Tɛnɛ Faalaaliiti 30:2-15

²Gaama ʋe, nà ga ɠimalala nui, gè leʋe nuɓusɛiti kpein ba, nuɓusɛ ɠeleɠelegi la zèa.

³Gè la ɠimalai ɠalani, gè la GALA Ɲadegai ná-faaɠwɛgi ɠwɛɛ.

⁴Ɓɛ ɠa é lɛɛni geeɠɔlɔgi zu, GALA pɔ bɛ, é zeɠe ná, é yei? Ɓɛ ɠa é fiilɛi zoga, é yɛ zea? Ɓɛ ɠa é ziɛiti pua ná-seɠei la? Ɓɛ ɠa é zooi ɠwɛgiti kpein daa? Daasei ka ɓɛ, ná-doun zunui laasei ka ɓɛ? Bo dɛɛ, ni è kwɛɛ!

⁵GALA daawooi ɠilagilagi pɛ ka ga gaamai. Toɠa ga kɔɔɠɔ zɛpɛgi naati bɛ, niiti ti lɔɔɠuzu bu.

⁶Mina tanɔpɛ da daawooiti ma, ni naa laade, toɠa è loɠa, è ʋɛtɛ ga zɛɛ nu.

⁷Ɠɔoɠɔ GALAGI, nà faa felegɔ valizu è ma, naati kɛ bɛ̀, aisa nà-eteai ʋa ɓe:

⁸màkɛ, gè mina kpɔɛ ɲaka wo, ɓaa zɛɛiti, mina kɛ̀ ga bala nu, ɓaa kpɛtɛ nu wola. Naa ve zèa nɔ, nii fizɔgai mà, gè eteai ziɛ.

⁹Mazɔlɔɔ anii pɛ ga ʋooʋana zèa, nà ʋa lia ɠɛlɛzu è ʋa, gè ʋa ɠɛ ma: «Ɓɛ ɠa é ga Ɠɔoɠɔ GALAGI?» Ɓaa mu, maanɔɠɔi a ɓɔina dà, gè ɓɔɠɔ ɠɛ ga unma nu, gè ɓaaɠula nà-GALAGI ma ɠana.

¹⁰Mina va botiɠɛ nu ma, maliɠii ɠaazu. É mina è voovo, ɗa-vaaɠaazagi ma ɠasɔi ɠa la è unma.

¹¹Nui tanigaa ta ná, ta ɗa ti-ɠɛɛ ɠoto, ti la tuya loa ti-lee ʋɛ.

¹²Nui tanigaa ta ná, ti ɓɔɠɔ ɠaazu ga ti ɲadegɛ, tama, ti la gbani, ti ʋa ɠula ta-ɠɔzɔba vaiti su.

¹³Nui tanigaa ta ná, ti ɠaazulɛai, ti ɗa wɛlɛ nui pɛ ba fawuu.

¹⁴Nui tanigaa ta ná, ti-ɲiigaiti ti ga boɠa zɔkpɔiti, ti-ɓalɔ ɠaeiti ti ga boɠaiti, ti ɗa maanɔɠɔ nuiti mi, ti ʋa ɲɛɛlɛ, ti ɠula eteai zu, ti ʋa bala nuiti suwuɠaaleʋe, ti ɠula nuɓusɛiti saama.

¹⁵Moolɛi ná-doun anzanuiti ti fele, ti-laasei ka ga: Fe! Fe! Ani saʋagɔ ɠa ná, ti-yii la lɛiɗa eyɛsu pɛ, eyɛsu pɛ ti la ɠɛa ma: «É kula ɠɛa.»