Yontu Tɑɑ Yontu 3

1

2

3

4

5

6

7

8

¹Ḿpʋ́ɣʋ́ mɑ toosɑ ɑhoo sɩ mɑ kʋsɔɔlʋ ntɛ́ mɑ pɛɛkɑ kɑto tɔɔ. Nɑ mɑ́ pɛɛkɩ, nɑ mɑ́ pɛɛkɩ, mɑ tɑ nɑ-ɩ.

²Ɩlɛnɑ mɑ́ kʋlɩ nɑ mɑ́ cɔɔ ɩcɑtɛ. Nɑ mɑ́ pɛɛkɩ-ɩ nɔnɔɔsɩ tɛɛ, nɑ hɑpɛɛ tɔɔ, mɑ tɑ nɑ-ɩ.

³Ɩlɛnɑ mɑ́ sulinɑ tɑŋlɑɑ mpɑ pɑ cɔɔkɩ ɩcɑtɛ tɔ nɑ mɑ́ pɔɔsɩ-wɛ sɩ: Ɩ́ nɑwɑ mɑ kʋsɔɔlʋ nɑ?

⁴Mɑ polɑɑ sɩ mɑ tɛɛkɩ pɑ tɔɔ ɩlɛ, mɑ nɑ́ mɑ kʋsɔɔlʋ ntɛ́. Nɑ mɑ́ kpipi-ɩ nɑ mɑ́ tɔkɩ-ɩ teu nɑ mɑ́ ponɑ-ɩ mɑ too tɛ. Nɑ mɑ́ sʋʋnɑ-ɩ wei ɩ lʋlɑ-m tɔ ɩ nɑŋ tɑɑ.

⁵Hɑɩ, Yosɑlɛm pɛɛlɑɑ mɛ, mɑ tuukinɑ nɑmǝŋ nɑ nɑsɛŋ. Ɩ́ tɑɑ pɑɑtɩ tɑ́ sɔɔlʋɣʋ nɑ kʋ wɑɑtʋ tɑ tɑtɑ.

⁶Pepe lɩɩnɑ wʋlɑɣɑ tɛtʋ tɑɑ nɑ pǝ́ kɔŋ ɩsɩɩ wontu pee tulɑɑlʋ nyɔɔsɩ?

⁷Wulɑʋ Sɑlʋmɔŋ ɑmɑkɑ kɔŋnɑ. Nɑ Ɩsɛɣɛlɩ yoolɑɑ tɑɑ yoolɑɑ nɩɩtoso kɛ ɩ wɑɑlɩ.

⁸Pɑ tǝnɑ pɑ kpɛlǝmɑ yoou kɛ́. Pɑ pɑɑ lɑɣɑlɛɛ kɛ pɑ kɔŋkɔmǝŋ tɑɑ. Nɑ pɑ́ tɑŋɑ ɑsolɑ nnɑ ɑ kɔŋ ɑhoo tɔ.

⁹Lipɑŋ tɑɑsɩ kʋpɑŋsɩ kɛ pɑ sɑɑkɑ wulɑʋ Sɑlʋmɔŋ ɑmɑkɑ ɩnɩ.

¹⁰Liɣitee nyǝɣǝtʋ kɛ pɑ lupɑ ɩ kpɑtǝŋ, nɑ tǝteesile kɛ wʋlɑ. Tǝcɑɣɑlɛ kɛ pʋʋɣʋ kʋsɛɛmʋɣʋ kʋpɑŋkʋ. Ɩlɛnɑ Yosɑlɛm pɛɛlɑɑ nɑ́ɑ́ pɔ pǝ tɑɑ kɛ́ pɔɔŋ wei pɑ sɔpǝnɑ sɔɔlʋɣʋ tɔ.

¹¹Siyɔŋ pɛɛlɑɑ mɛ, ɩ́ lɩɩ nɑ ɩ́ nɑ́ wulɑʋ Sɑlʋmɔŋ ntenuɣu ŋku ɩ too temɑ-ɩ ɩ ɑkpɑɣɑlɛ wule tɔ. Kʋ kɛ́ ɩ lɑŋhʋlʋmlɛ sɔsɔɔlɛ kʋyɑkʋ kɛ́.