Sandane 30:2-15

²Xaxilitaren nan n na dangu muxun birin na. Adamadi xaxili mi n ma.

³N mi fe kolonna sɔtɔxi, n mi Ala Sariɲanxina kolonna sɔtɔxi.

⁴Nde texi kore xɔnna ma, a mɔn yi godo? Nde foyen malanxi a yiine kui? Nde igen naxudu a domani? Nde bɔxɔn danne birin nafalaxi? A xili di, a diin fan xili di? I na kolon ba?

⁵Alaa falane birin sariɲan. Naxanye e luxunma a yi, a ne yɛ masansanma nɛn.

⁶I nama sese sa a falane fari alogo a nama i maxadi, i yi kolon wule falan na.

⁷N fe firin nan maxɔdinma i ma, Ala. I nama tondi e ma n xa, benun n xa faxa!

⁸Fuyantenyaan nun wulen masiga n na. I nama bannayaan fi n ma hanma yiigelitɔyana, fɔ n mako donseen naxan ma

⁹alogo n nama lugo ɲaxi ra, n na n mɛ i ra n yi a fala, n naxa, “Nde Alatala ra?” Hanma n findi yiigelitɔɔn na, n yi muɲan ti, n yi n ma Ala xili kala.

¹⁰I nama walikɛ mafala a kanna xa alogo a nama i danga, a hakɛn yi lu i ma.

¹¹Muxuna ndee na naxanye e baba dangama, naxanye mi dubama e nga xa,

¹²naxanye sariɲan e yɛtɛ yɛɛ ra yi anu, e xɔsin mi baxi e ma

¹³naxanye yɛɛ rawaso e muxune matoma yɛtɛ yigboni,

¹⁴naxanye ɲinne luxi alo silanfanne e gbɛgbɛne maxɔlɔn tima alo filɛne, alogo e xa yiigelitɔne raxɔri bɔxɔn fari e tɔrɔ muxune ɲan adamadiine yɛ.

¹⁵Dii firin yi nusun yii naxanye yi a falama tun, e naxa, “N ki! N ki!” Se saxan nan na naxanye mi wasama mumɛ, han se naanin naxanye mi a falɛ, e naxa, “Na lan.”