San Marcos 15

1

2

3

4

5

6

7

8

9

10

11

12

13

14

15

16

¹Laab bzaꞌ yu la tuubaꞌ dzi, de uz zub lo, gal nu de yu bel ni de mbecy Israeel, nu de yu nu rlyuu leey ni Ñgyoozh, nu dela de mbecy nu zu riiñ ni junt zub lo byatublaazh dey beey riidz nu la gyicy nu dey Jesuuz. Gazeꞌ nu pcyiig dey mi za nuy mi. Bguꞌ dey mi yaa Poncio Pilato.

²Orzeꞌ na Pilato rab yum: ―¿A ru nac ru rey ni de mbecy Israeel? ―nay. Orzeꞌ na Jesuuz rab mi yu: ―Laab ni gal nu ru mniir ―nam.

³Orzeꞌ de uz zub lo zeꞌ briib dey zañ cyi toom.

⁴Gazeꞌ nu na gaꞌ Pilato rab yum: ―¿A wagniir? Güii ñuu la zañ cyi driib dey toor ―nay.

⁵Tees Jesuuz rila wanniim. Orzeꞌ za nu la ic Pilato zuy.

⁶Na de ñaꞌn la lat nu rzuꞌ saꞌ ni Pas, orzeꞌ Pilato rlaay tub ga pres, ca ziꞌl na yu nu gnii mbecy nu dulaa.

⁷Zeꞌ yuꞌ la be mbecy nañ yuꞌ gyiib nu rboo lo lo gubier. De yu zeꞌ biit dey mbecy lat nu guꞌ dey gyel yuu nu bish cyay ich gubier. Lat de mbecy zeꞌ ri tub mbecy nu la Barrabás.

⁸Orzeꞌ bruꞌña dela de mbecy zigy, nunu mnii dey lo Pilato nu gyicy yu gal nu ricy ziꞌl yu lat saꞌ zeꞌ de ñaꞌn la.

⁹Orzeꞌ na Pilato rab yu dey: ―¿A rlagy der la̱a̱ yu nu nac rey ni de mbecy Israeel? ―nay.

¹⁰Gun Pilato gud lagy yu nu de uz zub lo bguꞌ dey Jesuuz yaay nu nac gyel saap lagy.

¹¹Tees de uz zub lo zeꞌ bduꞌ dey lagy de mbecy zigy gun orzeꞌ laa dey Barrabás lugaar nu laa dey Jesuuz.

¹²Orzeꞌ Pilato nay rab yu dey: ―Beni, ¿la coz rlagy der gyicy du̱ yu nu rnii der rey ni de mbecy Israeel? ―nay.

¹³Orzeꞌ dub ruꞌ la dey rbish tiy: ―¡Cut ruy lo cruuz! ―na dey.

¹⁴Gazeꞌ nu na Pilato rab yu dey: ―¿La ñuu coz a̱ꞌ nap bicy yu? ―nay. Tees dzi zir rbish ti dey. Orzeꞌ na dey: ―¡Cut ruy lo cruuz! ―na dey.

¹⁵Gazeꞌ nu blaa Pilato Barrabás, gun rlagy yu ganap lagy de mbecy zigy loy. Orzeꞌ despuees bicy yu mandaar nu gaaz dey Jesuuz. Gazeꞌ nu bguꞌy mi yaa de soldad nu caa dey mi lo cruuz.

¹⁶Orzeꞌ de soldad gua nu dey mi loliꞌ ni yuꞌ zeꞌ nu riib ic gubier. (Ndeꞌ tub yuꞌ nu la pretorio.) Orzeꞌ zeꞌ bicy tublaazh dey dela de soldad.

¹⁷Orzeꞌ bzuu dey mi tub negy bizat. Gazeꞌ nu bel dey ya gyech bzaa dey tub coron nu bri dey toom.

¹⁸Gazeꞌ nu brugyiꞌ ricy dey nu rnii nuy mi ñgyoozh: ―¡Shnur, rey ni de mbecy Israeel! ―rnii dey.

¹⁹Nunu rshet dey toom nu tub yagyi, nunu rcoo yeñ dey lom, nunu rzu tib dey lom ricy dey nu dzi rca lagy dey lom.

²⁰Orzeꞌ despuees nu bguu bdzaa dey mi, bloo dey negy bizat nu zu yeñ mi zeꞌ. Orzeꞌ bzuu dey mi laab shab mi. Gazeꞌ nu bruu nu dey mi lugaar zeꞌ, za nu dey mi par nu caay mi lo cruuz.

²¹Nez za dey bdzeel yu tub mbecy Cirene nu la Simo̱o̱. Yu zeꞌ uz Alejandro nu Rufo. Bruuy ngush yeed yu. Ornu bdzeel yu de soldad, orzeꞌ por fers la pcaa dey yu nu cha nuy cruuz ni Jesuuz.

²²Gazeꞌ nu za nu dey mi tub lugaar nu la Gólgota. Ndeꞌ tub riidz nu yaruuñ: Lugaar ni cyug too añ.

²³Gazeꞌ nu briic dey ñup urbay nu yuꞌ can nu tub lo asecy nu la mirra goꞌm. Tees wangoꞌm ñii.

²⁴Gazeꞌ nu pcaa dey mi lo cruuz. Orzeꞌ de soldad bloo dey cuen ben ca na dey dugyiy tub ga shab mi. Ni mod bleez dey shab mi.

²⁵Tub gyiib gaa or napor pcaa dey mi lo cruuz.

