝ tǝnɑ pǝ wɛ teu. Yosɑlɛm pɛɛlɑɑ mɛ, mɑ kʋsɔɔlʋ ntɛ́, mɑ pɑɑlʋ kɛlɛ.
