Daahili Aloho 5

1

2

3

4

5

6

7

8

¹Dogu aloho mo dagu ahina hai lodo, au gu ulu gi lodo dagu hadagee. Au e hagabudu agu mee hagakala mono ‘myrrh’. Au e gai agu mee maangala laagau mo di inu agu waini mono milugu. Nia ahina Miami mo di inuinu, goolua ala e hagadau aaloho, gaa dae loo gi di gulu madagoaa gu libaliba i di gulu aloho!

²Dogu madagoaa nogo kii, dogu manawa la nogo ala hua. Au guu midi bolo dogu aloho e dugidugi dogu bontai. Taane Haga ulu ina adu au, go dogu aloho, go dagu mwuroi. Dogu libogo la guu tiu i nia magalillili, gei nia ngaahulu dogu libogo la gu huungina i nia madaua honihoni.

³Au gu liagi ogu goloo gi daha, gei au belee hai labelaa ogu goloo eiaha? Ogu wae la guu tono, gei au belee haga dogolia labelaa nia maa eimaha?

⁴Dogu aloho ne kumi di bontai, gei au gu malali huli bolo mee gu hoohoo mai loo.

⁵Au gu togomaalia ga haga ulu mai a mee gi lodo. Ogu lima la guu hunu gi nia ‘myrrh’, ogu madaalima la guu hunu gi nia wai ‘myrrh’ i dogu madagoaa dela e kumi di bontai.

⁶Au ga huge adu di bontai gi dogu aloho, gei mee guu hana. Au gu hiihai huoloo bolo au ga hagalongo gi di lee o maa! Au gu halahala a mee, gei digi gida. Au gu gahigahi a mee gei dono hui ai.

⁷Digau hagaloohi di waahale gu gidee ginaadou au, digaula gu hagamamaawa au gu hagahuaidu au. Digau hagaloohi di ngudu di abaaba gu hahaahi dagu mee gahu golomada.

⁸Goodou go nia ahina o Jerusalem, hagababa mai gi di au bolo di madagoaa ma ga gidee goodou dogu aloho, gei goodou ga hagi anga gi mee bolo au gu bagege huoloo i dogu aloho.

⁹Kooe go di ahina dela e kaedahi e humalia, e hai behee, do aloho le e hai gee mo digau ala i golo? Ma di aha dela e humalia iei mee gii hai di madau hagababa adu gi di goe?

¹⁰Dogu aloho le e madanga ge maaloo. Go mee hua e kaedahi i lodo digau e madangaholu mana.

¹¹Ono hadumada e maahina be nia baalanga mmee, gei guu mmili gi malali. Nia ngaahulu o maa e beabeau ge luuli gadoo be di manu mamaangi ‘raven’.

¹²Nia golomada o maa e mmaadanga gadoo be nia mwuroi i baahi tama monowai mmidi, e mmaadanga gadoo be nia mwuroi gu gaugau gi nia milugu gaa noho laa i baahi tama monowai.

¹³Nia gauwae o maa e mmaadanga gadoo be dahi hadagee gu deeoo akai mono laagau hagakala mee. Di gili ono malaungudu le e hai gadoo be nia madaladala gu hagatiu gi nia wai ‘myrrh’.

¹⁴Nia lima o maa gu haganoho haga humalia. Nia madaalima o maa e ulu nia buulei guu wanga ginai nia hadu hagalabagau dono gili. Tuaidina o maa e malallali gadoo be di ‘ivory’ guu wanga ginai nia ‘sapphire’.

¹⁵Nia gadawae o maa e hai gadoo be nia duludulu ‘alabaster’ ne hagatau gi hongo di hagamau ne hai gi nia goolo. Tuaidina o maa e maaloo gadoo be nia Gonduu Lebanon ala e tomo ai nia laagau ‘cedar’ lloo ehaa nonua.

¹⁶Di ngudu o maa e kala ma gaa hongi. Nia mee huogodoo i di gili o maa e haga manawa tenetene au. Goodou go nia ahina o Jerusalem, deenei di hagadilinga o maa, go dogu aloho.