SOLOMONA ENA ANE 5

1

2

3

4

5

6

7

8

¹Egu lalokau, egu adavana e, egu uma lalonai lau raka vareai vadaeni. Egu muro, bona egu bonana namo muramura lau haboua noho. Egu hani, bona bi ena hani haboua ruma lau ania noho, egu uaina bona rata lau inua noho. Aiemai turadia e, do umui aniani, bona inuinu. Umui lalokau tauna bona hahine e, do umui inua momo.

²Lau mahuta, to egu lalona be ia noga. Lau nihi, egu lalokau tauna be iduara dekenai ia pidipidi. Egu lalokau e, egu pune manu e, oi be goevagoeva momokani. Iduara do oi kehoa, badina hanuaboi ena ranu ese, egu kwarana ia hapariparia. Hanuaboi ena medu maragi ese, egu huina ia hapariparia vadaeni.

³Egu dabua lau kokia vadaeni, be do lau kwatua lou, a? Egu aena lau huria vadaeni, be do lau hamirodia lou, a?

⁴Egu lalokau tauna ese iena imana, be iduara loka dekenai kehoa totona ia atoa, bona ia totona egu kudouna ia toreisi momokani.

⁵Lau toreisi, egu lalokau tauna totona iduara do lau kehoa gwauraia. Egu imana dekenai muro ia noho, egu ima kwakikwakina dekena amo, muro ena ranu ia diho noho, iduara ena loka dekenai.

⁶Egu lalokau tauna totona iduara lau kehoa, to egu lalokau ia raka siri vadaeni, ia be ia noho lasi. Lau ura bada momokani iena gadona do lau kamonai, to lau tahua neganai lau davaria lasi, bona ia dekenai lau boiboi neganai, ia be ia haere lasi.

⁷Hanua gimaia taudia be gabu ta ta dekenai, idia raka lao neganai, idia ese lau idia davaria. Idia ese lau idia dadabaia bona lau idia haberoa, ma egu kouti dabua idia abia lao, magu gimaia taudia ese.

⁸Ierusalema hahine e, lau dekenai do umui gwauhamata, bema egu lalokau tauna umui davaria neganai, do umui hamaoroa egu ura henia ese, egu lalona ia hamasea noho.

⁹Hahine namona e, oiemu lalokau tauna be edena bamona iena namo, ese tau haida edia namo ia hereaia? Edena bamona ia namo herea momokani, bona ai ese unai gwauhamata do ai karaia?

¹⁰Egu lalokau tauna ena kopina, be goevagoeva bona kakakaka, tau ibounai 10,000 edia huanai, ia sibona be namo herea.

¹¹Iena kwarana be golo namo herea bamona. Iena huina be koremakorema, galo manu bamona, bona iena huina be davara ena hurehure manokadia bamona.

¹²Iena matana be pune manu, ranu namona badinai noho gaudia bamona, rata dekenai idia huria gaudia. Edia gabu dekenai idia noho namo herea.

¹³Iena vairana ena kahana kahana, be muramura avadia ena uma bamona, mai edia bonana namona. Iena uduna bibinadia be sosana palauapalaua, muro ranu be idia dekena amo ia diho noho.

¹⁴Iena imana be golo, idia koroa kuboru gaudia bamona, mai herahera nadi haida danu. Iena tauanina be aivori namo herea bamona, mai sapairo nadi haida danu.

¹⁵Iena aena be nadi kurokuro du goadadia bamona, bona idia be golo maua edia latanai idia gini noho. Egu lalokau tauna ena toana, be Lebanona Ororo bamona. Iena hairaina be Lebanona sida audia bamona.

¹⁶Iena hereva be gaiho namo herea. Lau ese ia lau ura henia noho, bada momokani. Ierusalema hahine taudia e, egu lalokau tauna be unai. Egu turana be unai.