Qoodaabaa 22:2-22

²Israa7eela asai Amooretu bolli oottidoogaa ubbaa Xippoora na7ai Baalaaqi siyiis.

³Siyin Israa7eela asai keehi daro gidido gishshau, Moo7aabati keehi dagammidi yayyidosona.

⁴Moo7aabati Midiyaama cimata, “Boorai maataa mi xaissiyoogaadan ha wude asai nu yuushuwan de7iya ubbaa mi xaissana” yaagidosona. Yaagin he wode Moo7aaba Kawoi, Xippoora na7ai Baalaaqi

⁵Amaawa biittan Efiraaxiisa SHaafaa matan Patoora kataman de7iya Bi7oora na7aa Balaamakko asa kiittiis. Kiittiiddi Baalaaqi, “Be7a, Gibxxeppe daro asai kiyiis; eti biitta ubbaa maayidi, taappe ya baggan de7oosona.

⁶Eti taayyo keehi wolqqaamiyo gishshau, hayyanaa ha77i yaada, eta taayyo qanggarkkii! Ooni erii, taani eta xoonanaunne biittaappe kessanau danddayanaakkonne. Aissi giikko, neeni anjjidoogee anjjettidaagaanne neeni qanggidoogee qanggettidaagaa gidiyoogaa taani erais” yaagiis.

⁷Yaagin Moo7aaba cimatinne Midiyaama cimati qanggissiyo waagaa ekkidi, Balaamakko biidosona. Biidi Baalaaqi giidoogaa ayyo yootidosona.

⁸Yootin Balaami eta, “Hachchi qammi hagan aqite; GODAI taayyo yootiyoogaa taani intteyyo yootana” yaagiis. Yaagin Moo7aaba halaqati Balaamaagan takkidosona.

⁹Xoossai Balaamakko yiidi, “Hageeti nenaara de7iya asati oonee?” yaagidi oichchiis.

¹⁰Oichchin Balaami Xoossaa, “Moo7aaba Kawoi, Xippoora na7ai Baalaaqi,

¹¹‘Gibxxeppe daro asai kiyiis; eti biitta ubbaa maayidosona. Ha77i neeni yaada, eta taayyo qanggarkkii! Ooni erii, taani eta xoonanaunne biittaappe kessanau danddayanaakkonne’ yaagidi eta taakko kiittiis” yaagiis.

¹²Yaagin Xoossai Balaama, “Neeni etaara booppa. Israa7eelati anjjettidaageeta gidiyo gishshau, neeni he asaa qanggoppa” yaagiis.

¹³Wonttetta gallassi maallado Balaami denddidi, Baalaaqa halaqata, “Taani inttenaara beennaadan GODAI diggido gishshau, intte biitti simmite” yaagiis.

¹⁴Yaagin Moo7aaba halaqati yaappe denddidi, Baalaaqakko simmidi a, “Balaami nunaara yeennan ixxiis” yaagidosona.

¹⁵Zaaridikka Baalaaqi kaseegeetuppe aadhdhi bonchchettidanne qoodankka corattida hara halaqata akko kiittiis.

¹⁶Eti Balaamakko yiidi, “Xippoora na7ai Baalaaqi nena, ‘Neeni taakko yaanaagaa nena aibinne teqqoppo.

¹⁷Aissi giikko, taani neeyyo daro woituwaa immana; neeni giyoobaa ubbaa aibanne taani oottana. Yaada ha asaa taayyo qanggarkkii!’ yaagiis” yaagidi yootidosona.

¹⁸SHin Balaami etayyo, “Baalaaqi harai atto birainne worqqai kumido ba kawo keettaa tau immidabaa gidiyaakkonne, GODAA ta Xoossaa azazuwaappe kanttada, taani aibanne pacissanau woikko gujjanau danddayikke.

¹⁹GODAI taayyo yootiyo harabi de7ikko taani eranaadan, inttekka hachchi qamma hagan aqite” yaagiis.

²⁰He gallassa qammi Xoossai Balaamakko yiidi, “Ha asai nena xeesanau yiido gishshau, neeni etaara ba. SHin taani neeyyo yootiyoobaa xalaalaa ootta” yaagiis.

²¹Yaagin wonttetta gallassi Balaami ba hariyo kooridi, Moo7aaba halaqatuura biis.

²²SHin i biyo wode Xoossaa hanqqoi eexxi kiyiis; yaatin GODAA kiitanchchai a teqqanau ogiyan eqqiis. He wode Balaami ba hariyo toggidaashin, a naa77u ashkkarati aara de7oosona.