²⁶Lo gyicy cyim pcaa dey: “Rey ni de mbecy Israeel”, pcaa dey.

²⁷Pcaa dey mi lo cruuz nu cyup gubaan, tub yu par yaa beem, zeꞌ tuubaꞌy par yaa reg mi.

²⁸Orzeꞌ byuꞌ niñ gal nu pcaañ lat de riidz ni Ñgyoozh zeꞌ nu rniiñ: “Bicy dey mi par mbecy a̱ꞌ nap”, rniiñ.

²⁹Orzeꞌ de mbecy nu rded zeꞌ rguu bdzaa dey mi. Rgyib la ic dey nu gyel rguu bdzaa. Orzeꞌ na dey: ―¡Ja̱j! Ru mniir nu nit lor yuꞌ nu driib zily mbecy Ñgyoozh nunu nañ chon dzi shes sur ñii.

³⁰Na bloo mbañ ub ru na. Bet lo cruuz ―na dey.

³¹Niꞌ de yu zub lo ni uz nu de yu nu rlyuu leey ni Ñgyoozh rguu bdzaa dey mi. Rnii zi dey nim nu losaꞌy. Orzeꞌ na dey: ―Bloo mbañ yu reñaꞌ mbecy. Tees ub yu wagac co mbañ yu.

³²Rlagy ñi nu gyet Mesías, biñ nu nac rey ni de mbecy Israeel, lo cruuz, gun orzeꞌ gzac na nunu cheña lagy na nu laab mi ―na dey. Orzeꞌ niꞌ ziꞌl de yu nu ca num lo cruuz rguu bdzaa dey mi.

³³Orzeꞌ tub gyiib trocyup or widoo, bet cow dutuub la lo yu gal tub gyiib chon or gudze. Gazeꞌ nu bzu yaa.

³⁴Gazeꞌ nu laab or zeꞌ ye brish ti Jesuuz. Orzeꞌ nam: ―Eloi, Eloi, ¿lema sabactani? ―nam. Riidz zeꞌ yaruuñ: Ñgyoozh ne̱, Ñgyoozh ne̱, ¿lagu bzaan ru ya̱?

³⁵Orzeꞌ la be de mbecy nu yuꞌ zeꞌ, ornu güeñ dey nu brish tim, orzeꞌ na dey: ―Güii, yu re rbedz yu Elías, yu nu mnii por cuen ni Ñgyoozh ―na dey.

³⁶Orzeꞌ tub mbecy gush yu carer, psal yu tub coz nu chayoꞌ nis lo ñup zii ni urbyay. Gazeꞌ nu bzuub yuñ lo tub yagyi. Briic yuñ goꞌm. Orzeꞌ nay rab yu losaꞌy: ―Blez güiin ben a cyid Elías shet yuy lo cruuz ―nay.

³⁷Tees Jesuuz brish tim stub nu ye. Orzeꞌ gut mi.

³⁸Gazeꞌ nu negy nu zaab gyeroꞌ ni lugaar yon nañ yuꞌ nu driib zily mbecy Ñgyoozh pshaa la lañ gaal ziꞌl nu gush ñi gal ic lañ gal lo yu la.

³⁹Orzeꞌ yu nu riib ic de soldad, yu nu zu par lo Jesuuz, ornu bzaac yu nu lac gut mi, orzeꞌ nay: ―Rishli gaal biñ ii guc mi iꞌñ Ñgyoozh ―nay.

⁴⁰Niꞌ yuꞌ gaꞌ la be biñ mñaa. Zet rgüii dem lo Jesuuz. Lat zeꞌ ri Li, biñ nu bruu Magadán, nu Li ñaa Santiag miꞌ nu See, nu Salomé.

⁴¹De mi zeꞌ gua ca dem ich Jesuuz, nunu bzu bich dem nu nac mi lat nu gusam Galilea. De mi zeꞌ nu zigy zir biñ mñaa bruu num mi Galilea bri nu dem mi gal Jerusaleeng.

⁴²Na dzi zeꞌ, ndeꞌ dzi nu zu lily mbecy par saꞌ ni Pas. Ndeꞌ dzi birs anzir sab dzi nu zu lagy mbecy. Orzeꞌ or gudze

⁴³bruꞌña See lo Pilato. Yad nu See yu nu guledz Arimatea. Nac yu tub mbecy lily nu zu riiñ lat junt zub lo. Nunu nac yu tub yu nu rcyish lo lo gyel gubier ni Ñgyoozh. Orzeꞌ See guay lo Pilato bdiiñ yu cuerp ni Jesuuz loy.

⁴⁴Pilato za nu ic yu nu güeñ yu nu bi gut Jesuuz. Orzeꞌ bredz yu yu nu riib ic de soldad zeꞌ. Orzeꞌ bdugyiꞌy loy ben a bi gut mi.

⁴⁵Orzeꞌ ornu mnii yu nu riib ic zeꞌ nu bi gut mi, orzeꞌ briic Pilato rishbeey nu cha nu See cuerp nim.

⁴⁶Orzeꞌ See wiiy tub sab fin. Gazeꞌ nu pshet yu cuerp ni Jesuuz lo cruuz. Gazeꞌ nu ptiish yu sab zeꞌ cuerp nim. Gazeꞌ nu briy mi gyerbaa nu bduguuñ nañ gyitaꞌ. Gazeꞌ nu psoow yu ruꞌ baa zeꞌ nu tub gyitaꞌ ily.

⁴⁷Li, biñ nu bruu Magadán, nu Li ñaa See bzaac dem zeꞌ nu briy cuerp ni Jesuuz.